၂၇ နှစ်အရင်က အစုလိုက်အပြုံလိုက် သတ်ဖြတ်မှုအတွက် ဆာ့ဘ်စစ်သားတစ်ဦး ထောင်နှစ် ၂၀ ကျ

အောက်တိုဘာ ၃၁၊ ၂၀၁၉
M-Media

-လွန်ခဲ့တဲ့ ၂၇ နှစ်က ဘော့စနီယက်လူမျိုး အရပ်သားတွေကို အစုလိုက်အပြုံလိုက် သတ်ဖြတ်ရာမှာ ပါဝင်သူ ဆာ့ဘ်စစ်သားဟောင်းတစ်ဦးကို ဆာရာယေဗိုတရားရုံးက မနေ့မှာ ထောင်ဒဏ် နှစ် ၂၀ ချမှတ်လိုက်ပါတယ်။

အသက် ၆၄ နှစ်အရွယ် ရာဒိုမီရန် ဆွန်ဂျာဆိုသူဖြစ်ပြီး ပြစ်သစ်နိုင်ငံက ပြီးခဲ့တဲ့နှစ်မှာ လွှဲပြောင်းပေးခဲ့တာပါ။ ဆွန်ဂျာဟာ ၁၉၉၂ ခုနှစ် ဇွန်လ ၁၄ ရက်နေ့က ဘော့စနီးယားနိုင်ငံအရှေ့ပိုင်း ဗီဆီဂရဒ်မြို့က အိမ်တစ်အိမ်မှာ ဘော့စနီယက် အရပ်သား အနည်းဆုံး ၂၆ ဦးကို မီးရှို့သတ်ဖြတ်မှုမှာ ပါဝင်ခဲ့သူဖြစ်ပါတယ်။ သေဆုံးသူတွေထဲမှာ အမျိုးသမီးတွေ၊ သက်ကြီးရွယ်အို‌တွေအပြင် ၂ ရက်သား ကလေးငယ်တစ်ဦးလည်း ပါဝင်ခဲ့ပါတယ်။

ဒီအဖြစ်အပျက်ဟာ ၁၉၉၂ ခုနှစ်ကနေ ၁၉၉၅ ခုနှစ်အထိ ဖြစ်ပွားခဲ့တဲ့ ဘော့စနီးယားစစ်ပွဲမှာ ဘော့စနီယက်တွေ အစုလိုက်အပြုံလိုက် အသတ်ခံရမှုတွေထဲက တစ်ခုလည်း ဖြစ်ပါတယ်။

တရားသူကြီး Enida Hadziomerovic က ၁၉၉၂ ခုနှစ် ဇွန်လ ၁၄ ရက်နေ့က သတ်ဖြတ်မှုမှာ ဘော့စနီယက် အရပ်သားတွေကို သော့ပိတ်ကာ ပေါက်ကွဲစေတတ်တဲ့ပစ္စည်းတွေနဲ့ မီးရှို့ခဲ့တာဖြစ်ကြောင်း၊ ဆွန်ဂျာဟာ အရပ်သားတွေအပေါ် စစ်ရာဇဝတ်မှု ကျူးလွန်ခဲ့တဲ့အတွက် ထောင်ဒဏ် နှစ် ၂၀ ချမှတ်လိုက်ကြောင်း ပြောကြားခဲ့ပါတယ်။

ဆာ့ဘ်စစ်သားတွေဟာ အိမ်ထဲက‌လူတွေ ထွက်မပြေးနိုင်အောင် အိမ်ရှိရာဘက်ကို ရိုက်ဖယ်တွေနဲ့ အဆက်မပြတ် ပစ်ခတ်မှုတွေ လုပ်ခဲ့တယ်လို့လည်း တရားသူကြီးက ဆိုပါတယ်။ အမိန့်ချမှုအတွင်း သေဆုံးသွားသူ တစ်ဦးချင်းစီရဲ့ အမည်တွေကိုလည်း ဖတ်ကြားခဲ့ပါတယ်။

ဆွန်ဂျာဟာ ဓားပြတိုက်မှု အရပ်သားတွေကို မတရားသဖြင့် ဖမ်းဆီးမှုတွေနဲ့လည်း အပြစ်ရှိကြောင်း တွေ့ရှိခဲ့ပါတယ်။

ဗီဆီဂရဒ်မြို့က အဲဒီအဖြစ်အပျက်မှာ စုစုပေါင်း အရပ်သား ၅၇ ဦး အိမ်ထဲမှာ ပိတ်လှောင်ခံခဲ့ရတာဖြစ်ပြီး လွတ်မြောက်သွားသူတွေဟာ ဆွန်ဂျာရဲ့အမှုမှာ တရားရုံးကို လာရောက် သက်သေထွက်ဆိုခဲ့ကြပါတယ်။

ဒီသတ်ဖြတ်မှုမှာ ပါဝင်ခဲ့တဲ့ ဆာ့ဘ် စစ်သားတွေထဲက ၂ ဦးကို ၂၀၁၂ ခုနှစ်မှာ The Hague နိုင်ငံတကာ ခုံသမာဓိရုံးက ထောင်ဒဏ် ၂၇ နှစ် ချမှတ်ခဲ့ပါတယ်။ ဆွန်ဂျာဟာ ပြင်သစ်နိုင်ငံမှာ နှစ်အတော်ကြာ တိမ်းရှောင် နေထိုင်ခဲ့ပြီး ၂၀၁၄ ခုနှစ်မှာ ပြင်သစ်အာဏာပိုင်တွေက ဖမ်းဆီးခဲ့ပေမယ့် နောက်ပိုင်းမှာ ခြေချုပ်နဲ့ ပြန်လည် လွှတ်ပေးခဲ့ပါတယ်။ ၂၀၁၈ ခုနှစ် ဇွန်လမှာတော့ ထပ်မံဖမ်းဆီးကာ ဘော့စနီးယားကို လွှဲပြောင်းပေးအပ်ခဲ့ပါတယ်။

ဘော့စနီးယားစစ်ပွဲအတွင်း ဆာ့ဘ်တပ်ဖွဲ့ဟာ ဘော့စနီယက်တွေ၊ ခရိုအက်လူမျိုးတွေကို အစုလိုက်အပြုံလိုက် သတ်ဖြတ်ခဲ့ကြပါတယ်။ စုစုပေါင်း လူ ၁ သိန်းလောက် သေဆုံးခဲ့ရာမှာ အများစုက ဘော့စနီယက်တွေ ဖြစ်ပါတယ်။

Ref: Aljazeera