အထင်ကရဗလီကို မီးသတ်ပိုက်နှင့် ထိုးမိသည့်အတွက် ဟောင်ကောင်အကြီးအကဲ ပြန်တောင်းပန်

အောက်တိုဘာ ၂၂၊ ၂၀၁၉
M-Media

-ဆန္ဒ‌ပြသူတွေကို မီးသတ်ပိုက်နဲ့ ဖြိုခွဲရာမှာ အထင်ကရ ဗလီဝတ်ကျောင်းတော်ကို ထိခိုက်မိသလို‌ ဖြစ်သွားတဲ့အတွက် ဟောင်ကောင်အကြီးအကဲ ကာရီလမ်က နိုင်ငံအတွင်းမှာရှိတဲ့ အစ္စလာမ်ဘာသာဝင်လူ့အဖွဲ့အစည်းကို တောင်းပန်လိုက်ပါတယ်။

ဟောင်ကောင်မှာ အစိုးရဆန့်ကျင်ရေးဆန္ဒပြမှု ဖြစ်ပွားနေတာဟာ ၅ လတာ ကြာမြင့်နေပြီ ဖြစ်ပါတယ်။ တနင်္ဂနွေနေ့က Kowloon ရပ်ကွက်မှာ ဆန္ဒပြမှုအတွင်း ရဲတပ်ဖွဲ့က မီးသတ်ပိုက်နဲ့ ဖြိုခွဲရာမှာ Kowloon ဗလီရဲ့ တံခါးနဲ့ ပရ၀ုဏ်ကိုပါ ထိမှန်ခဲ့တာ ဖြစ်ပါတယ်။

Kowloon ဗလီဟာ ဟောင်ကောင်ရဲ့ အထင်ကရနေရာတစ်ခု ဖြစ်ပါတယ်။ မီးသတ်ပိုက်မှာ အသုံးပြုတဲ့ရေဟာ အပြာရောင်ဖြစ်တာကြောင့် ဗလီနဲ့ ဗလီအပြင်ဘက်က လမ်းတွေမှာ အပြာရောင်အစွန်းတွေ ကျန်ရစ်ခဲ့ပြီး ရဲတပ်ဖွဲ့ရဲ့ ဒီလုပ်ရပ်အတွက် ဟောင်ကောင်ပြည်သူတွေက ဆိုရှယ်မီဒီယာမှာ ဝေဖန်ခဲ့ကြပါတယ်။

ဂျပန်ဧကရာဇ်ရဲ့ နန်းတက်ပွဲကို မသွားခင် ဟောင်ကောင်ခေါင်းဆောင် ကာရီလမ်ဟာ မနေ့က ဗလီဝတ်ကျောင်းတော်ကို လာရောက်ခဲ့ပြီး အစ္စလာမ်ဘာသာဝင် လူ့အဖွဲ့အစည်းကို တောင်းပန်ခဲ့ပါတယ်။

ရှေ့ဆောင်အီမာမ် မိုဟာမက် အာရှဒ်က မိမိတို့အနေနဲ့ ဒီတောင်းပန်မှုကို လက်ခံခဲ့ပြီး အစ္စလာမ်ဘာသာဝင်လူ့အဖွဲ့အစည်းဟာ ရှေ့ဆောက်ပြီးတော့ ဟောင်ကောင်မှာ ငြိမ်းချမ်းစွာ နေထိုင်နိုင်မယ်လို့ မျှော်လင့်ကြောင်း ပြောကြားခဲ့ပါတယ်။

ဟောင်ကောင်ရဲတပ်ဖွဲ့ကထုတ်ပြန်တဲ့ ကြေငြာချက်မှာ Kowloon ဗလီကို မီးသတ်ပိုက်နဲ့ ထိုးမိတာဟာ မတော်တဆဖြစ်ပွားခဲ့တဲ့ ကိစ္စဖြစ်ပြီး မိမိတို့အနေနဲ့ ဘာသာရေးလွတ်လပ်ခွင့်ကို အလေးထားကာ၊ ဝတ်ပြုရာနေရာတွေအားလုံးကို ကာကွယဖို့ ကြိုးစားသွားမယ်လို့ ဖော်ပြထားပါတယ်။

တနင်္လာနေ့ညနေပိုင်းမှာတော့ ဟောင်ကောင် စည်ပင်သာယာရေးအဖွဲ့က ဗလီနဲ့ ဗလီအရှေ့မှာ စွန်းထင်းနေတာကို လာရောက်သန့်ရှင်းပေးခဲ့ပါတယ်။

Ref: Reuters