ဆော်ဒီတွင် ကားမတော်တဆမှုကြောင့် ဘုရားဖူးခရီးသည် ၃၅ ဦး သေဆုံး

အောက်တိုဘာ ၁၇၊ ၂၀၁၉
M-Media

-ဆော်ဒီအာရေဗျနိုင်ငံ မဒီနာမှာ ခရီးသည်တွေ တင်ဆောင်လာတဲ့ ဘတ်စ်ကားတစ်စီး ထရပ်ကားတစ်စီးနဲ့ တိုက်မိခဲ့တာကြောင့် အနည်းဆုံး လူ ၃၅ ဦး သေဆုံးခဲ့ပါတယ်။

အာရှနဲ့ အာရပ်နိုင်ငံတွေ ဘုရားဖူးခရီးသည် ၃၉ ဦး တင်ဆောင်လာတဲ့ အဲဒီဘတ်စ်ကားဟာ မက္ကာမြို့နဲ့ မဒီနာမြို့ကို ဆက်သွယ်ထားတဲ့လမ်းမှာ မနေ့ညပိုင်း ၇ နာရီလောက်က ဒီလို မတော်တဆမှု ဖြစ်ပွားခဲ့တာပါ။

ဒဏ်ရာရသူက ၄ ဦးရှိခဲ့ပြီးလက်ရှိ ဆေးရုံမှာ ဆေးကုသမှုတွေ ခံယူနေရပါတယ်။ ဆော်ဒီအာဏာပိုင်တွေကတော့ ဒီမတော်မဆမှု ဘာ့ကြောင့်ဖြစ်ပွားလဲဆိုတာ စုံစမ်းစစ်ဆေးမှုတွေ ပြုလုပ်နေပါတယ်။

ဆော်ဒီမှာ ကမ္ဘာတစ်ဝှမ်းက ဘရားဖူးခရီးသွားတွေအကြား မတော်တဆဖြစ်မှုဟာ ဖြစ်တောင့်ဖြစ်ခဲ့ဖြစ်ပါတယ်။

၂၀၁၅ ခုနှစ် စက်တင်ဘာလတုန်းက ဟဂျ်ဘုရားဖူးကာလအတွင်း လူတိုးမှုကြောင့် ဘုရားဖူးခရီးသွား ၂၃၀၀ လောက် သေဆုံးခဲ့ပြီး အများစုက အီရန်နိုင်ငံသားတွေဖြစ်ပါတယ်။ အဲဒီလ အစောပိုင်းမှာပဲ ဆောက်လုပ်ရေးကရိန်းတစ်ခု မတ်စ်ဂျစ်ဒ်ဟရမ်ဗလီ ပရ၀ုဏ်အတွင်း လဲကျမှုကြောင့် လူ ၁၀၀ လောက် သေဆုံးခဲ့ပါတယ်။

Ref: Aljazeera