ထိပ်တန်းဗိုလ်ချုပ်ကို လုပ်ကြံရန် အာရပ်နှင့် အစ္စရေးတို့ ပူးပေါင်းစီစဉ်ခဲ့ဟု အီရန်ထုတ်ပြန်

အောက်တိုဘာ ၄၊ ၂၀၁၉
M-Media

-အီရန်တော်လှန်ရေးအစောင့်တပ်ဖွဲ့ IRGC ရဲ့ ထိပ်တန်းဗိုလ်ချုပ် ကာစင် ဆိုလိုင်မာနီကို လုပ်ကြံသတ်ဖြတ်ဖို့ အာရပ်နဲ့ အစ္စရေးတို့ရဲ့ ပူးပေါင်းကြံစည်မှုကို ဖော်ထုတ် ဟန့်တားနိုင်ခဲ့တယ်လို့ အီရန်ထောက်လှမ်းရေးအဖွဲ့က မနေ့မှာ ထုတ်ပြန်ပြောကြားလိုက်ပါတယ်။

ဆိုလိုင်မာနီဟာ တော်လှန်ရေးတပ်အစောင့်တပ်ဖွဲ့ရဲ့ ထိပ်တန်းတပ်မဟာ Quds Force ကိုဦးဆောင်နေသူဖြစ်ပါတယ်။ အီရတ်နဲ့ ဆီးရီးယားတို့မှာ IS အကြမ်းဖက်အဖွဲ့ကို ချေမှုန်းသုတ်သင်ရာမှာ ပြောင်မြောက်တဲ့ မဟာဗျူဟာတွေကို ချမှတ်သူအဖြစ် အီရန်ခေါင်းဆောင်ပိုင်းက သူ့ကို သတ်မှတ်ထားပါတယ်။

IRGC ရဲ့ ထောက်လှမ်းရေးအဖွဲ့ အကြီးအကဲ ဟိုစိန် တာအဘ်က ဂျူး-အာရပ် ထောက်လှမ်းရေးအဖွဲ့တွေဟာ အကြမ်းဖက်သမားတွေကို လူစုကာ အီရန်နိုင်ငံထဲ ၀င်ရောက်စေပြီး ဆိုလိုင်မာနီကို ဗုံးခွဲသတ်ဖြတ်ဖို့ ကြံစည်ခဲ့ကြတယ်လို့ ပြောကြားခဲ့ပါတယ်။

ဗိုလ်ချုပ် ဆိုလိုင်မာနီရဲ့ ဖခင်ဖြစ်သူ ပိုင်ဆိုင်တဲ့ ဘာသာရေးအဆောက်အဦးဘေးမှာ အဆောက်အဦးတစ်ခုကို ၀ယ်ယူကာ စက်တင်ဘာ ၈-၉ ရက်နေ့မှာ ကျရောက်ခဲ့တဲ့ အာရှူရာနေ့ စီတန်းလှည့်လည်မှုမှာ ဖောက်ခွဲဖို့ စီစဉ်ထားတာလို့ ဆိုပါတယ်။

လူ ၃ ဦးပါဝင်တဲ့ အဲဒီအဖွဲ့ကို အဆင့်မြင့်သင်တန်းတွေ ပေးကတည်းက မိမိတို့ ထောက်လှမ်းရေးအဖွဲ့က စောင့်ကြည့်ခဲ့တာဖြစ်ပြီး နောက်ပိုင်းမှာ ဖမ်းဆီးနိုင်ခဲ့ကြောင်း၊ ဒီလုပ်ကြံမှုအတွက် ဂျူး-အာရပ်အဖွဲ့ဟာ နှစ်နဲ့ချီ အချိန်ယူ လုပ်ဆောင်ခဲ့တာဖြစ်ကြောင်း ဟိုစိန် တာအဘ်က ထည့်သွင်းပြောကြားခဲ့ပါတယ်။

Quds Force အကြီးအကဲ ဗိုလ်ချုပ် ကာစင် ဆိုလိုင်မာနီဟာ အီရတ်နဲ့ ဆီးရီးယားအစိုးရတို့ကိုအကြံပေးနေတဲ့ အီရန် စစ်ဖက်အကြံပေးအဖွဲ့ကိုလည်း ကိုင်တွယ်စီမံနေပါတယ်။

Foreign Policy မဂ္ဂဇင်းရဲ့ ၂၀၁၉ ခုနှစ် ကာကွယ်ရေးနှင့် လုံခြုံရေး ကမ္ဘာ့ ထိပ်တန်း မဟာဗျူဟာရှင် စာရင်းရဲ့ ထိပ်ပိုင်းမှာလည်း ဗိုလ်ချုပ်ဆိုလိုင်မာနီ ပါဝင်ခဲ့ပါတယ်။ ၂၀၁၇ ခုနှစ် မတ်လက ရီယာ့ဒ်မှာ ပြုလုပ်ခဲ့တဲ့ အစည်းအဝေးတစ်ခုမှာ ဆိုလိုင်မာနီအပါအ၀င် အီရန် ထိပ်တန်း တာဝန်ရှိသူတွေကို လုပ်ကြံဖို့ အကြံအစည်တစ်ခု ရှိခဲ့ဖူးတယ်လို့ New York Times သတင်းဌာနက ၂၀၁၈ ခုနှစ် နိုဝင်ဘာလမှာ ဖော်ပြခဲ့ဖူးပါတယ်။

အခုတစ်ကြိမ် လုပ်ကြံဖို့အစီအစဉ်မှာ အစ္စရေးနဲ့ ဘယ်အာရပ်နိုင်ငံတွေ ပူးပေါင်းခဲ့သလဲဆိုတာကို ဟိုစိန်တာအဘ်က မပြောခဲ့ဘဲ၊ အစ္စရေးနဲ့ အာရပ်နိုင်ငံတွေကလည်း အီရန်ရဲ့ အခုထုတ်ပြန်ချက်ကို တုန့်ပြန်ပြောကြားမှု မရှိသေးပါဘူး။

Ref: Press TV