ရုရှားနှင့် စစ်ဖက်ဆက်ဆံရေး တိုးမြှင့်မည်ဟု ပါကစ္စတန်ပြော

ဇွန် ၁၃၊ ၂၀၁၉
M-Media

-ပြောင်းလဲလာတဲ့ ကမ္ဘ္ဘာကြီးမှာ ရုရှားနဲ့ ပိုမိုနီးနီးကပ်ကပ် ဆက်ဆံဖို့ လိုအပ်လာပြီး နှစ်နိုင်ငံ စစ်ဖက်ဆက်ဆံရေးကို တိုးမြှင့်သွားမယ်လို့ ပါကစ္စတန် ၀န်ကြီးချုပ် အင်မရန်းခန်းက ပြောကြားလိုက်ပါတယ်။

ပါကစ္စတန်ဟာ စစ်ဖက်ရေးရာမှာ အနောက်နိုင်ငံတွေနဲ့ တရုတ်နိုင်ငံကို မှီခိုနေရပေမယ့် ပြီးခဲ့တဲ့ နှစ်အနည်းငယ်ကစလို့ ရုရှားရဲ့ လက်နက်တွေအပေါ် စိတ်ဝင်စားမှု ပိုမိုမြင့်တက်လာခဲ့ပါတယ်။ Sukhoi Su-35 နဲ့ Mi-35M တို့ အပါအ၀င် ရုရှားထံကနေ တိုက်လေယာဉ်တွေ၊ ရဟတ်ယာဉ်တွေ တော်တော်များများ ၀ယ်ယူဖို့ ပါကစ္စတန်က ဆောင်ရွက်နေတယ်လို့လည်း သတင်းတွေထွက်ခဲ့ပါတယ်။

အင်မရန်းခန်းက ရုရှားထံကနေ စစ်လက်နက်တွေ ၀ယ်ယူဖို့၊ စစ်ဖက်ဆက်ဆံရေး တိုးတက်အောင် ဆောင်ရွက်ဖို့ ရှိတယ်လို့ Sputnik သတင်းဌာနနဲ့ အင်တာဗျူးမှာ ပြောကြားခဲ့ပါတယ်။

“ဟုတ်ပါတယ်။ ကျွန်တော်တို့ ရုရှားထံကနေ လက်နက်တွေ ၀ယ်ယူဖို့ ရှိနေပါတယ်။ ကျွန်တော်တို့ စစ်တပ်နဲ့ ရုရှားစစ်တပ်တို့ကလည်း ထိတွေ့ဆက်ဆံမှုတွေ ရှိပါတယ်”

ပါကစ္စတန်ဟာ ရုရှားရဲ့ စစ်ရေးလေ့ကျင့်မှု တော်တော်များများမှာ ပါဝင်နေပြီး ပါကစ္စတန် စစ်ဖက်အရာရှိ တစ်ချို့ကိုလည်း ရုရှားက လေ့ကျင့်သင်ကြားပေးတာတွေ ရှိနေပါတယ်။

၁၉၇၉ နှစ်ကနေ ၁၉၈၉ နှစ်အထိ အာဖဂန်နစ္စတန်ကို ဆိုဗီယက်တပ်တွေက ကျူးကျော်သိမ်းပိုက်မှုအတွင်း ပါကစ္စတန်နဲ့ ဆိုဗီယက်တို့ဟာ ရန်ဖက်တွေ ဖြစ်ခဲ့ပေမယ့် လက်ရှိမှာတော့ ကမ္ဘ္ဘာကြီးက ပြောင်းလဲနေပြီလို့ အင်မရန်းခန်းက ထည့်သွင်းပြောဆိုခဲ့ပါတယ်။

“ရုရှားရဲ့ ပိုပြီး နီးနီးကပ်ကပ် ဆက်ဆံနိုင်တဲ့အတွက် ပျော်ရွှင်မိပါတယ်”

အရင်က အမေရိကန်ကိုသာ အဓိကမဟာမိတ်၊ ကုန်သွယ်ရေး မိတ်ဖက်အဖြစ် ယူဆခဲ့ပေမယ့်၊ အခုအချိန်မှာတော့ Belt and Road စီမံကိန်းကို အကောင်အထည်ဖော်နေတဲ့ တရုတ်ကိုလည်း အာရုံစိုက်လာရတယ်လို့ အင်မရန်းခန်းက ပြောပါတယ်။

Ref: RT