လာဘ်စားသည့် အာဏာပိုင်များအား လက်ရောက်အပြစ်ပေးရန် ဖိလစ်ပိုင်သမ္မတက ပြည်သူများကို တိုက်တွန်း

စက်တင်ဘာ ၁၄၊ ၂၀၁၉
M-Media

– အာဏာပိုင်တွေ လာဘ်စားတာတွေ့ရင် ရိုက်နှက်တာမျိုး၊ သေနတ်နဲ့ပစ်တာမျိုး လုပ်ဆောင်ဖို့အတွက် ဖိလစ်ပိုင်ပြည်သူတွေကို သမ္မတဒူတာတေးက တိုက်တွန်းလိုက်ပြီး တရားဥပဒေဘောင်အပြင်ဘက်ရောက်တဲ့ ဒီစကားအတွက် ဝေဖန်မှုတွေလည်း ပေါ်ထွက်လာပါတယ်။

“အခွန်ပေးတာ၊ ငွေကြေးပေးသွင်းတာ၊ ထောက်ခံစာယူတာမျိုးလုပ်လို့ အာဏာပိုင်တွေက လာဘ်လာဘတောင်းရင် ရိုက်သာရိုက်။ သေနတ်တွေဘာတွေရှိရင်လည်း ပစ်သာပစ်လိုက်။ ဒါပေမယ့် မသေစေနဲ့။ သေသွားရင်တော့ တရားရင်ဆိုင်ရင် ခင်ဗျားတို့ လွတ်ငြိမ်းချမ်းသာခွင့်ရမှာ မဟုတ်ဘူး” လို့ ဗုဒ္ဓဟူးနေ့က ဘာတန်မြို့မိန့်ခွန်းမှာ ဒူတာတေးက ပြောကြားခဲ့ပါတယ်။

အဲဒီလိုလုပ်ဆောင်တဲ့ ပြည်သူတွေကို သူကိုယ်တိုင် ကာကွယ်သွားမှာဖြစ်ပြီး၊ လာဘ်စားတဲ့အာဏာပိုင်တွေကို ထောင်ချတာထက် ရုပ်ပိုင်းဆိုင်ရာ ပြင်းထန်တဲ့အပြစ်မျိုး ပေးသွားမယ်လို့လည်း သူက ထည့်သွင်းပြောဆိုခဲ့ပါတယ်။

အစိုးရတာဝန်ရှိသူတွေ၊ အစိုးရ၀န်ထမ်းတွေ လာဘ်စားတာမျိုးတွေ့ရင် တိုင်ကြားဖို့နဲ့ မိမိတို့ရဲ့
အခွင့်အရေးကို အပြည့်အ၀ရယူဖို့ ဒူတာတေးက ပြည်သူတွေကို တိုက်တွန်းခဲ့ပါတယ်။

ဒူတာတေးဟာ ၂၀၁၆ ခုနှစ်က အာဏာရပြီးတဲ့နောက် မူးယစ်ဆေးဝါး နှိမ်နှင်းမှုမှာ အင်အားသုံးပြီး အလွန်အကျွံလုပ်ဆောင်မှုအတွက် ဝေဖန်ခံထားနေရသူပါ။ အမျိုးသမီးတွေ အဓမ္မပြုကျင့်ခံရမှုကို လှောင်ပြောင်ပြောဆိုမှုတွေအတွက်လည်း ပြစ်တင်ခံထားရပါတယ်။

ဗုဒ္ဓဟူးနေ့က အခုမှတ်ချက်ဟာ တရားဥပဒေဘောင်ကို ကျော်လွန်ပြီ တည်ငြိမ်အေးချမ်းရေးကိုထိခိုက်စေနိုင်တဲ့အတွက် အစိုးရအဖွဲ့ဝင်တစ်ချို့ အပါအ၀င် လူတော်တော်များများက ဝေဖန်နေကြပါတယ်။

ဒူတာတေးက သူ့အနေနဲ့ ခြစားမှုတိုက်ဖျက်ရေးဥပဒေမှာ ပါဝင်တာကိုသာ ပြောကြားတာ ဖြစ်တယ်လို့ ပြန်လည် တုန့်ပြန်ခဲ့ပါတယ်။

Ref: Daily Mail