မွတ်စလင်အမျိုးသမီး ခရီးသွားများ အကြိုက်ဆုံးနိုင်ငံအဖြစ် မလေးရှား ရပ်တည်

အောက်တိုဘာ ၁၇၊ ၂၀၁၉
M-Media

-မွတ်စလင်အမျိုးသမီး ခရီးသွားတွေ အနှစ်သက်ဆုံးနဲ့ အဆင်ပြေဆုံး နိုင်ငံများစာရင်းကို ဒီကနေ့ ထုတ်ပြန်ခဲ့ရာမှာ မလေးရှားနိုင်ငံက ထိပ်ဆုံးမှာ ရှိနေပါတယ်။

အဲဒီစာရင်းကို Mastercard နဲ့ ဟာလာလ် ခရီးသွားအာဏာပိုင်အဖွဲ့ CrescentRating တို့က ပူးပေါင်းထုတ်ပြန်ခဲ့တာပါ။

မလေးရှားနိုင်ငံကို မွတ်စလင်အမျိုးသမီးခရီးသွားတွေ နှစ်သက်ရတဲ့ အကြောင်းအရင်းတွေထဲမှာ ဟာလာလ်အစားအသောက် ရရှိတာ၊ အမျိုးသမီးသီးသန့် ဝတ်ပြုခန်းတွေ ထားပေးထားတာ၊ အမျိုးသမီးသီးသန့် spa တွေရှိတာ၊ ရေကူးကန်တွေ၊ ကမ်းခြေတွေ၊ အလှပြင်ခန်းတွေရှိတာ၊ အများပြည်သူတွေနဲ့ သက်ဆိုင်တဲ့နေရာတွေမှာ ဟီဂျဘ်ခေါင်းဆောင်းပုဝါကို လွတ်လွတ်လပ်လပ် ဝတ်ဆင်ခွင့်ရတာတွေ ပါဝင်တယ်ပါတယ်။

အရှေ့တောင်အာရှက အများစုအပါအဝင် မွတ်စလင်အမျိုးသမီး ၃၃၀၀ လောက်ကို မေးမြန်းကာ ထုတ်ပြန်တဲ့ ဒီအဆင့်သတ်မှတ်ချက်ဟာ မွတ်စလင်အမျိုးသမီး ခရီးသွားတွေနဲ့ပတ်သက်ပြီး ပထမဆုံး ထုတ်ပြန်မှုလည်း ဖြစ်ပါတယ်။

မလေးရှားနိုင်ငံမှာ အစ္စလာမ့်အမွေအနှစ်ဆိုင်ရာ လေ့လာမှုအစီအစဉ်တွေ ထားပေးတာ၊ ရမ်ဇာန်ဥပုသ်လရောက်ရင် ဟိုတယ်တွေက မနက် အရုဏ်တက်ထမင်းနဲ့ ညနေ့ ဝါဖြေပွဲတွေ စီစဉ်‌ပေးတာ၊ ဘုရားဝတ်ပြုဖို့အတွက် အလွယ်တကူ ကိုလက်သန့်စင်နိုင်တဲ့ ရေချိုးခန်းတွေရှိနေတာတွေကလည်း မွတ်စလင်အမျိုးသမီးခရီးသွားတွေကို ဆွဲဆောင်နေတဲ့ အချက်တွေ ဖြစ်ပါတယ်။

မလေးရှားနောက်မှာ ယူအေအီး၊ တူရကီ၊ အင်ဒိုနီးရှားနဲ့ ဂျပန်တို့က အစဉ်လိုက် ရှိနေပါတယ်။

ဝင်ငွေမြင့်တက်လာတာ၊ ကောင်းမွန်တဲ့ပညာရေး ရရှိလာတာတွေကြောင့် ကမ္ဘာ့ခရီးသွားကဏ္ဍမှာ မွတ်စလင်အမျိုးသမီး ခရီးသွားအရေအတွက်ဟာ အလျင်အမြန် တိုးတက်လာတယ်လို့ Mastercard နဲ့ CrescentRating တို့ရဲ့ ထုတ်ပြန်ချက်မှာ ဖော်ပြထားပါတယ်။

မွတ်စလင်အမျိုးသမီးတွေဟာ တစ်နှစ်ကို ၂ ကြိမ်ကနေ၊ ၃ ကြိမ်အထိ အလည်အပတ်ခရီး သွားတတ်ကြပြီး မွတ်စလင်ခရီးသွား စုစုပေါင်း ပမာဏရဲ့ ထက်ဝက်နီးပါးလောက်ရှိနေတယ်လို့ ဆိုပါတယ်။

ပြီးခဲ့တဲ့နှစ်က မွတ်စလင်အမျိုးသမီး ခရီးသွားပေါင်း ၆၅ သန်းလောက် ရှိခဲ့ရာမှာ ၃၀ ရာခိုင်နှုန်းက တစ်ကိုယ်တော်ခရီသွားတွေ ဖြစ်ပါတယ်။ ထက်ဝက်ကျော်လောက်ဟာ နေထိုင်စားသောက်ရေး၊ ခရီးသွားလာရေးအတွက် ဆိုရှယ်မီဒီယာတွေကို အသုံးပြုကြပြီး ၆၅ ရာခိုင်နှုန်းက ခရီးသွားအေးဂျင့်တွေရဲ့ ခရီးစဉ်တွေကို ရွေးချယ်ခဲ့ကြပါတယ်။

Ref: Business Insider