စစ်တပ်က ရခိုင်ရွာသားများကို ဖမ်းဆီးထားစဉ် ကျူးလွန်မှုများအတွက် စိုးရိမ်ကြောင်း ကုလတာဝန်ရှိသူများ ထုတ်ပြန်

စက်တင်ဘာ ၄၊ ၂၀၁၉
M-Media

-ရခိုင်ပြည်နယ်မှာ ဖြစ်ပွားနေတဲ့ မတည်ငြိမ်မှုတွေအတွင်း အစိုးရစစ်တပ်ဟာ အရပ်သားတွေကို ဖမ်းဆီးထိန်းသိမ်းပြီး နှိပ်စက်တာ၊ မိသားစုနဲ့ တွေ့ခွင့်မပေးတာတွေတာ ရှိတဲ့အတွက် စိုးရိမ်မိတယ်လို့ ကုလ လူ့အခွင့်အရေးဆိုင်ရာ တာဝန်ရှိသူ ၃ ဦးက ပြောကြားလိုက်ပါတယ်။

မြန်မာနိုင်ငံရဲ့ လူ့အခွင့်အရေးဆိုင်ရာ အထူးကိုယ်စားလှယ် ယန်းဟီးလီ၊ ကုလ လူ့အခွင့်အရေးဆိုင်ရာ မဟာမင်းကြီးရုံးက တာဝန်ရှိသူတွေဖြစ်တဲ့ အဂ်နက်စ် ချာလာမဒ်နဲ့ နီလ်စ် မဲလ်ဇာတို့က ဒီကိစ္စနဲ့ပတ်သက်လို့ မနေ့မှာ ကြေငြာချက်တစ်စောင် ထုတ်ပြန်ခဲ့တာပါ။

ကြေငြာချက်ဟာ ကုလကိုယ်စားမဟုတ်ဘဲ တွေ့ရှိချက်တွေကို သူတို့ ၃ ဦး သီးသန့် ထုတ်ပြန်တာလို့ ဆိုပါတယ်။

မကြာသေးမီကာလအတွင်း ရခိုင်အမျိုးသားတွေနဲ့ ယောက်ျားလေးငယ်တွေ အများအပြား အကြမ်းဖက်စွဲချက်တွေနဲ့ ဖမ်းဆီးထိန်းသိမ်းခံခဲ့ရပြီး ဘယ်သူနဲ့မှလည်း တွေ့ခွင့်မပေးကြောင်း၊ ထိန်းသိမ်းစဉ်အတွင်း ညှင်းပမ်းနှိပ်စက်ခံရတာတွေလည်းရှိကြောင်း ကြေငြာချက်မှာ ဖော်ပြထားပါတယ်။

“ဖမ်းဆီးထိန်းသိမ်းပြီး ဘယ်သူနဲ့မှ တွေ့ခွင့်မပေးတဲ့ လုပ်ရပ်တွေကို ချက်ခြင်း ရပ်တန့်ပစ်ဖို့ လိုပါတယ်။ AA နဲ့ ပတ်သက်တယ်ဆိုတဲ့ စွဲချက်နဲ့ ဖမ်းဆီးထိန်းသိမ်းပြီးတဲ့နောက် ညှင်းပမ်းမှုတွေ၊ လူမဆန်တဲ့ အပြုအမူတွေ လုပ်တယ်ဆိုတဲ့ စွပ်စွဲချက်တွေ၊ ဖမ်းဆီးခံရစဉ် သေဆုံးမှုတွေ၊ ဖိအားပေးပြီး ထွက်ဆိုခိုင်းတာတွေ အတွက်လည်း လွတ်လပ်ပြီး ယုံကြည်ရလောက်တဲ့ စုံစမ်းစစ်ဆေးမှုမျိုး လုပ်ဆောင်ရပါမယ်။ ကျူးလွန်သူတွေ အားလုံးကိုလည်း အရေးယူဖို့ လိုအပ်ပါတယ်”

AA နဲ့ ပတ်သက်တယ်လို့ဆိုကာ ဖမ်းဆီးထားမှုအတွင်း အနည်းဆုံး ၁၅ ဦး သေဆုံးခဲ့ပြီး ဒါနဲ့ပတ်သက်တဲ့ သတင်းတွေကိုလည်း လူ့အခွင့်အရေး တာဝန်ရှိသူတွေက ရရှိထားတယ်လို့ ကြေငြာချက်မှာ ထည့်သွင်း ဖော်ပြထားပါတယ်။

ရိုဟင်ဂျာလက်နက်ကိုင်အဖွဲ့ ARSA က ရဲကင်းစခန်းတွေကို တိုက်ခိုက်ခဲ့ပြီးတဲ့နောက် ၂၀၁၇ ခုနှစ်မှာ မြန်မာစစ်တပ်က ပြုလုပ်တဲ့ စစ်ဆင်ရေးတွေအတွင်း တရားလက်လွတ် သတ်ဖြတ်မှုတွေ၊ ညှင်းပမ်းမှုတွေ၊ အုပ်စုဖွဲ့ အဓမ္မကျင့်မှုတွေ၊ ရွာလုံးကျွတ် မီးရှို့မှုတွေ ရှိတယ်ဆိုတဲ့ စွပ်စွဲချက်တွေ ထွက်ပေါ်လာပြီးကတည်းက ရခိုင်ပြည်နယ်က လူ့အခွင့်အရေး အခြေအနေတွေကို နိုင်ငံတကာ အသိုင်းအဝိုင်းက အာရုံစိုက်လာတာ ဖြစ်ပါတယ်။

ကုလ လူ့အခွင့်အရေးဆိုင်ရာ တာဝန်ရှိသူတွေရဲ့ မနေ့ကထုတ်ပြန်ချက်မှာ မြန်မာစစ်တပ်ရဲ့ ဖမ်းဆီးမှုကို ခံခဲ့ရတဲ့ ရခိုင်ရွာသားတွေ ညှင်းပမ်းနှိပ်စက်ခံရမှုအချို့ကို ထည့်သွင်း ဖော်ပြထားပါတယ်။

ဖမ်းဆီးခံရစဉ် သေဆုံးသွားမှုတွေနဲ့ ပတ်သက်ပြီး လုပ်ဆောင်ထားတဲ့ စုံစမ်းစစ်ဆေးမှု ရလဒ်တွေကို အများပြည်သူထံ ချပြသွားဖို့၊ ကျူးလွန်သူတွေကို အရေးယူဖို့လည်း ကြေငြာချက်မှာ တိုက်တွန်းထားပါတယ်။

Ref: AFP