တိုင်းပြည်ကိုသွေးခွဲကာ အမျိုးဘာသာသူရဲကောင်းဖြစ်အောင် မလုပ်သင့်ဟု အန်ဝါရ် အီဘရာဟင်ပြော

အောက်တိုဘာ ၁၂၊ ၂၀၁၉
M-Media

-မလေးလူမျိုးတွေကြားထဲမှာ သူရဲကောင်းဖြစ်အောင် လုပ်တာမျိုးက ကိစ္စမရှိပေမယ့် တိုင်းပြည်အတွင်း လူမျိုးရေးသွေးကွဲအောင် လုပ်ဆောင်လို့ မရဘူးလို့ မလေးရှား ထိပ်တန်းနိုင်ငံရေးသမား အန်ဝါရ် အီဘရာဟင်က ပြောကြားလိုက်ပါတယ်။

အရင်က အတိုက်အခံခေါင်းဆောင်ဖြစ်ခဲ့တဲ့ အန်ဝါရ်ဟာ လက်ရှိဝန်ကြီးချုပ် မဟာသီယာ မိုဟာမက်နေရာကို ဆက်ခံမယ့်သူအဖြစ် ရေပန်းစားနေသူလည်း ဖြစ်ပါတယ်။

“တိုင်းပြည်တစ်ခုမှာ မတူကွဲပြားမှုကို အသုံးချကာ ကောင်းအောင်လုပ်လို့ရတယ်။ သွေးကွဲအောင်လုပ်ပြီး အခြေအနေတင်းမာအောင်လည်း လုပ်လို့ရပါတယ်။ မလေးလူမျိုးတွေရဲ့ သူရဲကောင်းဖြစ်အောင်လုပ်ဖို့ ကျွန်တော့်အတွက် လွယ်ပါတယ်။ ဘယ်လိုလုပ်ရမလဲဆိုတာ ကျွန်တော်သိတယ်။ ဒါမျိုး လုပ်ရင် သွေးကွဲမှုတွေ၊ မလိုမုန်းထားမှုတွေ ဖြစ်လာမယ်။ ဒါဟာ တိုင်းပြည်ကို သစ္စာဖောက်တာပါ” လို့ အောက်တိုဘာ ၁၀ ရက်နေ့က ပြုလုပ်ခဲ့တဲ့ ဆွေးနွေးပွဲတစ်ခုမှာ ပြောကြားခဲ့ပါတယ်။

အောက်တိုဘာ ၆ ရက်နေ့က Malay Dignity Congress ကျင်းပပြီး ရက်နည်းငယ်အကြာမှာ
အန်ဝါရ်အီဘရာဟင်ရဲ့ ဒီမှတ်ချက် ထွက်ပေါ်လာတာ ဖြစ်ပါတယ်။ Malay Dignity Congress မှာ မလေးခေါင်းဆောင်အချို့က နိုင်ငံအတွင်း မလေးလူမျိုးတွေရဲ့ အခွင့်အရေးကို၊ ထိန်းသိမ်းကာကွယ်ရေး၊ မလေးလူမျိုးအများစု ကိုးကွယ်တဲ့ဘာသာကို နိုင်ငံတော်ဘာသာအဖြစ် သတ်မှတ်ပေးရေး၊ အစိုးရ ထိပ်တန်းနေရာတွေမှာ မလေးလူမျိုးတွေကိုသာ ခန့်အပ်ရေး တောင်းဆိုခဲ့ကြပါတယ်။

အဲဒီအခမ်းအနားကို တက်ရောက်ခဲ့တဲ့ မလေးဝန်ကြီးချုပ် မဟာသီယာ မိုဟာမက်က မလေးလူမျိုးတွေ အနေနဲ့ အမျိုးဂုဏ်၊ ဇာတိဂုဏ် မြင့်မားချင်တယ်ဆိုရင် ကိုယ်တိုင်အလုပ်လုပ်ဖို့ လိုအပ်တယ်လို့ ပြောကြားခဲ့ပါတယ်။

အန်ဝါရ် အီဘရာဟင်က Malay Dignity Congress တက်ရောက်ဖို့ ဖိတ်ကြားမှုဟာ နောက်ကျတဲ့အတွက် မသွားခဲ့ဘူးလို့ ဆိုပါတယ်။

နိုင်ငံ့ခေါင်းဆောင်ဆိုတာ မလေးလူမျိုးတစ်မျိုးတည်းအတွက်မဟုတ်ဘဲ နိုင်ငံအတွင်းမှာ ရှိနေတဲ့လူမျိုးအားလုံးရဲ့ ဒုက္ခသုက္ခတွေကို ဦးဆောင်ဖြေရှင်းပေးရမယ်လို့လည်း အန်ဝါရ်က ကြာသာပတေးနေ့ ဆွေးနွေးပွဲမှာ ထည့်သွင်း ပြောကြားခဲ့ပါတယ်။

“မလေးတွေအတွက်ပဲ လုပ်ပေးမယ်ဆိုတာမျိုး မရဘူး။ တရုတ်တွေ၊ ကုလားတွေအတွက်လည်းလုပ်ပေးရမယ်။ ဒါမျိုးစိတ်ဓာတ် ကျွန်တော်တို့မှာ ရှိလားဆိုတာ ဆန်းစစ်ပါ။ ဒီတိုင်းပြည်မှာ လူများစုက မလေးဖြစ်တယ်။ ဒါပေမယ့် လူနည်းစုဖြစ်တဲ့ ကုလားတွေ၊ တရုတ်တွေ ဆင်းရဲနေရင်လည်း သူတို့ကို ဖေးမဖို့ ကျွန်တော်တို့မှာ တာဝန်ရှိတယ်။ ကျွန်တော်တို့လူမျိုးရဲ့ လူသားဆန်မှုတွေ ဘယ်ရောက်သွားလဲ”

လူတစ်ယောက်ရဲ့ ကြီးကျယ်မှုဆိုတာ တရားမျှတမှုအတွက် ဘယ်လောက် တိုက်ပွဲဝင်လဲဆိုတဲ့ အပေါ်မှာ မူတည်ပြီး၊ လူတွေကို ကြောက်ရွံ့အောင် လုပ်တာမျိုး မဟုတ်ဘူးလို့လည်း အန်ဝါရ်က ထည့်သွင်း ပြောကြားခဲ့ပါတယ်။

ပြီးခဲ့တဲ့နှစ်ရွေးကောက်ပွဲမှာ ၀န်ကြီးချုပ် နာဂျစ်ရာဇတ်ဦးဆောင်တဲ့ အစိုးရ ပြုတ်ကျသွားပြီးနောက်ပိုင်း မလေးရှားနိုင်ငံမှာ လူများစုဖြစ်တဲ့ မလေးလူမျိုးတွေရဲ့ အခွင့်အရေး ဦးစားပေးရေး အခြေခံတဲ့ နိုင်ငံရေးလှုပ်ရှားမှု ရေစီးကြောင်းပေါ်ပေါက်လာခဲ့တာ ဖြစ်ပါတယ်။

Ref: Malaysiakini