တမန်တော်ကိုစော်ကားသည့်ပို့စ်ကြောင့် ဘင်္ဂလားဒေ့ရှ်တွင် ဆန္ဒပြမှုဖြစ်၊ ၄ ဦးသေဆုံး

အောက်တိုဘာ ၂၁၊ ၂၀၁၉
M-Media

-တမန်တော် မုဟမ္မဒ်ကိုစော်ကားပြောဆိုတဲ့ Facebook ပို့စ်တစ်ခုကြောင့် ဘင်္ဂလားဒေ့ရှ်မှာ ဆန္ဒပြမှု ဖြစ်ပွားခဲ့ပြီး အနည်းဆုံး လူ ၄ ဦး သေဆုံးကာ ဘင်္ဂလားဒေ့ရှ်ဝန်ကြီးချုပ် ရှိခ်ဟာဆီနာက တည်တည်ငြိမ်ငြိမ်ရှိကြဖို့ ပြည်သူလူထုကို တိုက်တွန်းခဲ့ပါတယ်။

ဟိန္ဒူအမျိုးသားတစ်ဦးက တမန်တော်ကို ဆိုရှယ်မီဒီယာမှာ စော်ကားရေးသားတယ်ဆိုတဲ့သတင်းတွေ ထွက်လာခဲ့ပြီးတဲ့နောက် နိုင်ငံရဲ့ အကြီးဆုံး ဘိုလာကျွန်းက ‌ဘိုရ်ဟာနူဒင်မြို့မှာ လူပေါင်း ၂၀၀၀၀ လောက်က စနေနေ့မှာ ဆန္ဒပြခဲ့ကြတာ ဖြစ်ပါတယ်။

အဲဒီ ဟိန္ဒူအမျိုးသားကို ရဲတပ်ဖွဲ့က ဖမ်းဆီးကာ ဘာသာ သာသနာညှိုးနွမ်းစေမှုနဲ့ တရားစွဲဆိုထားပြီး ဆန္ဒပြလူအုပ်ကတော့ အဲဒီလူကို ကွပ်မျက်ဖို့ တောင်းဆိုခဲ့ပါတယ်။

ဆန္ဒပြမှုအတွင်း ရဲတပ်ဖွဲ့ရဲ့ပစ်ခတ်မှုကြောင့် အနည်းဆုံး လူ ၄ ဦးသေဆုံးပြီး၊ ၅၀ လောက် ဒဏ်ရာရခဲ့ပါတယ်။ ရဲတပ်ဖွဲ့က ဆန္ဒပြလူအုပ်ဟာ ခဲလုံးတွေနဲ့ ပစ်တာကြောင့် မိမိကိုယ်ကို ကာကွယ်တဲ့အနေနဲ့ ပြန်လည်ပစ်ခတ်ရတာဖြစ်တယ်လို့ ထုတ်ပြန်ခဲ့ပါတယ်။

လက်ရှိမှာတော့ ဘိုလာကျွန်းမှာ လုံခြုံရေးတပ်ဖွဲ့တွေကို တိုးမြှင့်ချထားပါတယ်။ ဒဏ်ရာရသူတွေထဲမှာ အသက်အန္တရာယ် စိုးရိမ်ရတဲ့သူတွေ ရှိတာကြောင့် သေဆုံးသူအရေအတွက် မြင့်တက်လာနိုင်တယ်လို့ ဒေသတွင်း ကျန်းမာရေးဝန်ထမ်းတွေက ပြောကြားခဲ့ပါတယ်။

မုသာဝါဒ

ဘင်္ဂလားဒေ့ရှ်ဝန်ကြီးချုပ် ရှိခ်ဟာဆီနာက ဘာသာရေးစော်ကားမှုနဲ့ တရားစွဲဆိုခံရတဲ့ ဟိန္ဒူအမျိုးသားဟာ တမန်တော်ကိုစော်ကားတဲ့ပို့စ်ကို တကယ်ရေးတင်တာမဟုတ်ဘဲ သူ့ရဲ့အကောင့်ကို ခိုးယူသွားတဲ့သူတွေက နိုင်ငံအတွင်း ဘာသာရေးတင်းမာမှုဖြစ်လာအောင် လုပ်ဆောင်တာလို့ ပြောကြားခဲ့ပါတယ်။

“မင်းမဲ့စရိုက်ပုံစံမျိုးဖြစ်လာအောင် Facebook ကနေ ကောလဟာလတွေဖြန့်နေတာကို ကျွန်မတို့ တွေ့ရပါတယ်။ ဒီလူတွေကဘယ်သူတွေလဲ။ သူတို့ရဲ့ ရည်ရွယ်ချက်က ဘာလဲ။ ပြည်သူတွေအနေနဲ့ သည်းခံကြဖို့ ကျွန်မတောင်းဆိုပါတယ်။ လက်ခမောင်းခတ်ချင်တဲ့ တော‌ကြောင်တွေကိုတော့ ရှာဖွေပြီး ကျွန်မတို့ အရေးယူသွားပါမယ်”

ဘိုလာဒေသရဲ့ ရဲတပ်ဖွဲ့ ဒုတိယအကြီးအကဲ ရှိခ် ဆာဘီရ်ကလည်း စွပ်စွဲခံရတဲ့ ဟိန္ဒူအမျိုးသားဟာ စခန်းကို လာရောက်အဖမ်းခံခဲ့ပြီး သူ့အကောင့် ဟက်ခံရကြောင်း ပြောကြားခဲ့တယ်လို့ မီဒီယာတွေရဲ့ မေးမြန်းမှုကို ဖြေကြားခဲ့ပါတယ်။

၂၀၁၆ ခုနှစ်က နိုင်ငံအရှေ့ပိုင်းမြို့တစ်ခုမှာ ဟိန္ဒူဘုရားကျောင်းတွေကို လူအုပ်က တိုက်ခိုက်မှု ဖြစ်ပွားခဲ့ပြီး အစ္စလာမ်ဘာသာရဲ့ အထွဋ်အမြတ်နေရာတွေကို ဟိန္ဒူတစ်ဦးက Facebook ကနေ စော်ကားရေးသားတယ်ဆိုတဲ့သတင်းကြောင့် ဖြစ်ပါတယ်။

ဗုဒ္ဓဘာသာဝင်တစ်ဦးက ကုရ်အာန်ကျမ်းစာကို စော်ကားတဲ့ပို့စ်တစ်ခု ဆိုရှယ်မီဒီယာမှာ လွှင့်တင်မှုကြောင့် ၂၀၁၂ ခုနှစ်ကလည်း ကော့ဇ်ဘဇားခရိုင်က ဗုဒ္ဓဘာသာ ဘုရားကျောင်းကန်‌တွေ၊ နေအိမ်တွေ၊ အဆောက်အဦးတွေ တိုက်ခိုက်ဖျက်ဆီးခံခဲ့ရပါတယ်။

ဖျက်ဆီးခံရတဲ့သာသနိကအဆောက်အဦးတွေ အားလုံးကို ဘင်္ဂလားဒေ့ရှ်အစိုးရက နောက်ပိုင်းမှာ ပြန်လည်ပြုပြင် တည်ဆောက်ပေးခဲ့ပါတယ်။

Ref: AFP