ထိုင်းနိုင်ငံ ဘန်ကောက်မြို့တွင် ဗုံးအသေးစား ၆ လုံး ပေါက်ကွဲ

သြဂုတ် ၂၊ ၂၀၁၉
M-Media

-ထိုင်းနိုင်ငံ မြို့တော်ဘန်ကောက်က နေရာ ၆ နေရာမှာ ဒီကနေ့မနက်ပိုင်းက ဗုံးအငယ်စား ပေါက်ကွဲမှုတွေ ဖြစ်ခဲ့ပြီး အမေရိကန်၊ တရုတ်နဲ့ အရှေ့တောင်အာရှနိုင်ငံတွေက ထိပ်တန်း သံတမန်တွေပါဝင်တဲ့ အာဆီယံ လုံခြုံရေးအစည်းအဝေး ကျင်းပနေချိန် တိုက်တိုက်ဆိုင်ဆိုင် ဖြစ်ပွားခဲ့တာ ဖြစ်ပါတယ်။

ဒေသစံတော်ချိန် မနက် ၉ နာရီမတိုင်ခင် ဘန်ကောက်မြို့လယ်ကောင်က နေရာနှစ်ခုမှာ ပထမဆုံး ပေါက်ကွဲခဲ့တာဖြစ်ပြီး နောက်ပိုင်းမှာတော့ အစိုးရ၀န်ကြီးဌာနတွေတည်ရှိရာ မြို့မြောက်ပိုင်းက အဆောက်အဦးနားမှာ ဆက်တိုက် ပေါက်ကွဲခဲ့ပါတယ်။ ပေါက်ကွဲမှုတွေကြောင့် သန့်ရှင်းရေးဝန်ထမ်း ၃ ဦးအပါအ၀င် ၄ ဦး ဒဏ်ရာရရှိခဲ့ပါတယ်။

ပေါက်ကွဲမှုဖြစ်ပွားရာ နေရာက တစ်ချို့အဆောက်အဦးတွေရဲ့ ပြတင်းပေါက်မှန်တွေ အက်ကွဲခဲ့ပါတယ်။

ထိုင်းရဲတပ်ဖွဲ့က တာဝန်ရှိသူ ကာနယ် Kamtorn Uicharoen က နေရာ ၆ ခုမှာ ဗုံး တွေ ပေါက်ကွဲခဲ့ပြီး တစ်နေရာမှာတော့ မပေါက်ကွဲခင် ရှင်းလင်းနိုင်ခဲ့ကြောင်း၊ ဗုံးတွေဟာ လက်လုပ်ချိန်ကိုက်ဗုံးတွေဖြစ်ကြောင်း ရိုက်တာသတင်းဌာနကို ပြောကြားခဲ့ပါတယ်။

ဗုံးတွေဟာ ‘ပင်ပေါင်ဗုံး’ လို့ခေါ်တဲ့ တင်းနစ်ဘောလုံးအရွယ်တွေဖြစ်ပြီး ထိခိုက်ဒဏ်ရာရဖို့ မရွယ်ရည်ဘဲ၊ ဒေသတွင်း လုံခြုံရေးဆိုင်ရာ အစည်းအဝေးရှိနေတဲ့အချိန် အစိုးရကို အရှက်ရစေဖို့ ရည်ရွယ်လုပ်ဆောင်မှု ဖြစ်ပုံရကြောင်း နိုင်ငံရေး ကျွမ်းကျင်သူတွေက သုံးသပ်ကြပါတယ်။

ထိုင်းဝန်ကြီးချုပ် ပရာယွတ် ချန်အိုချာကတော့ ပေါက်ကွဲမှုတွေကို ရှုတ်ချခဲ့ပြီး စုံစမ်းစစ်ဆေးရေ လုပ်ဆောင်ဖို့ အမိန့်ပေးထားပါတယ်။ ဘယ်အဖွဲ့က လုပ်ဆောင်လဲဆိုတာ ရှင်းရှင်းလင်းလင်း မသိရသေးပါဘူး။

ဘန်ကောက်မှာ အရှေ့တောင်အာရှ နိုင်ငံခြားရေးဝန်ကြီးတွေ ပါဝင်တဲ့ လုံခြုံရေးဆိုင်ရာ ထိပ်သီးအစည်းအဝေးတစ်ခု ကျင်းပနေပြီး ဒီအစည်းအဝေးကို တရုတ်နိုင်ငံခြားရေးဝန် ၀မ်ယီနဲ့ အမေရိကန်နိုင်ငံခြားရေးဝန်ကြီး မိုက်ပွမ်ပီယိုတို့ တက်ရောက်ကြပါတယ်။

ထိုင်းနိုင်ငံခြားရေး ၀န်ကြီးဌာနက တာဝန်ရှိသူ Arthayudh Srisamoot က ပေါက်ကွဲမှုတွေကြောင့် အစည်းအဝေးပေါ် ဘယ်လိုထိခိုက်မှုမှ ရှိမှာမဟုတ်ဘူးလို့ ပြောကြားခဲ့ပါတယ်။

Ref: CNA