မြန်မာနိုင်ငံမှ အကောင့်၊ ပေ့ခ်ျနှင့် ဂရုပ် ၂၀၀ ကျော်ကို Facebook ထပ်မံဖျက်ချ

သြဂုတ် ၂၂၊ ၂၀၁၉
M-Media

-မြန်မာနိုင်ငံက အကောင့်၊ page နဲ့ group စုစုပေါင်း ၂၀၀ ကျော်ကို ထပ်မံပိတ်ပစ်ခဲ့ပြီး ‘မသာ မာတဲ့ အပြုအမူတွေကို လုပ်ဆောင်လို့ဖြစ်တယ်’ လို့ Facebook က သြဂုတ်လ ၂၁ ရက်နေ့မှာ ထုတ်ပြန်လိုက်ပါတယ်။

ပိတ်ခံရတာတွေက Facebook အကောင့် ၈၉ ခု၊ page ၁၀၇ ခု၊ group ၁၅ ခုနဲ့ Instagram အကောင့် ၅ ခုတို့ ဖြစ်ပါတယ်။ ပိတ်ပစ်လိုက်တဲ့ page တစ်ချို့မှာ follower ၉ သိန်းလောက်ရှိပြီး၊ တစ်ချို့ group တွေမှာ member ၆၇၀၀၀ လောက်ရှိတယ်လို့ ကြေငြာချက်မှာ ဖော်ပြထားပါတယ်။ ဖျက်ခံလိုက်ရတဲ့ Instagram အကောင့်တစ်ချို့ဟာ follower ၄၀၀ လောက်ရှိတယ်လို့ ဆိုပါတယ်။

အဲဒီ page တွေကို ကန်ဒေါ်လာ ၁၂၀၀ ဖိုးလောက် အသုံးပြုကာ ကျော်ငြာထားပြီး ဒီငွေတွေကို အမေရိကန်ဒေါ်လာ၊ ရုရှား ရူဘဲလ်တို့နဲ့ ပေးချေခဲ့တယ်လို့ Facebook ရဲ့ ဆိုက်ဘာလုံခြုံရေး အကြီးအကဲ Nathaniel Gleicher က ပြောပါတယ်။

“ဒီလှုပ်ရှားမှုတွေရဲ့ နောက်ကွယ်မှာရှိတဲ့သူတွေဟာ အကောင့်အတုတွေကို အသုံးပြုပြီး လူတွေများများ ဖတ်လာအောင်၊ လူသိများလာအောင်ဆောင်ရွက်တာ၊ page တွေ၊ group တွေကို ကိုယ်တွယ်တာတွေ လုပ်ဆောင်တာပါ။ သတင်း၊ ဖျော်ဖြေရေး၊ ရာဇ၀တ်မှု၊ တိုင်းရင်းသားအရေး၊ အနုပညာအကြောင်း၊ စစ်တပ်အကြောင်းတွေကို ပုံမှန်တင်ကြပါတယ်။ ဒါတွေရဲ့နောက်ကွယ်ကလူတွေဟာ သူတို့ ဘယ်သူဘယ်ဝါဆိုတာကို ဖုံးကွယ်ဖို့ ကြိုးစားပေမယ့် စစ်တပ်နဲ့ အဆက်အသွယ်ရှိတဲ့လူတွေနဲ့ ဆက်နွယ်နေတယ်ဆိုတာကို ကျွန်တော်တို့ရဲ့ စုံစမ်းစစ်ဆေးမှုမှာ တွေ့ခဲ့ရပါတယ်”

ဒီအကောင့်တွေ၊ page တွေနဲ့ group တွေကို ပိတ်ပင်တာဟာ သူတို့တင်တဲ့ ပို့စ်တွေကြောင့်မဟုတ်ဘဲ သူတို့ရဲ့ မသမာတဲ့ သဘောထားကြောင့် ဖြစ်တယ်လို့လည်းက Facebook က ပြောပါတယ်။

“ကျွန်တော်တို့ရဲ့ ၀န်ဆောင်မှုကို အသုံးပြုပြီး လူတွေအပေါ် အမြတ်ထုတ်တာကို မလိုလားတာကြောင့် ဒီလိုကိစ္စတွေကို သိရှိ ဟန့်တားနိုင်ဖို့ ဆက်လက်လုပ်ဆောင်သွားမှာပါ”

မြန်မာနိုင်ငံက ဆိုရှယ်မီဒီယာအသိုက်အဝိုင်း အန္တရာယ်ကင်းစေဖို့အတွက် ကြိုးပမ်းလုပ်ဆောင်နေပြီး ၂၀၂၀ အထွေထွေရွေးကောက်ပွဲမှာ အမုန်းစကားတွေ၊ သတင်းအမှားတွေ ပြန့်နှံ့တာကို တားဆီးနိုင်ရေး ဆောင်ရွက်ဖို့ ပြင်ဆင်ထားတယ်လို့လည်း Facebook ရဲ့ ကြေငြာချက်မှာ ဖော်ပြထားပါတယ်။

Ref : Frontier Myanmar