ရုရှားထံမှ အာကာသနှင့် အခြားနည်းပညာများကို ရယူရန် မလေးရှား စိတ်ဝင်စားနေ

စက်တင်ဘာ ၅၊ ၂၀၁၉
M-Media

-အာကာသကဏ္ဍအပါအ၀င် ရုရှားထံကနေ နည်းပညာတွေ ရယူဖို့အတွက် မလေးရှားက စိတ်ဝင်စားနေတယ်လို့ ရုရှားမီဒီယာ Spuntik က ဖော်ပြခဲ့ပါတယ်။

ရုရှားနိုင်ငံကို ရောက်ရှိနေတဲ့ မလေးရှားဝန်ကြီးချုပ် မဟာသီယာ မိုဟာမက်ဟာ ဒီကနေ့ ရုရှားသမ္မတ ဗလာဒီမီရ်ပူတင်နဲ့ တွေ့ဆုံစဉ်မှာ ဒီကိစ္စကို ဆွေးနွေးခဲ့ကြတာပါ။ မဟာသီက အရှေ့တောင်အာရှမှာ ရုရှားရဲ့ သြဇာကြီးမားရေး ကူညီပေးမယ်လို့လည်း ပြောကြားခဲ့ပါတယ်။

ရုရှားရဲ့ အာကာသနည်းပညာကို မလေးရှားက စိတ်ဝင်စားမှုဟာ အခုအကြိမ်က ပထမဆုံးအကြိမ် မဟုတ်ပါဘူး။ အရင်ကလည်း Angkasawan အမည်နဲ့ အာကာသ စီမံကိန်းကို ရုရှားနဲ့ ပူးပေါင်းလုပ်ဆောင်ခဲ့ဖူးပြီး မလေးရှားနိုင်ငံသား အာကာသယာဉ်မှူး တစ်ဦးကို Soyuz TNMA-11 အာကာသယာဉ်နဲ့ နိုင်ငံတကာအာကာသစခန်း (ISS) ကို စေလွှတ်ခဲ့ဖူးပါတယ်။

Angkasawan စီမံကိန်းကို မဟာသီ မလေးရှားဝန်ကြီးချုပ်အဖြစ် ပထမအကြိမ် တာဝန်ထမ်းဆောင်စဉ်မှာ ဆောင်ရွက်ခဲ့တာပါ။ မလေးရှားလေတပ်အတွက် ရုရှားထုတ် တိုက်လေယာဉ်တွေ ၀ယ်ယူမှု ပြီးတဲ့နောက် ပေါ်ပေါက်လာခဲ့တဲ့ အဲဒီအစီအစဉ်မှာ မလေးရှားနိုင်ငံသား ၂ ဦးကို အာကာသခရီးစဉ်အတွက် ရုရှားနိုင်ငံမှာ လေ့ကျင့်ပေးခဲ့ပြီး အဲဒီအထဲကတစ်ဦးဟာ ၂၀၀၇ ခုနှစ် အောက်တိုဘာလမှာ ISS ကို သွားရောက်ခဲ့ပါတယ်။

ဒီကနေ့တွေ့ဆုံစဉ် ရုရှားသမ္မတ ပူတင်က မလေးရှားဟာ အာရှမှာ မိမိတို့ရဲ့ ဦးစားပေး မိတ်ဖက်နိုင်ငံဖြစ်ကြောင်း၊ နှစ်နိုင်ငံအကြား အလွန်ကောင်းမွန်တဲ့ ဆက်ဆံရေးတစ်ရပ်ကို ထူထောင်ထားနိုင်တဲ့အတွက် ၀မ်းသာကြောင်း ပြောကြားခဲ့ပါတယ်။

Ref : Malay Mail