အကြားအာရုံချို့တဲ့သူများ ဂီတသံစဉ်ခံစားနိုင်မည့် ဂျာကင်

အောက်တိုဘာ ၁၁၊ ၂၀၁၉
M-Media

-အကြားအာရုံ ချို့တဲ့သူတွေ ဂီတသံစဉ်တွေကို ခံစားနိုင်မယ့် နည်းပညာမြင့် ဂျာကင်ကို လန်ဒန်အခြေစိုက် ဖက်ရှင်ကုမ္ပဏီ CuteCircuit က တီထွင် ထုတ်လုပ်လိုက်ပါတယ်။

Sound Shirt လို့ အမည်ပေးထားတဲ့ အဲဒီဂျာကင်ကို ချည်နဲ့ပြုလုပ်ကာ ဆင်ဆာ ၁၆ ခု ထည့်သွင်းထားပါတယ်။ ၀တ်ဆင်ထားသူတွေအနေနဲ့ တယောသံကို လက်မောင်းတုန်ခါမှုကနေတစ်ဆင့် ခံစားရတာမျိုး၊ ဒရမ်သံကို ကျောဖက်ကနေ ခံစားရတာမျိုးလို ပုံစံမျိုးနဲ့ ဂီတသံစဉ်တွေကို နားထောင်နိုင်မှာ ဖြစ်ပါတယ်။

ငယ်စဉ်ကတည်းက အကြားအာရုံ ချို့တဲ့ခဲ့တဲ့ ဘာရ်ဟာနီက ဒီဂျာကင်ဟာ ခံစားမှုအသစ်ကို ပေးစွမ်းနိုင်တယ်လို့ ပြောကြားခဲ့ပါတယ်။

“ဂီတကို နက်နက်ရှိုင်းရှိုင်း ခံစားရပြီး၊ သံစဉ်တွေထဲမှာ စီးမျောနေရသလိုပါပဲ”

CuteCircuit ကုမ္ပဏီဟာ နည်းပညာအထောက်အကူပြု လူ့အသုံးအဆောင် ပစ္စည်းတွေကို တီထွင်ထုတ်လုပ်နေပြီး ပူးတွဲတည်ထောင်သူ ဖရန်ဆက်စကာ ရိုဆဲလာက အခုဂျာကင်အင်္ကျီဟာ အကြားအာရုံ ချို့တဲ့သူတွေ ဂီတသံစဉ်တွေကို စီးမျောခံစားရာမှာ အထောက်အကူ ဖြစ်စေလိမ့်မယ်လို့ ပြောကြားခဲ့ပါတယ်။

“အင်္ကျီက ချည်သားသက်သက်နဲ့ ပြုလုပ်ထားတာပါ။ ဝါယာကြိုးတွေမသုံးဘဲ မိုက်ခရို အီလက်ထရောနစ်နည်းပညာ ပေါင်းစပ်ပြီး အသုံးပြုရအဆင်ပြေတဲ့ စမတ်ချည်မျှင်နဲ့ ဖန်တီးထားတာ ဖြစ်ပါတယ်။ အီလက်ထရောနစ် တုန်ခါမှုစနစ်ကို ချည်မျှင်နဲ့ တွဲစပ်ထားတာကြောင့် ပျော့ပြောင်းပြီး ၀တ်ရချွတ်ရ လွယ်ပါတယ်”

ဒါပေမယ့် ဒီဂျာကင်ဟာ တစ်ထည်ကို ပေါင် ၃၀၀၀ လောက် ရှိနေတာကြောင့် ဈေးကွက်မှာ တွင်ကျယ်ဖို့ အတားအဆီးတွေ ရှိနေပါတယ်။

Ref: Reuters