ရခိုင်ရှိ ကုလအကူအညီများ ရုပ်သိမ်းမည်ဆိုသည့်သတင်းကို မြန်မာအစိုးရ ငြင်းဆို

ဇွန် ၁၉၊ ၂၀၁၉
M-Media

-ရခိုင်ပြည်နယ်မှာ လုပ်ဆောင်နေတဲ့ အကူအညီပေးမှုတွေကို ကုလက ရုပ်သိမ်းတော့မယ်ဆိုတဲ့ သတင်းတွေဟာ မမှန်ကန်ဘူးလို့ မြန်မာအစိုးရ တာဝန်ရှိသူတွေက ပြောကြားလိုက်ပါတယ်။

ရိုဟင်ဂျာမွတ်စလင်တွေအပေါ် ခွဲခြားထားတဲ့ လုပ်ရပ်တွေ ရှိနေပြီး ဒါတွေကို သိသိသာသာ ပြောင်းလဲမှု မလုပ်ပေးရင် မရှိမဖြစ် ထောက်ပံ့မှုတွေကလွဲလို့ အခြား အကူအညီတွေ ပြန်ရုပ်သိမ်းမယ်လို့ ကုလရဲ့ လူသားချင်း စာနာထောက်ထားမှုဆိုင်ရာ ညှိနှိုင်းဆွေးနွေးရေးမှူး ကနု အော့စဘီက မြန်မာအစိုးရထံ စာပို့ ပြောကြားခဲ့တယ်လို့ Gurdian သတင်းစာက ပြီးခဲ့တဲ့ ရက်ပိုင်းမှာ ဖော်ပြခဲ့တာပါ။

ဒါပေမယ့် မြန်မာအစိုးရရဲ့ လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေးဝန်ကြီး ဒေါက်တာ ၀င်းမြတ်အေးက ညှိနှိုင်းရေးမှူး အော်စဘီရဲ့စာကို ၀န်ကြီးဌာနက လက်ခံရရှိခဲ့ပြီး စာထဲမှာ အကူအညီ ရုပ်သိမ်းမယ်ဆိုတဲ့ ပြောကြားချက် မပါဝင်ဘူးလို့ ဇွန်လ ၁၇ ရက်နေ့က CNA သတင်းဌာနကို ပြောကြားခဲ့ပါတယ်။

“ကုလက အကူအညီတွေ ရုပ်သိမ်းမယ်ဆိုတဲ့ ပြောကြားမှု တစ်ခုမှ မပါဝင်ပါဘူး”

အိုးအိမ်စွန့်ခွာ ထွက်ပြေးရသူတွေ နေထိုင်ရတဲ့ စခန်းတွေ ပိတ်သိမ်းရေး၊ နိုင်ငံတကာ အကူအညီပေးရေးအဖွဲ့တွေက ကူညီပေးနိုင်ရေး အစိုးရက ဆောင်ရွက်ထားတဲ့ မဟာဗျူဟာရဲ့ တိုးတက်မှုတွေကို ကုလက သဘောကျနေတယ်လို့လည်း ၀န်ကြီးက ထည့်သွင်း ပြောကြားခဲ့ပါတယ်။

စခန်းတွေမှာ နေထိုင်နေရသူတွေ နေရပ်ပြန်နိုင်ရေး မဟာဗျူဟာကို အပြီးသတ်နိုင်တဲ့အထိ စခန်းပိတ်သိမ်းရေးကိစ္စကို ရပ်ဆိုင်းထားဖို့နဲ့ ဒီကိစ္စအတွက် တွေ့ဆုံဆွေးနွေးဖို့အတွက် ကုလက တောင်းဆိုထားတယ်လို့ ၀န်ကြီးက ဆိုပါတယ်။

“မြန်မာနိုင်ငံမှာရှိတဲ့ နေရပ်စွန့်ခွာ ထွက်ပြေးရသူတွေအားလုံး ပိုမိုကောင်းမွန်တဲ့ဘ၀ ရရှိရေး ကုလ အဖွဲ့တွေနဲ့ ကျွန်တော်တို့ ၀န်ကြီးဌာန ပူးပေါင်းဆောင်ရွက်နေပါတယ်။ စခန်းတွေ ပိတ်သိမ်းရေးကိစ္စနဲ့ မဟာဗျူဟာကို အပြီးသတ်နိုင်ရေးကိစ္စတွေအတွက် ဆွေးနွေးဖို့လည်း မစ္စတာ ကနု အော့စဘီရဲ့ရုံးကို ဆက်သွယ်ထားပါတယ်”

ရခိုင်ပြည်နယ်မှာ အကူအညီပေးရေးကိစ္စနဲ့ပတ်သက်လို့ ညှိနှိုင်းဆွေးနွေးရေးမှူး အော့စဘီက မြန်မာအစိုးရထံ စာပို့ခဲ့တယ်ဆိုတာကို ကုလ ပြောရေးဆိုခွင့်ရှိသူတစ်ဦးက အတည်ပြုခဲ့ပေမယ့် အသေးစိတ်ကိုတော့ ပြောကြားခဲ့ခြင်း မရှိပါဘူး။

ရခိုင်ပြည်နယ်အလယ်ပိုင်းက ဒုက္ခသည်စခန်းတွေကိစ္စမှာ ရေရှည်တည်တံ့တဲ့အဖြေ ထွက်လာရေး နိုင်ငံတကာ စံချိန်၊ စံညွှန်းနဲ့အညီ မြန်မာအစိုးရနဲ့ ပူးပေါင်းဆောင်ရွက်မယ့် ကုလရဲ့ သဘောထားကို ထပ်လောင်းပြောကြားလိုတယ်လို့ အော့စဘီက တနင်္လာနေ့ Twitter စာမျက်နှာ ရေးသား လွှင်တင်ခဲ့ပါတယ်။

Ref: CNA