AA ထောက်ခံသူများကို ပြည်နှင်ဒဏ်ပေးမည်ဟု စင်ကာပူ ကြေငြာ

ဇူလိုင် ၁၁၊ ၂၀၁၉
M-Media

-ရခိုင်လက်နက်ကိုင်အဖွဲ့ AA အတွက် လော်ဘီလုပ်နေတဲ့ မြန်မာနိုင်ငံသားအချို့ကို နေရပ်ပြန်ပို့မယ်လို့ စင်ကာပူ ပြည်ထဲရေးဝန်ကြီးဌာနက မနေ့မှာ ကြေငြာလိုက်ပြီး နိုင်ငံခြားသားတွေအနေနဲ့ သူတို့နိုင်ငံက နိုင်ငံရေးပဋိပက္ခတွေကို စင်ကာပူနိုင်ငံအထိ မသယ်လာကြဖို့လည်း
သတိပေးလိုက်ပါတယ်။

AA ခေါင်းဆောင် ထွန်းမြတ်နိုင်ရဲ့ညီ၊ ရခိုင်အသင်း (စင်ကာပူ) က အဖွဲ့ဝင်တစ်ချို့အပါအ၀င် လူ ၆ ဦးကို AA နဲ့ ဆက်စပ်မှုအတွက် စင်ကာပူအာဏာပိုင်တွေက ဖမ်းဆီးခဲ့တယ်လို့ ဧရာဝတီသတင်းဌာနက မနေ့မှာ ဖော်ပြခဲ့ပါတယ်။ စင်ကာပူပြည်ထဲရေးဝန်ကြီးဌာန MHA က ဖမ်းဆီးမှုအရေအတွက်ကို အတိအကျ မထုတ်ပြန်ခဲ့ပေမယ့် စစ်ဆေးနေတဲ့သူတွေထဲက တစ်ဦးဟာ ‘AA ခေါင်းဆောင်နဲ့ တိုက်ရိုက်အဆက်အသွယ်ရှိတယ်’ လို့ ဆိုပါတယ်။

အဲဒီအမျိုးသားဟာ စင်ကာပူရောက် ရခိုင်တွေ AA ကို ထောက်ခံလာရေး တက်တက်ကြွကြွလှုံ့ဆော်တာတွေ၊ AA ကို ထောက်ပံ့ပေးနိုင်ဖို့ ရန်ပုံငွေကောက်တာတွေ လုပ်တဲ့အပြင်၊ ရခိုင်အသင်း(စင်ကာပူကလည်း) AA နဲ့ သူတို့ရဲ့ နိုင်ငံရေးအဖွဲ့ ULA ကို ရခိုင်လူ့အဖွဲ့အစည်းက ထောက်ခံလာအောင် စည်းရုံးမှုတွေ ရှိတယ်လို့ စင်ကာပူ ပြည်ထဲရေးဝန်ကြီးဌာနက ထုတ်ပြန်တဲ့ ကြေငြာချက်မှာ ဖော်ပြထားပါတယ်။

မြန်မာအစိုးရက AA ကို အကြမ်းဖက်အဖွဲ့အစည်းအဖြစ် သတ်မှတ်ထားတာပါ။

စင်ကာပူရောက် ရခိုင်တစ်ချို့ဟာ AA ကို ဘဏ္ဍာရေးထောက်ပံ့မှုတွေ လုပ်ဆောင်နေပြီး တစ်ဦးဆိုရင် လတိုင်း အလှူငွေထည့်ကြောင်း၊ လူမှုရေးအခမ်းအနားတွေကို အသုံးပြုပြီး AA အတွက် ဝါဒဖြန့်တာတွေ၊ ‘အဖနိုင်ငံတော်’ ကိုထောက်ခံလာအောင် စည်းရုံးတာတွေ လုပ်ကြကြောင်း
စင်ကာပူပြည်ထဲရေးဝန်ကြီးဌာနက ထည့်သွင်းပြောကြားခဲ့ပါတယ်။

AA နဲ့ ULA တည်ထောင်မှု ၁၀ နှစ်ပြည့်အခမ်းအနားကို စင်ကာပူရောက် ရခိုင်တိုင်းရင်းသားတွေက ကျင်းပခဲ့ပြီး AA တံဆိပ်ပါတဲ့ အင်္ကျီတွေကို ၀တ်ဆင်တာ၊ မြန်မာစစ်တပ်က ရခိုင်ပြည်နယ်မှာ ပြုလုပ်တဲ့ စစ်ဆင်ရေးတွေကို သရုပ်ဖော်တဲ့ ပြကွက်တွေ လုပ်ဆောင်ခဲ့တာတွေကိုလည်း
မြင်တွေ့ခဲ့ရကြောင်း MHA ရဲ့ ကြေငြာချက်မှာ ဖော်ပြထားပါတယ်။

သတိပေး

နိုင်ငံခြားသားတွေအနေနဲ့ သူတို့ရဲ့ နိုင်ငံရေးပြဿနာတွေကို စင်ကာပူနိုင်ငံထဲ ယူဆောင်မလာဖို့လည်း စင်ကာပူ ပြည်ထဲရေးဝန်ကြီးဌာနရဲ့ ကြေငြာချက်မှာ သတိပေးထားပါတယ်။

“လက်နက်ကိုင်အကြမ်းဖက်မှုကို ထောက်ခံတဲ့၊ ပံ့ပိုးတဲ့၊ ဆောင်ရွက်တဲ့ ဒါမှမဟုတ် ပြင်ဆင်ပေးတဲ့ ဘယ်သူ့ကိုမဆို စင်ကာပူက အထူးစောင့်ကြည့်သွားမှာပါ။ တိုက်ခိုက်မှုအတွက် ဘယ်လို အကြောင်းချက်မျိုးပေးပေး၊ တိုက်ခိုက်မှု ဘယ်မှာပဲဖြစ်ဖြစ် စင်ကာပူက လစ်လျူရှုမှာ မဟုတ်ပါဘူး။ စင်ကာပူရဲ့ နိုင်ငံတော်လုံခြုံရေးကို အန္တရာယ်ရှိစေနိုင်တဲ့ ဒီလိုလုပ်ရပ်မျိုးမှာ ပါဝင်ရင် နိုင်ငံသားဖြစ်ဖြစ်၊ နိုင်ငံခြားသားဖြစ်ဖြစ် ပြင်းပြင်းထန်ထန် အရေးယူဆောင်ရွက်မှာ ဖြစ်ပါတယ်”

စင်ကာပူမှာရှိနေတဲ့ မြန်မာနိုင်ငံသားအများစုဟာ ဥပဒေကို လိုက်နာပြီး စင်ကာပူနိုင်ငံအတွက် အကူအညီပေးနေကြောင်း၊ လူတစ်ချို့ရဲ့ လုပ်ရပ်အတွက် သဟဇာတဖြစ်စွာ နေထိုင်နေတဲ့ ကျန်တဲ့လူများစုကို မထိခိုက်စေဖို့ သတိထားဆောင်ရွက်ရမှာဖြစ်ကြောင်းလည်း MHA ရဲ့ ကြေငြာချက်မှာ ဖော်ပြထားပါတယ်။

Ref: CNA