အာရှတွင် နျူဒုံးကျည် ချထားရန် အမေရိကန် အစီအစဉ်ရှိ

သြဂုတ် ၄၊ ၂၀၁၉
M-Media

– အာရှမှာ မြေပြင်အခြေစိုက် တာလတ်ပစ်ဒုံးကျည်တွေ ချထားဖို့ စဉ်းစားနေတယ်လို့ အမေရိကန် ကာကွယ်ရေးဝန်ကြီး မာ့ခ် အက်စ်ပါက ပြောကြားလိုက်ပြီး ရုရှားနဲ့ ချုပ်ထားတဲ့ ဒုံးကျည်ထိန်းချုပ်ရေးစာချုပ် ပျက်ပြယ်သွားပြီးနောက်ပိုင်း ဒီမှတ်ချက် ပေါ်ထွက်လာတာ ဖြစ်ပါတယ်။

ရုရှားနဲ့ အမေရိကန်တို့အကြား နှစ် ၃၀ ကျော်လောက် တည်တံ့ခဲ့တဲ့ နျူထိပ်ဖူးတပ် တာလတ်ပစ်ဒုံးကျည် ထိန်းချုပ်ရေးစာချုပ် INF ဟာ ပြီးခဲ့တဲ့တစ်ပတ်မှာ ပျက်ပြယ်သွားခဲ့ပြီး အင်အားကြီးနိုင်ငံတွေ အထူးသဖြင့် အမေရိကန်၊ တရုတ်နဲ့ ရုရှားတို့အကြား လက်နက်ပြိုင်ဆိုင်မှု ပြင်းထန်လာနိုင်တယ်ဆိုတဲ့ စိုးရိမ်မှုတွေလည်း မြင့်တက်လာခဲ့ပါတယ်။

INF စာချုပ်အလွန် အာရှမှာ တာလတ်ပစ်ဒုံးကျည်တွေ ချထားမလားလို့ သြစတေးလျရောက်နေတဲ့ အက်စ်ပါကို သတင်းထောက်တွေက မနေ့က မေးမြန်းရာမှာ ‘သိပ်မကြာခင် ချထားချင်တယ်’ လို့ ဖြေကြားခဲ့ပါတယ်။

“မြန်မြန်ဆန်ဆန် ချထားချင်ပါတယ်။ လပိုင်းအတွင်း ဖြစ်လာနိုင်ပေမ့် ဒီထက်လည်း ပိုကြာနိုင်ပါတယ်”

ဘယ်နိုင်ငံတွေမှာ ဒုံးကျည်တွေ ချထားမလဲဆိုတာကိုတော့ အက်စ်ပါက ထည့်သွင်းပြောဆိုခြင်း မရှိပါဘူး။

INF စာချုပ်က နှုတ်ထွက်ကြောင်း သမ္မတထရမ့်က သောကြာနေ့မှာ ကြေငြာပြီး နာရီပိုင်းအတွင်းမှာပဲ အက်စ်ပါက စာချုပ်ကြောင့် ရပ်ထားရတဲ့ ဒုံးကျည် သုတေသနလုပ်ငန်းကို ပြန်လည်စတင်တော့မယ်လို့ ပြောကြားခဲ့ပါတယ်။

Ref: Aljazeera