ဗြိတိန်၏ အကောင်းဆုံးဗလီဆုကို ဘာမင်ဟမ်မြို့ ဗလီက ရရှိ

စက်တင်ဘာ ၁၀၊ ၂၀၁၉
M-Media

-ယူကေ အစ္စလာမ်အဖွဲ့အစည်းတစ်ခုဖြစ်တဲ့ Faith Associates က ချီးမြှင့်တဲ့ ၂၀၁၉ ခုနှစ် အကောင်ဆုံး ဗလီဝတ်ကျောင်းတော်ဆုကို ဘာမင်ဟမ်က ‘ဂရင်းလိန်း ဗလီဝတ်ကျောင်းတော်’ က ရရှိသွားပါတယ်။

Beacon Mosque Standards လို့ အမည်ပေးထားတဲ့ အဲဒီဆုကို ၂၀၁၈ ခုနှစ်က စတင်ချီးမြှင့်ခဲ့တာဖြစ်ပြီး လူ့အဖွဲ့အစည်းအတွင်း အကျိုးပြုမှု၊ စီမံခန့်ခွဲမှု၊ ၀န်ထမ်းခန့်ထားမှု စတာတွေ အပါအ၀င် နိုင်ငံတကာစံချိန်ညွှန်းအတိုင်း အချက် ၁၀ ချက်သတ်မှတ်ကာ၊ ကြယ် ၅ ပွင့် ပုံစံနဲ့ အဆင့်ခွဲတာ ဖြစ်ပါတယ်။

ဆုတွေကိုတော့ စီမံခန့်ခွဲမှုဆု (Best Run Mosque)၊ လူ့အဖွဲ့အစည်းအပေါ် အကျိုးပြုနိုင်မှုဆု (Best Outreach Programme) ၊ သက်ကြီးရွယ်အို ဂရုစိုက်မှုဆု (Best Elderly Service) အပါအ၀င် ဆုပေါင်း ၁၀ ဆုလောက် ပေးအပ်တာပါ။

အခုနှစ်မှာ ဂရင်းလိန်းဗလီက Best Run Mosque ဆုကို ရရှိခဲ့တာပါ။ မနှစ်ကလည်း ဒီဗလီဟာ ပရဟိတလုပ်ဆောင်နိုင်မှုဆု (Best Charity Project) ကို ရရှိခဲ့ပါတယ်။

ဗလီရဲ့ အထွေထွေအတွင်းရေးမှူး ကမ်ရန်ဟူစိန်က အမြင့်ဆုံးဆုကို ရရှိခဲ့တာဖြစ်တယ်လို့ ဆိုပါတယ်။

“သူတို့ ဆု ၁၀ ခုပေးပြီး အခုနှစ်မှာတော့ ကျွန်တော်တို့ဟာ Best Run Mosque ဆုကို ရရှိခဲ့ပါတယ်။ ဒီဆုဟာ အမြင့်ဆုံးပါ”

၂၀၁၃ ခုနှစ်က ဗလီကနေ မနက်အာရုဏ်တက်ဝတ်ပြုအပြီး ပြန်သွားတဲ့ အဘိုးအိုကို လူဖြူအစွန်းရောက်တစ်ဦးက ဓားနဲ့ထိုးကာ အကြမ်းဖက်သတ်ဖြတ်ခဲ့ပြီးတဲ့နောက် ဂရင်းလိန်းဗလီရဲ့ အစ္စလာမ်ကြောက်ရောဂါတိုက်ဖျက်ရေး ဆောင်ရွက်မှုကို အဓိကထားကာ ဒီဆုကို ပေးအပ်ခဲ့တာ ဖြစ်ပါတယ်။

Ref: Birminghammail