တူရကီ၏ ကျူးကျော်မှုကို ခုခံရန် ကာ့ဒ်တပ်ဖွဲ့နှင့် ဆီးရီးယားအစိုးရတို့ သဘောတူ

အောက်တိုဘာ ၁၄၊ ၂၀၁၉
M-Media

-ဆီးရီးယားနိုင်ငံမြောက်ပိုင်းမှာ တူရကီရဲ့ ကျူးကျော်တိုက်ခိုက်မှုကို ခုခံဖို့အတွက် ကာ့ဒ်တပ်ဖွဲ့နဲ့ ဆီးရီးယားအစိုးရတို့အကြား သဘောတူညီချက်တစ်ခု ရရှိခဲ့ပါတယ်။

ဆီးရီးယားနိုင်ငံပိုင်သတင်းဌာနက အစိုးရတပ်တွေကို နိုင်ငံမြောက်ပိုင်းမှာ တပ်ဖြန့် ချထားလိုက်ပြီလို့ မနေ့မှာ ဖော်ပြခဲ့ပါတယ်။ သဘောတူညီချက်အရ ကာ့ဒ်တွေ ထိန်းချုပ်ထားပြီး တူရကီနဲ့ကပ်နေတဲ့ နယ်စပ်တစ်လျှောက်မှာ ဆီးရီးယားအစိုးရတပ်တွေ ချထားနိုင်မှာဖြစ်ပါတယ်။

ဆီးရီးယားအစိုးရက ထုတ်ပြန်တဲ့ ကြေငြာချက်မှာ သဘောတူညီချက်ဟာ SDF က တူရကီရဲ့ ကျူးကျော်မှုကို တွန်းလှန်မှု၊ သိမ်းပိုက်ထားတဲ့နေရာတွေကို ပြန်လည်လွတ်မြောက်အောင်လုပ်ဆောင်မှုကို ကူညီဖို့ဖြစ်တယ်လို့ ဖော်ပြထားပါတယ်။

အမေရိကန်ကျောထောက်နောက်ခံပြု ကာ့ဒ်တပ်ဖွဲ့ SDF ထိန်းချုပ်ရာ ဆီးရီးယားနိုင်ငံမြောက်ပိုင်းကို တူရကီက ပြီးခဲ့တဲ့တစ်ပတ် ဗုဒ္ဓဟူးနေ့ကစလို့ ကျူးကျော်တိုက်ခိုက်ခဲ့တာဖြစ်ပါတယ်။ SDF ဟာ တူရကီက ကာ့ဒ်အလုပ်သမားပါတီ PKK နဲ့ အဆက်အသွယ်ရှိတယ်လို့ဆိုကာ တူရကီအစိုးရက အကြမ်းဖက်အဖွဲ့အဖြစ် သတ်မှတ်ထားတာပါ။

တူရကီက တိုက်ခိုက်မှုမလုပ်ခင် အမေရိကန်က ဆီးရီးယားမြောက်ပိုင်းမှာရှိတဲ့ သူတို့ရဲ့တပ်တွေကို ပြန်လည်ခေါ်ယူခဲ့ပြီး နိုင်ငံတကာအသိုင်းအ၀ိုင်းက ဒီလုပ်ရပ်ကို ရှုတ်ချခဲ့ပါတယ်။

တူရကီရဲ့ တိုက်ခိုက်မှုကြောင့် အရပ်သားတွေ သေဆုံးမှု၊ အိုးအိမ်စွန့်ခွာထွက်ပြေးရမှုတွေ မြင့်တက်လာခဲ့ပါတယ်။ SDF က တိုက်ခိုက်မှုတွေအတွင်း IS အဖွဲ့က နိုင်ငံခြားတပ်ဖွဲ့ဝင်တွေရဲ့ ‌မိသားစု၊ ဆွေမျိုး စုစုပေါင်း ၈၀၀ နီးပါးလောက် အကျဉ်းထောင်တွေက‌နေ လွတ်မြောက်သွားတယ်လို့ ထုတ်ပြန်ခဲ့ပါတယ်။

တူရကီရဲ့ကျူးကျော်မှုကို နိုင်ငံတကာအသိုင်းအ၀ိုင်းက ပြစ်တင်ဝေဖန်မှုတွေလည်း လုပ်ဆောင်နေပြီး ဥရောပနိုင်ငံတစ်ချို့က တိုက်ခိုက်မှုကို မရပ်မချင်း တူရကီကို လက်နက်ရောင်းချတော့မှာ မဟုတ်ဘူးလို့ ထုတ်ပြန် ပြောကြားထားပါတယ်။

Ref: BBC