အရှေ့ဂျေရုစလင်တွင် ပါလက်စတိုင်းနေအိမ်များ ဖျက်ဆီးခံရမှု စံချိန်တင်မြင့်တက်

အောက်တိုဘာ ၂၅၊ ၂၀၁၉
M-Media

-အရှေ့ဂျေရုစလင်မှာ အခုနှစ်အတွင်း အစ္စရေးက ဖြိုချဖျက်ဆီးခဲ့တဲ့ ပါလက်စတိုင်းအိမ်အရေအတွက်ဟာ အနည်းဆုံး ၁၄၀ လောက် ရှိနေပြီး ၂၀၀၄ ခုနှစ်နောက်ပိုင်း တစ်နှစ်အတွင်း စံချိန်တင်ပမာဏဖြစ်တယ်လို့ လူ့အခွင့်အရေးအဖွဲ့ B’Tselem က မနေ့မှာ ထုတ်ပြန်လိုက်ပါတယ်။

အစ္စရေးဟာ ပါလက်စတိုင်းပိုင်နက်ဖြစ်တဲ့ အရှေ့ဂျေရုစလင်ကို ၁၉၆၇ ခုနှစ်ကတည်းက ကျူးကျော်သိမ်းပိုက် ပိတ်ဆို့ထားတာပါ။ အရှေ့ဂျေရုစလင်မှာ ပါလက်စတိုင်းတွေရဲ့အိမ်တွေ ဖြိုချဖျက်ဆီးခံရမှုကို B’Tselem က ၂၀၀၄ ခုနှစ်ကတည်းက စောင့်ကြည့် စစ်တမ်းကောက်လာတာ ဖြစ်ပါတယ်။

အခုနှစ်အတွင်း အသက် ၁၈ နှစ်အောက် ၁၂၇ ဦးအပါအဝင် ပါလက်စတိုင်းပြည်သူ ၂၃၈ ဦးဟာ အိုးအိမ်တွေ ဆုံးရှုံးခဲ့တယ်လို့ B’Tselem ရဲ့ ထုတ်ပြန်ချက်မှာ ဖော်ပြထားပါတယ်။ ၂၀၁၆ ခုနှစ်က ပါလက်စတိုင်းနေအိမ် ၉၂ ဖြိုချခံရပြီး အခုနှစ်မတိုင်ခင် တစ်နှစ်အတွင်း အမြင့်ဆုံးပမာဏ ဖြစ်ပါတယ်။

ဆောက်လုပ်ခွင့်ပါမစ် ရယူထားခြင်းမရှိတဲ့အတွက် ဖြိုချရတာလို့ အစ္စရေးအာဏာပိုင်တွေက ပြောကြားထားပေမယ့်၊ စောင့်ကြည့်လေ့လာသူက အစ္စရေးဟာ ပါလက်စတိုင်းတွေ ပါမစ်လျှောက်တဲ့အခါမှာ လွယ်လွယ်ကူကူ ထုတ်ပေးခြင်း မရှိတာကြောင့် ပါမစ်မရှိတဲ့ အဆောက်အဦးတွေ ဖြစ်လာတာလို့ ထောက်ပြ‌ပြောဆိုခဲ့ပါတယ်။

ပါလက်စတိုင်းပိုင် အရှေ့ဂျေရုစလင်မှာ အစ္စရေးရဲ့ ကျူးကျော်အိမ်ယာ ဆောက်လုပ်မှုအရေအတွက်ဟာလည်း သိသိသာသာ မြင့်တက်လာပါတယ်။

Ref: Aljazeera