IS ရန်ကြောင့် ဟိန္ဒူဘုရားကျောင်းများတွင် မလေးရှားက လုံခြုံရေးတိုးမြှင့်

မေ ၁၆၊ ၂၀၁၉
M-Media

-အစိုးရခေါင်းဆောင်တွေကို လုပ်ကြံဖို့နဲ့ မွတ်စလင်မဟုတ်သူတွေရဲ့ ၀တ်ပြုရာနေရာတွေကို ပစ်မှတ်ထား တိုက်ခိုက်ဖို့ စီစဉ်ထားတဲ့ IS အဖွဲ့ဝင်တွေကို ဖမ်းဆီးခဲ့ပြီးတဲ့နောက် မလေးရှားအာဏာပိုင်တွေဟာ ကွာလာလမ်ပူက နာမည်ကြီး ဟိန္ဒူဘုရားကျောင်း ၃ ခုမှာ လုံခြုံရေးကို တင်းတင်းကြပ်ကြပ် ချထားလိုက်ပါတယ်။

တိုက်ခိုက်မယ့်အစီအစဉ်ကို မလေးရှားက အခုလအစောပိုင်းမှာ ဖော်ထုတ်နိုင်ခဲ့တာဖြစ်ပြီး လူ ၄ ဦးကို ဖမ်းဆီးထားကာ နောက်ထပ် ၃ ဦးကို လိုက်လံရှာဖွေနေပါတယ်။ ရဲတပ်ဖွဲ့က IS အဖွဲ့ဝင်တွေဟာ ၂၀၁၈ ခုနှစ် နိုဝင်ဘာ ၂၇ ရက်နေ့က Sri Maha Mariamman ဟိန္ဒူဘုရားကျောင်းမှာ ဖြစ်ပွားခဲ့တဲ့ ရုန်းရင်းဆန်ခတ်မှုအတွင်း သေဆုံးသွားသူ မီးသတ်သမားအတွက် လက်စားချေဖို့ တိုက်ခိုက်မှုကို စီစဉ်ထားဖြစ်ပြီး၊ အစိုးရထိပ်တန်းပုဂ္ဂိုလ်တွေကို လုပ်ကြံဖို့ အကြောင်းပြချက်ကတော့ အစ္စလာမ်ဘာသာကို ကာကွယ်မပေးလို့ ဖြစ်တယ်လို့ ထုတ်ပြန်ခဲ့ပါတယ်။

ဒီလိုဖမ်းဆီးမှုတွေ ပြုလုပ်ပြီးတဲ့နောက်ပိုင်း မလေးရှားရဲတပ်ဖွဲ့ဟာ ကွာလာလမ်ပူက သမိုင်းဝင် ဟိန္ဒူဘုရားကျောင်းတွေဖြစ်တဲ့ Sri Subramaniyar၊ Sri Maha Mariamman Devasthanam နဲ့ Courthill Sri Ganesha ဘုရားကျောင်းတွေမှာ လုံခြုံရေးကို တိုးမြှင့်ချထားခဲ့ပါတယ်။ Sri Subramaniyar ဘုရားကျောင်းဟာ မလေးရှားရဲ့ ကမ္ဘ္ဘာလှည့်ခရီးသွားတွေ စိတ်ဝင်စားရာ Batu Cave က ဘုရားကျောင်းဖြစ်ပါတယ်။

ဒီဘုရားကျောင်း ၃ ခုကို ကြီးကြပ်စီမံနေတဲ့ SMMTDKL အဖွဲ့ရဲ့ ဒီကနေ့ထုတ်ပြန်ချက်မှာ IS အဖွဲ့ဝင်တွေ တိုက်ခိုက်ဖို့ အကြောင်းပြချက်ဟာ Sri Maha Mariamman ဘုရားကျောင်းက ကိစ္စရပ် ဖြစ်တဲ့အတွက် သူတို့အနေနဲ့ စိုးရိမ်မိကြောင်း၊ လုံခြုံရေးကိုလည်း ပိုမိုတင်းတင်းကြပ်ကြပ် စီမံထားကြောင်း၊ လာရောက်လည်ပတ်သူတွေကို စောင့်ကြည့်တာ၊ အိတ်တွေကို စစ်တာတွေကို လုပ်ဆောင်နေကြောင်း ဖော်ပြထားပါတယ်။

ဘုရားဖူးလာရောက်ကြသူတွေအနေနဲ့ သတိဝိရိယ ရှိကြဖို့လည်း SMMTDKL က တိုက်တွန်းခဲ့ပါတယ်။

Ref : The Star