အမေရိကန်၏ ပက်ထရီယော့ဒုံးခွင်းစနစ် ၀ယ်ယူရန် တူရကီ ဆွေးနွေးနေ

စက်တင်ဘာ ၁၄၊ ၂၀၁၉
M-Media

-ရုရှားထံကနေ S-400 ဒုံးခွင်းစနစ် ၀ယ်ယူတဲ့ကိစ္စအတွက် နှစ်ဖက် တင်းမာမှုတွေ ရှိနေပေမယ့်အမေရိကန်လုပ် ဒုံးခွင်းစနစ် ၀ယ်ယူဖို့ အခုလအတွင်း အမေရိကန်သမ္မတ ဒေါ်နယ်ထရမ့်နဲ့ ဆွေးနွေးသွားမယ်လို့ တူရကီသမ္မတ အာဒိုဂန်က ပြောကြားလိုက်ပါတယ်။

မနေ့က ရိုက်တာသတင်းဌာနနဲ့ အင်တာဗျူးမှာ အာဒိုဂန်က မြေပြင်ကဝေဟင်ပစ် ပက်ထရီယော့ဒုံးခွင်းစနစ်တွေကို ၀ယ်ယူဖို့အတွက် လွန်ခဲ့တဲ့ ၂ ပတ်က ထရမ့်နဲ့ ဆွေးနွေးခဲ့တယ်လို့ ဆိုပါတယ်။ လာမယ့်တစ်ပတ် နယူးယောက်မှာ ကုလ အထွေထွေညီလာခံ ကျင်းပဖို့ရှိနေပြီး အဲဒီမှာ အာဒိုဂန်နဲ့ ထရမ့်တို့ ထပ်တွေ့ဖို့ ရှိနေပါတယ်။

“S-400 စနစ်ရထားပေမယ့် ပက်ထရီယော့တစ်ချို့ကိုတော့ ၀ယ်အုံးမှာပါ။ ဒါပေမယ့် အနည်းဆုံး
S-400 နဲ့ အဆင်ပြေမယ့် အခြေအနေတွေကို ကြည့်ရအုံးမယ်လို့ ကျွန်တော် ပြောခဲ့ပါတယ်” လို့ အာဒိုဂန်က ပြောကြားခဲ့ပါတယ်။

ရုရှားထံကနေ S-400 ဒုံးခွင်းစနစ်ကို ၀ယ်ယူခဲ့တဲ့အတွက် တူရကီနဲ့ အမေရိကန်တို့အကြား တင်းမာမှုတွေ မြင့်တက်ခဲ့ပါတယ်။ အမေရိကန်က ဒီကိစ္စကို ရှုတ်ချခဲ့သလို F-35 တိုက်လေယာဉ်တူရကီနဲ့ ပူးပေါင်းထုတ်လုပ်မှု၊ တူရကီ လေယာဉ်မှူးတွေကို လေ့ကျင့်ပေးမှု အစီအစဉ်တွေကို အမေရိကန်က ရပ်ဆိုင်းခဲ့ပါတယ်။ ဒါ့အပြင် စီးပွားရေးပိတ်ဆို့မှုတွေ ပြုလုပ်မယ်လို့လည်း ခြိမ်းခြောက်ထားပါတယ်။

အာဒိုဂန်ကတော့ မိမိတို့အနေနဲ့ ရုရှားရဲ့ Su-35 နဲ့ Su-57 တိုက်လေယာဉ်တွေကိုပါ ၀ယ်ယူဖို့ ရှိနေတယ်လို့ ပြီးခဲ့တဲ့လနှောင်းပိုင်းက ပြောကြားခဲ့ပါတယ်။

Ref: Aljazeera