အာကာသတွင် အမျိုးသမီး ၂ ဦး ပထမဆုံးအကြိမ် ‌လမ်းလျှောက်မှု သမိုင်းမှတ်တိုင်သစ် ဖြစ်လာ

အောက်တိုဘာ ၂၀၊ ၂၀၁၉
M-Media

-လူသားတွေရဲ့ အာကာသ စူစမ်းရှာဖွေမှုသမိုင်းတစ်လျှောက် ပထဆုံးအကြိမ်အဖြစ် အမျိုးသမီး အာကာသယာဉ်မှူး ၂ ဦး သောကြာနေ့က အာကာသမှာ လမ်းလျှောက်ခဲ့ပြီး ဒါဟာ နာဆာအတွက် သမိုင်းမှတ်တိုင်သစ်တစ်ခုလည်း ဖြစ်ပါတယ်။

အာကာသယာဉ်မှူး ခရစ္စတီးနား ကို့ချ်နဲ့ ဂျက်ဆီကာ မီရ်တို့ဟာ နိုင်ငံတကာ အာကာသစခန်း ISS အပြင်ကိုထွက်ကာ ဆိုလာဓာတ်အားပေးစနစ်က ဘထ္ထရီတစ်လုံးကို လဲလှယ်တပ်ဆင်ခဲ့တာပါ။ ဒီဆောင်ရွက်မှုကို တစ်ကမ္ဘာလုံးက စိတ်ဝင်တစားနဲ့ စောင့်ကြည့်ခဲ့ကြပါတယ်။

အိမ်ဖြူတော်မှာလည်း အမေရိကန်သမ္မတနဲ့ အစိုးရထိပ်တန်းခေါင်းဆောင်တွေဟာ ဒီလမ်းလျှောက်မှုကို တိုက်ရိုက်ကြည့်ရှုခဲ့ကြပြီး သမ္မတထရမ့်က အာကာသယာဉ်မှူးတွေကို ချီးကျူးပြောဆိုခဲ့ပါတယ်။

“ကျေးဇူးပါရှင့်။ ကျွန်မတို့ရဲ့အရင်မှာလည်း အာကာသထွက် လမ်းလျှောက်တဲ့ အမျိုးသမီးယာဉ်မှူးတွေ ရှိတဲ့အတွက် အရမ်းကြီး ချီးကျူးမခံဝံ့ပါဘူး။ အခုတစ်ခါက အမျိုးသမီးနှစ်ဦး ပထမဆုံးအကြိမ် လမ်းလျှောက်မှုသာ ဖြစ်ပါတယ်။ ကျွန်မတို့အတွက် ဒါဟာ လုပ်ရမယ့်အလုပ်ကို လုပ်လိုက်တာပါ” လို့ အာကာသယဉ်မှူး ဂျက်ဆီကာ မီရ်က ထရမ့်ကို ပြန်လည်ပြောကြားခဲ့ပါတယ်။

အရင်က အမေရိကန် အာကာသအေဂျင်စီ နာဆာရဲ့ လုပ်ငန်းစဉ်တွေမှာ အမျိုးသမီး အာကာသယာဉ်မှူးတွေ အာကာသမှာ လမ်းထွက်လျှောက်ကြပေမယ့် ၂ ဦးပါတဲ့အဖွဲ့မှာ အမျိုးသမီး ၁ ဦးသာ ပါဝင်လေ့ရှိပါတယ်။ သောကြာနေ့က လမ်းလျှောက်မှုမှာတော့ ၂ ဦးစလုံး အမျိုးသမီးအာကာသယာဉ်မှူးတွေ ဖြစ်ပါတယ်။

ခရစ္စတီးနား ကို့ချ်နဲ့ ဂျက်ဆီကာ မီရ်တို့ရဲ့ အာကာသလမ်းလျှောက်မှုဟာ ၁၉၉၈ ခုနှစ်က နိုင်ငံတကာ အာကာသစခန်းကို စတင်တပ်ဆင်ပြီးနောက်ပိုင်း ၂၂၁ ကြိမ်မြောက် လမ်းလျှောက်မှု ဖြစ်ပါတယ်။

အာကာသမှာ ပထမဆုံး လမ်းလျှောက်သူက ဆိုဗီယက် အာကာသယာဉ်မှူး အလက်ဇီ လီယိုနော့ဗ်ဖြစ်ပြီး ၁၉၆၅ ခုနှစ်မှာ လျှောက်ခဲ့ပါတယ်။ ၁၉၈၄ ခုနှစ်မှာတော့ ဆိုဗီယက်အာကာသယာဉ်မှူး ဆဗက်လာတာ ဆာဗစ်ကာယာဟာ အာကာသမှာ ပထမဆုံးလမ်းလျှောက်တဲ့ အမျိုးသမီးအဖြစ် မှတ်တမ်းဝင်ခဲ့ပါတယ်။

Ref: CBS News