မြန်မာနိုင်ငံတွင် လိင်ပညာပေးလုပ်ငန်းကို နည်းပညာအကူအညီဖြင့် လုပ်ဆောင်နေ

အောက်တိုဘာ ၁၇၊ ၂၀၁၉
M-Media

-မြန်မာနိုင်ငံအတွင်း အဓမ္မကျင့်မှုတွေ မြင့်တက်လာမှုကို တိုက်ဖျက်ဖို့အတွက် နည်းပညာက ကူညီပေးနိုင်တယ်လို့ နိုင်ငံတကာအဆင့် ဆုတံဆိပ်ရရှိထားတဲ့ စွန့်ဦးတီထွင်သူ ဒေါ်လှလှဝင်းက ပြောကြားလိုက်ပါတယ်။

သူမဟာ AR (augmented reality) နည်းပညာကို အသုံးပြုကာ မြန်မာနိုင်ငံမှာ လိင်ပညာပေး လုပ်ငန်းတွေ ဆောင်ရွက်နေသူဖြစ်ပြီး နည်းပညာအသုံးပြု ပညာသင်ကြားမှုစနစ်ကို မိတ်ဆက်ပေးတဲ့ 360ed ကုမ္ပဏီကို တည်ထောင်ထားပါတယ်။
‌
မေလက နေပြည်တော် ပုဂ္ဂလိက မူကြိုကျောင်းတစ်ခုမှာ အသက် ၃ နှစ်အရွယ် သမီးငယ်လေး အဓမ္မကျင့်ခံရတဲ့အမှုဟာ နိုင်ငံအတွင်း ဟိုးလေးတစ်ကျော်ကျော်ဖြစ်သွားခဲ့ပြီး တရားမျှတမှုကို တောင်းဆိုတဲ့ ဆန္ဒပြပွဲတွေ ဖြစ်လာသလို၊ နိုင်ငံမှာ လိင်ပညာပေးမှု နည်းပါးတာကို ထောက်ပြမှုတွေလည်း ရှိလာခဲ့ပါတယ်။

၂၀၁၆ ခုနှစ်က မြန်မာနိုင်ငံအတွင်း အဓမ္မကျင့်မှု ၁၁၀၀ သာ ရှိရာကနေ ၂၀၁၈ ခုနှစ်မှာတော့ ၁၅၀၀ ‌ကျော်လာခဲ့ပြီး ၃ ပုံ ၂ ပုံလောက်မှာ ကလေးငယ်တွေ ပါဝင်နေပါတယ်။

ဒေါ်လှလှဝင်းကာ ဒီအရေအတွက်ကိုကြည့်ရင် မြန်မာနိုင်ငံမှာ လိင်ပညာပေးမှု နည်းနေတယ်ဆိုတာ ထင်ရှားနေတယ်လို့ ပြောကြားခဲ့ပါတယ်။

“မိဘတွေကတော့ ရင်ကြိုးရတာပေါ့။ ဒါပေမယ့် လိင်ပညာပေးမှုကို မလုပ်ကောင်းတဲ့အရာဖြစ် သတ်မှတ်လို့ မရတော့ဘူးဆိုတာ အချက်ပေးခေါင်းလောင်း ထိုးနေတာလည်း ဖြစ်ပါတယ်”

ပြီးခဲ့တဲ့လ နယူးယောက်မှာ ကျင်းပပြုလုပ်တဲ့ World Economic Forum မှာ ကမ္ဘာတစ်ဝှမ်း ထိပ်တန်း ဆိုရှယ် စွန့်ဦးတီထွင်လုပ်ငန်းရှင် ၄၀ ရဲ့ စာရင်းကို ထုတ်ပြန်ရာမှာ ဒေါ်လှလှဝင်းလည်း ပါဝင်လာပါတယ်။ မြန်မာနိုင်ငံက သိန်းနဲ့ချီတဲ့ကျောင်းသားတွေရဲ့ သင်ယူမှုနည်းလမ်းကို ပြုပြင်ပြောင်းလဲပေးတဲ့အတွက် ဒီလို ကမ္ဘာ့အသိအမှတ်ပြုမှုကို ရရှိခဲ့တာပါ။

သူမဟာ AR နည်းပညာကိုအသုံးပြုပြီး လူငယ်တွေရဲ့ သင်ယူမှုနည်းလမ်းကို ပြောင်းလဲပေးတာပါ။ ပြင်ပကမ္ဘာနဲ့ ဆော့ဖ်ဝဲကမ္ဘာကို ပေါင်းစပ်အသုံးပြုရတဲ့ အဲဒီ AR နည်းပညာဟာ ကမ္ဘာတစ်ဝှမ်း လူကြိုက်များ ကျော်ကြားပြီး နယ်ပယ်စုံမှာ အသုံးပြုနေကြပါတယ်။

ဒေါ်လှလှဝင်းရဲ့ 360ed ဟာ ၂၀၁၆ ခုနှစ်ကတည်းက အက်ပလီကေးရှင်းတွေ ထုတ်လုပ်ကာ ဓာတုဗေဒနဲ့ ဇီဝါဗေဒလို ကျောင်းဘာသာရပ်တွေကို ကျောင်းသားတွေ သင်ယူရာမှာ ပိုမိုလွယ်ကူအောင် လုပ်ဆောင်ပေးခဲ့ပါတယ်။

လိင်ပညာပေး

အခု လိင်ပညာပေး ပရောဂျက်ကိုတော့ သူမက ‘ဘေးကင်း’ လို့ အမည်ပေးထားပြီး ဩဂုတ်လမှာ စတင် မိတ်ဆက်ခဲ့တာပါ။

ဒီပရောဂျက်မှာ လိင်ပညာပေးစာပေတွေကို စာအုပ်ပုံစံနဲ့ရော၊ AR ပုံစံနဲ့ပါ ဖန်တီးထားပြီး လိင်ပညာပေးဆိုင်ရာ ရုပ်ပြစာအုပ်တွေ၊ ဂိမ်းတွေလည်း ပါဝင်ပါတယ်။ ဒါတွေက‌နေတစ်ဆင့် ကျောင်းသားတွေဟာ လိင်အင်္ဂါအကြောင်းတွေကနေ ကိုယ်ဝန်ဆောင်မှုအထိ လေ့လာ မှတ်သားနိုင်မှာ ဖြစ်ပါတယ်။

“ဆရာမတစ်ယောက်နဲ့ အမေတစ်ယောက်ဖြစ်တဲ့ကျွန်မ ဒီကဏ္ဍကို ဘာ့ကြောင့်စိတ်ဝင်စားလဲဆိုတော့ ဆယ်ကျော်သက်အရွယ်တွေကြောင့်ပါ။ သူတို့တွေဟာ ဒါတွေကို လေ့လာချင်ပေမယ့် ကျွန်မတို့မှာ သင်ပေးဖို့ နည်းလမ်းမရှိဘူး။ ‌ယောက်ျားနဲ့ မိန်းမ ရေကို တစ်ခွက်တည်းသောက်ရင်တောင် ကိုယ်ဝန်ရနိုင်တယ်လို့ မြန်မာနိုင်ငံက ဆယ်ကျော်သက်တော်တော်များများက ထင်နေကြတာ”

360ed က ထုတ်လုပ်တဲ့ လိင်ပညာပေး စာအုပ်တွေကို လက်ရှိမှာ ကျောင်းပေါင်း ၁၀၀ လောက်က လက်ခံအသုံးပြုနေပြီး AR နည်းပညာနဲ့ အကျွမ်းဝင်ရေးအတွက်လည်း ဆရာဆရာမတွေကို လေ့ကျင့်ပေးနေပါတယ်။

“ကျောင်းတွေမှာ လိင်ပညာပေးဖို့ ဆရာ၊ ဆရာမတွေ တော်တော်များများက ရှက်နေတာကြောင့် တော်တော်လေးကို လုပ်ယူရမယ့် အနေအထားပါ။ AR ကတော့ ပျော်စရာကောင်းတယ်။ ဒါ့ကြောင့် ဒီလို ရှက်တာရွံ့တာကို ကျော်လွှားနိုင်မယ်လို့ ကျွန်မတို့ မျှော်လင့်ထားပါတယ်”

Ref: Reuters