ဦးဝီရသူ၏ ဘဏ်အကောင့်များကို ရပ်ဆိုင်းထားရန် တရားရုံးက အမိန့်ထုတ်

အောက်တိုဘာ ၃၁၊ ၂၀၁၉
M-Media

-ဖမ်း၀ရမ်းထုတ်ခံရပြီးတဲ့နောက် ထွက်ပြေးတိမ်ရှောင်နေတဲ့ အမျိုးသားရေးဘုန်းကြီး ဦးဝီရသူရဲ့ ဘဏ်အကောင့်တွေကို ရပ်ဆိုင်းထားဖို့အတွက် ရန်ကုန်အနောက်ပိုင်းခရိုင်တရားရုံးက မနေ့မှာ ၀ရမ်းတစ်ခု ထုတ်ပြန်ခဲ့ပါတယ်။

ထွက်ပြေးတိမ်းရှောင်ခြင်းမပြုမီ ဦးဝီရသူနေထိုင်ခဲ့တဲ့ မန္တလေးမြို့ မဟာအောင်မြေမြို့နယ် ရဲတပ်ဖွဲ့က မြန်မာ့စီးပွားရေးဘဏ်ခွဲ (၃) က ဦးဝီရသူရဲ့ ဘဏ်အကောင့်မှာ ငွေကျပ် သိန်း ၁၂၀ ကျော် ရှိနေပြီး၊ ဧရာ၀တီဘဏ် ဘဏ်ခွဲ ၁၁ က အကောင့်မှာတော့ ၄၅ သိန်းလောက် ရှိနေတယ်လို့ ထုတ်ပြန်ထားပါတယ်။

“ဒီဘဏ်နှစ်ခုမှာပဲ ဒီဘုန်းကြီးရဲ့ ပိုင်ဆိုင်မှုတွေကို တွေ့ရတယ်လို့ ရဲတပ်ဖွဲ့က ပြောပါတယ်။ ဒီငွေထွေကို ထုတ်ယူတာ၊ အခြားတစ်ယောက်ကို လွှဲပေးတာမျိုး လုပ်လို့မရအောင် ကျွန်တော်တို့ အကောင့်တွေကို ရပ်ဆိုင်းလိုက်ပါတယ်” လို့ တရားရုံးရဲ့ ပြန်ကြားရေးအရာရှိ ဦးဇော်ဇော်ထွန်းက ပြောကြားခဲ့ပါတယ်။

နိုင်ငံတော်အစိုးရကို အကြည်ညိုပျက်စေမှု ပုဒ်မ ၁၂၄ (က) အရ ဖမ်း၀ရမ်းထုတ်ခံရပြီးတဲ့နောက် ဦးဝီရသူဟာ မေလမှာ ထွက်ပြေးတိမ်းရှောင်သွားတာ ဖြစ်ပါတယ်။ လက်ရှိမှာတော့ ဦးဝီရသူကို မျက်ကွယ် တရားစီရင်မှုတွေ လုပ်ဆောင်နေပါတယ်။

ပုဒ်မ ၁၂၄ (က) အရ အပြစ်ရှိကြောင်းထင်ရှားရင် ထောင်ဒဏ် ၇ နှစ်ကနေ အမြင့်ဆုံး ထောင်ဒဏ် နှစ် ၂၀‌ ဖြစ်စေ ဒဏ်ငွေဖြစ်စေ ချမှတ်ခံရမှာ ဖြစ်ပါတယ်။

ဖမ်း၀ရမ်းအပြင် ဦးဝီရသူပိုင်ဆိုင်တဲ့ ပစ္စည်းတွေကို သိမ်းဆည်းဖို့အတွက်လည်း တရားရုံးက ၀ရမ်းထုတ်ခဲ့ပေမယ့် ဦးဝီရသူ နေထိုင်တဲ့ ဘုန်းကြီးကျောင်းနဲ့ သူတာဝန်ယူထားတဲ့ ကျောင်းဆောင်တွေဟာ သူပိုင်ပစ္စည်းတွေ မဟုတ်တာကို တွေ့ခဲ့ရပါတယ်။

Ref: Irrawaddy

(ဧရာ၀တီသတင်းဌာန အင်္ဂလိပ်ပိုင်းမှ သတင်းကို ကောက်နှုတ်ဘာသာပြန်ဆိုခြင်း ဖြစ်ပါသည်)