အမေရိကန်မရောင်းလျှင် ရုရှားထံမှ တိုက်လေယာဉ်ဝယ်မည်ဟု တူရကီပြော

သြဂုတ် ၂၉၊ ၂၀၁၉
M-Media

-အမေရိကန်တိုက်လေယာဉ် F-35 အစား ရုရှားလုပ် Su-35 နဲ့ Su-57 တိုက်လေယာဉ်တွေကို ၀ယ်ယူနိုင်တယ်လို့ တူရကီသမ္မတ အာဒိုဂန်က ပြောကြားလိုက်ပြီး အမေရိကန်နဲ့ တူရကီတို့အကြား တင်းမာမှုတွေ ပိုမိုမြင့်တက်လာနိုင်မယ့် အခြေအနေ ဖြစ်လာပါတယ်။

ရုရှားကနေ S-400 ဒုံးခွင်းစနစ်တွေကို တူရကီက ၀ယ်ယူလိုက်တဲ့အတွက် အမေရိကန်နဲ့ တူရကီအကြား တင်းမာမှုတွေ မြင့်တက်နေပြီး တူရကီကို F-35 တိုက်လေယာဉ်တွေ ရောင်းချမှုနဲ့ လေယာဉ်မှူးတွေ လေ့ကျင့်ပေးမယ့် အစီအစဉ်တွေ ရပ်ဆိုင်းမယ်လို့ အမေရိကန်က ပြောကြားထားပါတယ်။

ရုရှားဟာ S-400 ဒုံးခွင်းစနစ် ဒုတိယအသုတ်ကို အခုတစ်ပတ်အစောပိုင်းမှာ တူရကီထံ ပေးပို့ခဲ့ပါတယ်။

အာဒိုဂန်ကတော့ အမေရိကန်တိုက်လေယာဉ်အစား၊ ရုရှားလုပ် တိုက်လေယာဉ်တွေ ၀ယ်ယူဖို့ သုံးသပ်နေတယ်လို့ ဆိုပါတယ်။

“Su-35 နဲ့ Su-57 တို့ဟာ နောက်ထပ် ရွေးချယ်စရာ ဘာ့ကြောင့် မဖြစ်နိုင်ရမှာလဲ။ ကျွန်တော် ဒီကို အကြောင်းမဲ့လာတာ မဟုတ်ပါဘူး” လို့ အခုတစ်ပတ်အစောပိုင်း မော်စကိုမှာ ရုရှားသမ္မတ ပူတင်နဲ့ တွေ့ဆုံခဲ့ပြီးတဲ့နောက် အာဒိုဂန်က ပြောကြားခဲ့ပါတယ်။

F-35 တိုက်လေယာဉ်အစီအစဉ်မှာ တူရကီရဲ့ပါဝင်မှုနဲ့ပတ်သက်ပြီး အမေရိကန်ဖက်က နောက်ဆုံးအဖြေတစ်ခု ထွက်လာရင် ရုရှားတိုက်လေယာဉ် ၀ယ်၊ မ၀ယ်ကို ဆုံးဖြတ်သွားမယ်လို့လည်း အာဒိုဂန်က ဆိုပါတယ်။

အမေရိကန် ကာကွယ်ရေးဝနကြီး မာ့ခ် အက်စပါက တူရကီအနေနဲ့ F-35 အစီအစဉ်မှာ ပြန်လည်ပါဝင်ချင်ရင် S-400 ၀ယ်ယူမှုကို စွန့်လွှတ်ရလိမ့်မယ်လို့ ထပ်လောင်းပြောကြားခဲ့ပါတယ်။

Ref: Aljazeera