မိန်းကလေးငယ်တစ်ဦးကို မီးရှို့သတ်သည့် မွတ်စလင်ဘာသာရေးဆရာနှင့် အပေါင်းအပါ ၁၆ ဦးကို ဘင်္ဂလားဒေ့ရှ်က သေဒဏ်ပေး

အောက်တိုဘာ ၂၄၊ ၂၀၁၉
M-Media

-ဆယ်ကျော်သက် အမျိုးသမီးငယ်ကို မီးရှို့သတ်ဖြတ်ရာမှာ ပါဝင်ခဲ့တဲ့ ဗလီဆရာနဲ့ အပေါင်းအပါ ၁၆ ဦးကို ဘင်္ဂလာဒေ့ရှ်က ဒီကနေ့မှာ သေဒဏ်ချမှတ်ခဲ့ပါတယ်။

နိုင်ငံအရှေ့တောင်ပိုင်း ဖီနီမြို့က Sonagazi Islamia Senior Fazil ဆိုတဲ့ မဒ်ရာဆာ ဘာသာရေးစာသင်ကျောင်းမှာ အသက် ၁၈ နှစ်အရွယ် နူဆရတ် ဂျာဟန်ဟာ ဧပြီလက မီးရှို့သတ်ဖြတ်ခံလိုက်ရတာပါ။ သတ်ဖြတ်မှုကို မွတ်စလင်ဘာသာရေးဆရာ ဆီရဂျ်ဒေါင်လာရဲ့ အပေါင်းအပါတွေက ကျူးလွန်ခဲ့တာဖြစ်ပြီး၊ လိင်စော်ကားမှုနဲ့ ဖမ်းဆီးခံထားရတဲ့ ဒေါင်လာက သတ်ဖြတ်ခိုင်းခဲ့တာလို့ ရဲတပ်ဖွဲ့က ပြောကြားခဲ့ပါတယ်။

ဘာသာရေးဆရာဒေါင်လာဟာ ဂျာဟန်ကို လိင်ပိုင်းဆိုင်ရာ စော်ကားမှုပြုလုပ်ခဲ့ပြီး ဂျာဟန်က ရဲတပ်ဖွဲ့ကို တိုင်ကြားခဲ့ရာမှာ မကျေနပ်တဲ့အတွက် ကိုယ့်ကိုယ်ကိုယ် သတ်သေတဲ့ပုံစံမျိုးဖြစ်အောင် ဖန်တီးကာ သတ်ဖြတ်ခိုင်းခဲ့တာ ဖြစ်ပါတယ်။

ဒီအမှုအတွက် ဖမ်းဆီးခံထားရသူတွေထဲမှာ ၁၂ ဦးက သူတို့ကျူးလွန်ကြောင်း ဝန်ခံခဲ့ကြပါတယ်။ အစိုးရရှေ့နေအဖွဲ့က ခေါင်းဆောင် ဟာဖစ်ဇ် အဟ်မဒ်က ပြစ်ဒဏ်ချမှတ်မှုကို ကြိုဆိုခဲ့ပြီး ဘင်္ဂလားဒေ့ရှ်မှာ ရာဇဝတ်ဘေး ဘယ်သူမှ ပြေးမလွတ်ဘူးဆိုတာ သက်သေပြလိုက်တာ ဖြစ်တယ်လို့ ပြောကြားခဲ့ပါတယ်။

“ဒါဟာ ကျွန်တော်တို့တိုင်းပြည် တရားရေးစနစ်ရဲ့ အောင်မြင်မှုတစ်ခု ဖြစ်ပါတယ်”

ဂျာဟန်ရဲ့ အစ်ကိုဖြစ်သူ မဟ်မူဒူလ် ဟာဆန် နိုမန်ကလည်း ပြစ်ဒဏ်အတွက် ကျေနပ်တယ်လို့ ပြောကြားခဲ့ပါတယ်။

ဒီသတ်ဖြတ်မှုဖြစ်ပွားပြီးတဲ့နောက် ဘင်္ဂလားဒေ့ရှ်နိုင်ငံတစ်ဝှမ်းမှာ ဆန္ဒပြမှုတွေ ဖြစ်ပေါ်ခဲ့ပြီး ကျူးလွန်သူတွေကို ထိထိရောက်ရောက်အပြစ်ပေးရေး ပြည်သူတွေက တောင်းဆိုခဲ့ကြပါတယ်။

မီးရှို့မှုကြောင့် ကြိုးတွေပြတ်ကာ ဂျာဟန်လွတ်မြောက်လာခဲ့ပြီး သူမကို ကျူးလွန်မှုတွေနဲ့ပတ်သက်လို့ အသေးစိတ ပြောပြနိုင်ခဲ့ပါတယ်။ ခန္ဓာကိုယ်ရဲ့ ၈၀ ရာခိုင်နှုန်း မီးလောင်သွားတာကြောင့် ဂျာဟန်ဟာ အခင်းဖြစ်ပွားပြီး ၅ ရက်အကြာ ဆေးရုံမှာ ကွယ်လွန်သွားခဲ့ပါတယ်။

Ref: Reuters