ဆော်ဒီရေနံစက်ရုံများ တိုက်ခိုက်ခံရမှု ကန်၏ စွပ်စွဲချက်ကို အီရန်ငြင်း

စက်တင်ဘာ ၁၆၊ ၂၀၁၉
M-Media

-ဆော်ဒီကရေ ရေနံစက်ရုံနှစ်ခုကို တိုက်ခိုက်မှုမှာ နောက်ကွယ်ကနေ ပါဝင်ခဲ့တယ်ဆိုတဲ့ အမေရိကန်ရဲ့ စွပ်စွဲမှုကို အီရန်က ငြင်းဆိုလိုက်ပါတယ်။

စနေနေ့က ကမ္ဘ္ဘာ့အကြီးဆုံး ရေနံထုတ်လုပ်မှုစက်ရုံဖြစ်တဲ့ Abqaiq နဲ့ ရေနံတွင်း Khurais တို့မှာ ဒရုန်းနဲ့တိုက်ခိုက်မှုတွေကြောင့် မီးလောင်ခဲ့ပါတယ်။ ယီမင်ဟူသီသူပုန်အဖွဲ့က ဒါဟာ သူတို့လက်ချက်လို့ ပြောကြားထားပါတယ်။

အမေရိကန်နိုင်ငံခြားရေးဝန်ကြီး မိုက်ပွမ်ပီယိုက တိုက်ခိုက်မှုအတွက် အီရန်ကို အပြစ်တင်ခဲ့ပြီး ကမ္ဘ္ဘာ့ စွမ်းအင်ထောက်ပံ့မှုကို မကြုံစဖူး တိုက်ခိုက်လာတာလို့ ဆိုပါတယ်။

အီရန်နိုင်ငံခြားရေးဝန်ကြီးဌာနက အမေရိကန်ရဲ့ ဒီစွပ်စွဲမှုဟာ အဓိပ္ပါယ်မရှိဘဲ အီရန်အပေါ် ထပ်တိုးဆောင်ရွက်ချက်တွေအတွက် အကြောင်းရှာတာလို့ ပြန်လည် တုန့်ပြန်ခဲ့ပါတယ်။

“ဒီလိုပြောကြားမှုတွေဟာ တိုင်းပြည်တစ်ခုရဲ့ဂုဏ်သိက္ခာ ကျဆင်းအောင်လုပ်ဖို့၊ နောက်ထပ် ခြေလှမ်းတွေ လှမ်းဖို့ ထောက်လှမ်းရေးနဲ့ လျှို့ဝှက်အဖွဲ့အစည်းတွေက လီဆယ်တဲ့ စကားမျိုးတွေပါ” လို့ ၀န်ကြီးဌာန ပြောရေးဆိုခွင့်ရှိသူ အဘတ်စ် မူဆာဗီက ပြောကြားခဲ့ပါတယ်။

ရေနံစက်ရုံတွေ တိုက်ခိုက်ခံရမှုကြောင့် ဆော်ဒီရဲ့ ရေနံထုတ်လုပ်မှုဟာ ထက်ဝက်လောက် ကျဆင်းသွားပြီး ကမ္ဘ္ဘာ့ဈေးကွက်မှာလည်း ရေနံဈေးတွေ ထိုးတက်လာပါတယ်။

Ref: Aljazeera