ဟဂျ်ပြုသည့်အမျိုးသမီးများ အမျိုးသားအုပ်ထိန်းသူလိုသည့်စနစ်ကို ဆော်ဒီ ပယ်ဖျက်မည်

အောက်တိုဘာ ၂၀၊ ၂၀၁၉
M-Media

-ကမ္ဘာတစ်ဝှမ်းက အစ္စလာမ်ဘာသာဝင်အမျိုးသမီးတွေ ဟဂျ်ဘုရားဖူး လာရောက်တဲ့အခါ အမျိုးသားအုပ်ထိန်းသူပါမှ ခွင့်ပြုတဲ့စနစ်ကို ဆော်ဒီက ပယ်ဖျက်ဖို့ ရှိနေတယ်လို့ Arab News သတင်းဌာနက မနေ့မှာ ဖော်ပြခဲ့ပါတယ်။

ဆော်ဒီဟာ ခရီးသွားကဏ္ဍနဲ့ ဟဂျ်၊ အွမ္မရာ ဘုရားဖူးလုပ်ငန်း ဖွံ့ဖြိုးတိုးတက်ရေးအတွက် ပြုပြင်ပြောင်းလဲမှုတွေ လုပ်ဆောင်နေတာပါ။

ဟဂျ် ဘုရားဖူး၊ အွမ္မရာ ဘုရားဖူးခရီး သွားရောက်မယ့် အမျိုးသမီးတွေကို ဖခင်၊ ဦးလေး၊ အစ်ကို၊ မောင်၊ ခင်ပွန်း စတဲ့ အမျိုးသားအုပ်ထိန်းသူပါမှ ခွင့်ပြုတာ ဖြစ်ပါတယ်။ အဖွဲ့နဲ့ သွားမယ်ဆိုရင်လည်း အမျိုးသားအုပ်ထိန်းသူက ခွင့်ပြုကြောင်း ထောက်ခံချက်ကို တင်ပြရပါတယ်။

ဒါပေမယ့် လက်ရှိ ဆော်ဒီအစိုးရရဲ့ ဟဂျ်နှင့် အွမ္မရာ ဝန်ကြီးဌာနက ခရီးသွားလာမှုနဲ့ ဘုရားဖူးခရီးစဉ်တွေအတွက် ဗီဇာ လွယ်လွယ်ကူကူ ထုတ်ပေးနိုင်အောင် စီစဉ်နေပြီး၊ ဟဂျ်ဘုရားဖူးခရီးစဉ် လာရောက်မယ့် အမျိုးသမီးတွေ အမျိုးသားအုပ်ထိန်းသူ ပါရမယ့်စနစ်ကို ပယ်ဖျက်တော့မယ့် အနေအထားရှိတယ်လို့ Arab News က ဆိုပါတယ်။

ကမ္ဘာတစ်ဝှမ်းက အစ္စလာမ်ဘာသာဝင်တွေ အွမ္မရာဟ်ဘုရားဖူးခရီးစဉ်ကို အွန်လိုင်း Maqam ဝဘ်ဆိုက်ကနေ ဝယ်ယူနိုင်အောင် ဆော်ဒီက စီစဉ်ပေးထားပြီး ပြီးခဲ့တဲ့နှစ်အတွင်း ခရီးသွား ၁.၁ သန်းနီးပါးလောက် ဒီစနစ်ကို အသုံးပြုခဲ့ပါတယ်။

Ref: Arab