လိုင်စင်မရှိဘဲ ၀က်ဝံမွေးသည့် အမျိုးသမီးအဆိုတော်ကို မလေးရှား ဖမ်းဆီးစစ်ဆေး

ဇွန် ၈၊ ၂၀၁၉
M-Media

-၀က်ဝံတစ်ကောင်ကို တရားဝင်လိုင်စင် ရယူထားခြင်းမရှိဘဲ အိမ်မှာမွေးထားတဲ့ အသက် ၂၇ နှစ်အရွယ် အမျိုးသမီး အဆိုတော်တစ်ဦးကို ဖမ်းဆီးပြီး စစ်ဆေးနေတယ်လို့ မလေးရှားအာဏာပိုင်တွေက ဒီကနေ့မှာ ထုတ်ပြန်ခဲ့ပါတယ်။

အဲဒီအဆိုတော်ဟာ ကွာလာလမ်ပူမြို့က သူနေတဲ့ ကွန်ဒိုတိုက်ခန်းတစ်ခုမှာ ၀က်ဝံကို မွေးထားတာပါ။ ပြတင်းပေါက်ကနေ ခေါင်းပြူထွက်ကြည့်တဲ့ ၀က်ဝံကို ပတ်ဝန်းကျင်ကပြည်သူတွေ တွေ့ကာ ဗီဒီယိုရိုက်ပြီး ဆိုရှယ်မီဒီယာ လွှင့်တင်တာကနေတစ်ဆင့် ဒီကိစ္စ ပြန့်နှံ့သွားခဲ့တာ ဖြစ်ပါတယ်။

မလေးရှား သားရိုင်းတိရစ္ဆာန်နှင့် နိုင်ငံတော်ပန်းခြံများဌာနက ညွှန်ကြားရေးမှူး အဘ်ဒူလ် ကာဒရ် အဘူ ဟာရှင်က လူထုရဲ့ သတင်းပေးမှုကြောင့် ဒီကိစ္စကို သိရှိကာ တိုက်ခန်းအတွင်း ၀င်ရောက်စီးနင်းရာမှာ ၀က်ဝံကို ပိုင်ဆိုင်တယ်ဆိုတဲ့ တရားဝင်အထောက်အထား မတွေ့ရကြောင်း၊ မွေးထားတဲ့ အမျိုးသမီးဟာ အဆိုတော်ဖြစ်ပြီး မျိုးတုန်းမည့်တိရစ္ဆာန်ဆိုင်ရာ ဥပဒေနဲ့ ဖမ်းဆီးစစ်ဆေးနေကြောင်း ပြောကြားခဲ့ပါတယ်။ အဆိုတော်ရဲ့ အမည်ကိုတော့ ထုတ်ဖော်ပြောဆိုခြင်း မရှိပါဘူး။

အရှေ့တောင်အာရှမှာ အတွေ့များတဲ့ Sun Bear မျိုးနွယ်ဝင် အဲဒီ ၀က်ဝံဟာ အသက် ၆ လအရွယ် ရှိပြီး လက်ရှိမှာတော့ သားရိုင်းတိရစ္ဆာန်ဌာနက ထိန်းသိမ်းစောင့်ရှောက်ထားပါတယ်။

Ref: CNA