ဂျေရုစလင်ကိစ္စ အမေရိကန်၏ တစ်ဖက်သတ်ဆုံးဖြတ်ချက်ကို လက်မခံဟု OIC ပြော

ဇွန် ၁၊ ၂၀၁၉
M-Media

-ဂျေရုစလင်ကို အစ္စရေးမြို့တော်အဖြစ် တစ်ဖက်သတ်ကြေငြာတာဟာ ‘တရားမ၀င်တဲ့ တာဝန်ယူမှုမရှိတဲ့ ဆုံးဖြတ်ချက်’ ဖြစ်တယ်လို့ အစ္စလာမ့်မစ် ပူးပေါင်းဆောင်ရွက်ရေးအဖွဲ့ OIC ခေါင်းဆောင်တွေ ဆော်ဒီမှာပြုလုပ်တဲ့ ထိပ်သီးအစည်းအဝေးမှာ ထုတ်ပြန်ပြောကြားလိုက်ပါတယ်။

မက္ကာမြို့မှာ ပြုလုပ်ခဲ့တဲ့ အဲဒီ ဆွေးနွေးပွဲဟာ ဒီကနေ့မှာ ပြီးဆုံးခဲ့တာပါ။ အစည်းအဝေးအပြီး ထုတ်ပြန်တဲ့ ကြေငြာချက်မှာ ဂျရုစလင်ကို သံရုံးပြောင်းသွားပြီဖြစ်တဲ့ နိုင်ငံတွေအနေနဲ့ သူတို့ရဲ့ ဆုံးဖြတ်ချက်ကို ပြန်လည်သုံးသပ်ဖို့ တိုက်တွန်းထားပြီး၊ ဒီလုပ်ရပ်ဟာ နိုင်ငံတကာဥပဒေ၊ စည်းမျဉ်းစည်းကမ်းတွေကို ဆိုးဆိုးရွားရွား ချိုးဖောက်မှု ဖြစ်တယ်လို့ ဖော်ပြထားပါတယ်။

ဂျေရုစလင်ကို သံရုံးပြောင်းသွားတဲ့နိုင်ငံတွေကို သင့်လျော်တဲ့ တုန့်ပြန်မှုတွေ ပြုလုပ်ဖို့လည်း ကြေငြာချက်မှာ အဖွဲ့ဝင်နိုင်ငံတွေကို တိုက်တွန်းထားပါတယ်။

အရှေ့ဂျေရုစလင်ကို မြို့တော်အဖြစ်ထားပြီး လွတ်လပ်တဲ့ ပါလက်စတိုင်းနိုင်ငံ ထူထောင်ရေးမူကို အမေရိကန်အပါအ၀င် နိုင်ငံတကာက လက်ခံထားပေမယ့် ၂၀၁၇ ခုနှစ် ဒီဇင်ဘာမှာ အမေရိကန်သမ္မတ ဒေါ်နယ်ထရမ့်က ဂျေရုစလင်ကို အစ္စရေးမြို့တော်အဖြစ် အသိအမှတ်ပြုကြောင်း
ကြေငြာခဲ့ပါတယ်။ ၂၀၁၈ ခုနှစ် မေလမှာတော့ အစ္စရေးက အမေရိကန်သံရုံးကို တလ်အဗီးကနေ ဂျေရုစလင်ကို ပြောင်းရွှေ့ခဲ့ပါတယ်။

နောက်ပိုင်းမှာ ဂွာတီမာလာနိုင်ငံကလည်း သူတို့ရဲ့သံရုံးကို ဂျေရုစလင်မြို့မှာ ပြောင်းရွှေ့ဖွင့်လှစ်ခဲ့ပါတယ်။

“ကိုယ့်ကံကြမ္မာကို ကိုယ်တိုင် ဖန်တီးခွင့်၊ လွတ်လပ်ပြီး အချုပ်အခြာပိုင်တဲ့ နိုင်ငံတစ်ခုတည်ဆောက်ခွင့်တို့အပါအ၀င် ပါလက်စတိုင်းဟာ သူတို့ရဲ့ ရသင့်ရထိုက်တဲ့ အခွင့်အရေးကို ရယူပိုင်ခွင့်ရှိပါတယ်” လို့ OIC ရဲ့ ကြေငြာချက်မှာ ဖော်ပြထားပါတယ်။

အမေရိကန်ဟာ ပါလက်စတိုင်း-အစ္စရေး ပြဿနာအတွက် အဆိုပြုချက်တစ်ခုကို အခုလနှောင်းပိုင်းမှာ ထုတ်ပြန်ဖို့ ရှိနေပါတယ်။ ဒီအဆိုပြုချက်မှာ လွတ်လပ်တဲ့ ပါလက်စတိုင်းနိုင်ငံတစ်ခု ပေါ်ပေါက်လာရေးကိစ္စ ပါဝင်မှာမဟုတ်ဘူးလို့ သတင်းတွေ ကျယ်ကျယ်ပြန့်ပြန့် ထွက်ပေါ်နေပါတယ်။

ဂျေရုစလင်ကို အစ္စရေးမြို့တော်အဖြစ် အသိအမှတ်ပြုကြောင်း ကြေငြာခဲ့ပြီးတဲ့နောက် အမေရိကန်ဟာ ဒီကိစ္စမှာ သမာသမတ်ကျတဲ့ ကြားဝင်ဆောင်ရွက်ပေးသူ ဖြစ်လာမှာ မဟုတ်တော့ဘူးလို့ ပါလက်စတိုင်းဖက်က ပြောကြားထားပါတယ်။

Ref: Aljazeera