လိုက်ချီးသီး အဆိပ်သင့်မှုကြောင့် အိန္ဒိယပြည်နယ်တစ်ခုတွင် သေဆုံးသူ ၁၀၀ ကျော်လာ

ဇွန် ၁၈၊ ၂၀၁၉
M-Media

-အိန္ဒိယနိုင်ငံ မြောက်ပိုင်း ဘီဟာရ်ပြည်နယ်မှာ လိုက်ချီးသီးကနေ ဖြစ်ပွားတဲ့ အဆိပ်ကြောင့် ဦးနှောက် ရောင်ယမ်းမှုဖြစ်ပြီး သေဆုံးသူ ကလေးငယ် အရေအတွက်ဟာ ၁၀၀ ကျော်လာခဲ့ကာ တိုင်းပြည်ရဲ့ အဆိုးဝါးဆုံး ကျန်းမာရေးပြဿနာတစ်ခုအသွင် ဆောင်လာပါတယ်။

Acute Encephalitis Syndrome (AES) လို့ခေါ်တဲ့ ဦးနှောက်ရောင်ယမ်းတဲ့ရောဂါဟာ ဘီဟာရ်ပြည်နယ်မှာ ဇွန်လ အစောပိုင်းကတည်းက စတင်ဖြစ်ပွားခဲ့တာပါ။ အရင်က ပြုလုပ်ထားတဲ့ လေ့လာဆန်းစစ်မှုတွေအရ AES ရောဂါဟာ လိုက်ချီးသီးမှာ ပါဝင်တဲ့ အဆိပ်ဓာတ်တစ်မျိုးကြောင့် ဖြစ်တယ်ဆိုတာကို တွေ့ရပါတယ်။

လိုက်ချီးသီးကို စားသုံးပြီးတဲ့နောက် အဲဒီအဆိပ်ဓာတ်ဟာ အသည်းမှာ သွားစုနေပြီး အပူချိန် အလွန်မြင့်တက်လာတဲ့အခါမှာ ဦးနှောက်အထိ ပြန့်နှံ့ကာ နောက်ဆုံး သေဆုံးတဲ့အထိ ဖြစ်လာတာ ဖြစ်ပါတယ်။ ဘီဟာရ်ပြည်နယ်ဟာ အိန္ဒိယနိုင်ငံမှာ လိုက်ချီးသီးကို အဓိကထား စိုက်ပျိုးတဲ့ဒေသ ဖြစ်ပါတယ်။

အိန္ဒိယကျန်းမာရေးဝန်ရှိသူတွေက ပြည်နယ်အတွင်း မိဘတွေဟာ ကလေးငယ်တွေကို ထမင်းထက် လိုက်ချီးသီးကို ပိုမို ကျွေးလေ့ရှိတယ်လို့ ပြောကြားခဲ့ပါတယ်။

ဘီဟာရ်ပြည်နယ်မှာ AES ကြောင့် သေဆုံးသူအရေအတွက်က ၁၀၅ ဦးအထိ ရှိလာခဲ့ပါတယ်။ ဒီလို အဖြစ်အပျက်မျိုးဟာ အပူချိန်မြင့်တက်ပြီး လိုက်ချီးသီးတွေ ပေါ်တဲ့ အချိန်မျိုးမှာ နှစ်စဉ် ဖြစ်ပွားတတ်ပါတယ်။ ၂၀၁၄ ခုနှစ်တုန်းကလည်း အကြီးအကျယ် ဖြစ်ပွားခဲ့ပြီး လူ ၁၅၀ သေဆုံးခဲ့ပါတယ်။ လိုက်ချီးသီး စိုက်ပျိုးလေ့ရှိတဲ့ ဘင်္ဂလားဒေ့ရ်ှနဲ့ ဗီယက်နမ်နိုင်ငံတို့မှာလည်း AES ရောဂါ ဖြစ်ပွားပြီး သေဆုံးမှုတွေ ဖြစ်လေ့ရှိပါတယ်။

နိုင်ငံရဲ့ အဆင်းရဲဆုံး ပြည်နယ်ထဲမှာ ပါဝင်ပြီး လူဦးရေ သန်းပေါင်း ၁၀၀ လောက်ရှိတဲ့ ဘီဟာရ်ပြည်နယ်မှာ အပူလှိုင်းဖြတ်မှုလည်း ဖြစ်ပွားနေပြီး အပူဒဏ်ကြောင့် သေဆုံးသူကလည်း ၈၀ နီးပါးအထိ ရှိလာပါတယ်။

Ref: Aljazeera