အီရန်က လျှို့ဝှက်နေရာတစ်ခုတွင် နျူထုတ်နေသည်ဟု အစ္စရေးပြော

စက်တင်ဘာ ၁၀၊ ၂၀၁၉
M-Media

-လျှို့ဝှက်နေရာတစ်ခုမှာ အီရန်က နျူလက်နက် ထုတ်လုပ်နေတယ်လို့ အစ္စရေးဝန်ကြီးချုပ် နေတန်ယာဟုက မနေ့မှာ ပြောကြားလိုက်ပြီး အီရန်ကတော့ ဒါဟာ စစ်တိုက်ဖို့အတွက် အကြောင်းပြချက်ရှာတာလို့ ပြန်လည်တုန့်ပြန်လိုက်ပါတယ်။

အစ္စဖာဟန်မြို့တောင်ဘက် အဘာဒါဟ်ဆိုတဲ့မြို့မှာ လျှို့ဝှက်နျူစက်ရုံတည်ရှိကာ အစ္စရေးက တွေ့ရှိပြီးတဲ့နောက် အီရန်ဖက်က ဖျက်ဆီးလိုက်တယ်လို့လည်း နေတန်ယာဟုက ဆိုပါတယ်။ နေတန်ယာဟုဟာ အရင်ကလည်း ဒီလိုစွပ်စွဲပြောဆိုဖူးပြီး နေရာအတိအကျကို ထုတ်ဖော်ပြောဆိုမှုကတော့ ပထမဆုံးဖြစ်ပါတယ်။

ဒါပေမယ့် အသေးစိတ်အချက်အလက်တွေတော့ မပါဝင်ဘူး။

အီရန်က ဘယ်အချိန်၊ ဘယ်နေရာမှာ ဘာတွေလုပ်နေလဲဆိုတာ အစ္စရေးက သိနေတယ်လို့လည်း အီရန်အာဏာပိုင်တွေကို ရည်ညွှန်းပြီး နေတန်ယာဟုက ထည့်သွင်းပြောကြားခဲ့ပါတယ်။

ပယ်ချ

အီရန်ကတော့ နေတန်ယာဟုရဲ့ ဒီပြောကြားမှုကို ပယ်ချခဲ့ပြီး စစ်တိုက်ဖို့အတွက် အကြောင်းရှာနေတာ ဖြစ်တယ်လို့ တုန့်ပြန်ခဲ့ပါတယ်။

“နျူလက်နက်ကို ပိုင်ဆိုင်ထားတဲ့ ၀ံပုလွေက သိုးရေခြုံပြီး ငိုပြနေတာပါ” လို့ အီရန်နိုင်ငံခြားရေးဝန်ကြီး ဂျာဗဒ် ဇာရစ်ဖ်က Twitter စာမျက်နှာမှာ ရေးသားခဲ့ပါတယ်။

အီရန်နဲ့ ကမ္ဘ္ဘာ့အင်အားကြီး ၆ နိုင်ငံတို့ ၂၀၁၅ ခုနှစ်မှာ ရရှိခဲ့တဲ့ နျူသဘောတူညီချက်ကို အစ္စရေးက တစ်စိုက်မတ်မတ်ကန့်ကွက်လာခဲ့တာပါ။ ပြီးခဲ့တဲ့နှစ်ကလည်း တီဟီရန်မြို့စွန်က ကောဇောစက်ရုံးတစ်ခုမှာ ရေဒီယိုသတ္တုကြွပစ္စည်းတွေ လျှို့ဝှက် သိမ်းဆည်းထားတယ်လို့ နေတန်ယာဟုက ထုတ်ပြန်ပြောကြားဖူးပါတယ်။

Ref: Aljazeera