အီရန်ကို တိုက်ခိုက်ရန် ထရမ့်က ခွင့်ပြုခဲ့သော်လည်း နောက်ပိုင်းတွင် စစ်ဆင်ရေးကို ရပ်ဆိုင်း

ဇွန် ၂၁၊ ၂၀၁၉
M-Media

-မောင်းသူမဲ့ လေယာဉ်တစ်စင်း ပစ်ချခံရမှုအတွက် အီရန်ကို စစ်ရေးအရ လက်တုန့်ပြန်ဖို့ အမေရိကန်အစိုးရက အတည်ပြုခဲ့ပေမယ့် နောက်ပိုင်းမှာ တိုက်ခိုက်ဖို့ကိစ္စကို ရပ်ဆိုင်းလိုက်တယ်လို့ အမေရိကန်မီဒီယာတွေက ဒီကနေ့မှာ ဖော်ပြကြပါတယ်။

အီရန်ရဲ့ ရေဒါစနစ်၊ ဒုံးပစ်လောင်ချာတွေအပါအ၀င် ပစ်မှတ်တစ်ချို့ကို တိုက်ခိုက်ဖို့အတွက်
သမ္မတဒေါ်နယ်ထရမ့်က ကြာသာပတေးနေ့ မနက်ပိုင်းမှာ ခွင့်ပြုခဲ့ပေမယ့် ညနေပိုင်းမှာ ရပ်ဆိုင်းခိုင်းခဲ့တယ်လို့ အိမ်ဖြူတော် တာဝန်ရှိသူတစ်ဦးက New York Times သတင်းစာကို ပြောကြားခဲ့ပါတယ်။

တိုက်ခိုက်ဖို့အတွက် အမေရိကန် တိုက်လေယာဉ်တစ်ချို့ လေထဲကို ပျံတက်သွားပြီး၊ စစ်ရေယာဉ်တွေကလည်း နေရာယူပြီးသွားချိန်မှာ ရပ်ဆိုင်းဖို့အမိန့် ရောက်လာတာဖြစ်တယ်လို့လည်း အခြားရစ်မြစ်တစ်ခုက ပြောပါတယ်။

နိုင်ငံတောင်ပိုင်းက လေပိုင်နက်ထဲကို ၀င်လာတဲ့ အမေရိကန် ဒရုန်းလေယာဉ်တစ်စင်းကို မြေပြင်က ဝေဟင်ပစ် ဒုံးကျည်နဲ့ ပစ်ချခဲ့တယ်လို့ အီရန်က ကြာသာပတေးနေ့မှာ ထုတ်ပြန်ခဲ့ပြီး အမေရိကန်ကလည်း ဒီသတင်းကို နောက်ပိုင်းမှာ အတည်ပြုခဲ့ပါတယ်။ ဒါပေမယ့် ဒရုန်းဟာ အီရန်လေပိုင်နက်ထဲ မရောက်သေးဘဲ နိုင်ငံတကာလေပိုင်နက်ထဲမှာပဲ ရှိနေခဲ့တယ်လို့ အမေရိကန်က ထုတ်ပြန်ခဲ့ပါတယ်။

ထရမ့်က အီရန်ပစ်မှတ်တွေကို တိုက်ခိုက်ဖို့ ခွင့်ပြုခဲ့တယ်ဆိုတဲ့သတင်းကို Washington Post နဲ့ ABC သတင်းဌာနတွေကလည်း အိမ်ဖြူတော်နဲ့ အမေရိကန်အစိုးရ တာဝန်ရှိသူတွေကို ကိုးကားပြီး ဖော်ပြခဲ့ပါတယ်။ အိမ်ဖြူတော်ကတော့ ဒီသတင်းအတွက် မှတ်ချက်ပေးဖို့ ငြင်းဆိုပါတယ်။

စစ်ရေးအရ တိုက်ခိုက်မှုတွေ ပြုလုပ်တော့မယ်ဆိုတဲ့ သတင်းစကားကို အိုမန်ကနေတစ်ဆင့် အမေရိကန်က အီရန်ကို အကြောင်းကြားခဲ့ကြောင်း၊ ဒီကိစ္စအတွက် အမြန်ဆုံး ဆွေးနွေးချင်တယ်လို့ ထရမ့်က ပြောကြားခဲ့ကြောင်း အီရန်တာဝန်ရှိသူတွေကို ကိုးကားပြီး Reuters သတင်းဌာနက မနေ့မှာ ဖော်ပြခဲ့ပါတယ်။ ထရမ့်က အမေရိကန်ဟာ အီရန်နဲ့ စစ်မဖြစ်ချင်ဘဲ ကိစ္စရပ်အများအပြားကို တွေ့ဆုံဆွေးနွေးမှုနဲ့သာ အဖြေရှာချင်ကြောင်း၊ ဒီအတွက် အဖြေပြန်ပေးဖို့ အီရန်အစိုးရကို အချိန်တစ်ခုပေးထားကြောင်း အမည်မဖော်လိုတဲ့ အီရန်အစိုးရ တာဝန်ရှိသူတစ်ဦးက Reuters သတင်းဌာနကို ပြောကြားခဲ့ပါတယ်။

ဒါပေမယ့် Reuters ရဲ့ ဒီသတင်းကို အီရန်က နောက်ပိုင်းမှာ ငြင်းဆိုခဲ့ပါတယ်။

Ref: Aljazeera