IS ခေါင်းဆောင်အား သုတ်သင်မှု ဗီဒီယိုတစ်စိတ်တစ်ပိုင်းကို အမေရိကန် ထုတ်ပြန်

အောက်တိုဘာ ၃၁၊ ၂၀၁၉
M-Media

-IS အကြမ်းဖက်အဖွဲ့ခေါင်းဆောင် အဘူ ဘာကာ အလ်-ဘဂ္ဂဒါဒီကို သုတ်သင်တဲ့ စစ်ဆင်‌ရေးရဲ့ ဗီဒီယို အစိတ်အပိုင်းတစ်ခု၊ ဓာတ်ပုံတွေနဲ့ စစ်ဆင်ရေး အချက်အလက်တစ်ချို့ကို အမေရိကန်က မနေ့မှာ ထုတ်ပြန်လိုက်ပါတယ်။

ဆီးရီးယားနိုင်ငံ အနောက်မြောက်ပိုင်း အစ်ဒလစ်ပြည်နယ်က ရွာတစ်ရွာမှာ စနေနေ့က အမေရိကန် အထူးတပ်ဖွဲ့ဝင်တွေရဲ့ စစ်ဆင်ရေးအတွင်း ဘဂ္ဂဒါဒီဟာ အသေခံဗုံးခွဲကာ အဆုံးစီရင်သွားခဲ့တာပါ။ စစ်ဆင်ရေးမှာ ဘဂ္ဂဒါဒီရဲ့ အနီးကပ်လူယုံ တော်တော်များများကို သုတ်သင်နိုင်ခဲ့သလို၊ အရေးပါတဲ့ စာရွက်စာတမ်းတွေ၊ အီလက်ထရောနစ် ပစ္စည်းတွေကိုလည်း သိမ်းဆည်းရမိခဲ့ပါတယ်။

လက်စားချေမှုတွေ ရှိလာနိုင်

အမေရိကန် အလယ်ပိုင်းစစ်ဌာနချုပ်အကြီးအကဲ ဗိုလ်ချုပ် ဖရန့် မက်ကင်ဇီက ‌ဘဂ္ဂဒါဒီရဲ့ ရုပ်အလောင်းကို သေဆုံးပြီး ၂၄ နာရီအတွင်းမှာပဲ ပင်လယ်ထဲ မြုပ်နှံခဲ့တယ်လို့ မနေ့က သတင်းစာရှင်းလင်းပွဲမှာ ပြောကြားခဲ့ပါတယ်။

ဘဂ္ဂဒါဒီ အသေခံဗုံးခွဲတဲ့အချိန်မှာ သူနဲ့အတူ သားသမီး ၃ ယောက်လည်း သေဆုံးသွားတယ်လို့ စောစောပိုင်းမှာ သမ္မတထရမ့်က ပြောကြားခဲ့ပေမယ့် ဗိုလ်ချုပ် မက်ကင်ဇီက ၂ ဦးသာဖြစ်ပြီး အသက် ၁၂ အောက်တွေလို့ ယူဆရကြောင်း ထည့်သွင်းပြောဆိုခဲ့ပါတယ်။

နေအိမ်ထဲက ကလေးငယ် ၁၁ ဦးကို အထိအခိုက်မရှိ ကယ်တင်နိုင်ခဲ့သလို၊ အသေခံဗုံးခွဲအင်္ကျီတွေ ဝတ်ဆင်ထားတဲ့ အမျိုးသမီး ၄ ဦးနဲ့ အမျိုးသား ၂ ဦးတို့ကိုတော့ လက်နက်ချဖို့ ငြင်းဆန်တဲ့အတွက် အသေပစ်သတ်ခဲ့တယ်လို့ မက်ကင်ဇီက ဆိုပါတယ်။

ဘဂ္ဂဒါဒီသေဆုံးသွားပေမယ့် IS ကို လုံး၀ချေမှုန်းလိုက်ပြီလို့ ယူဆလို့မရသေးဘဲ အချိန်တစ်ခုယူကာ ခေါင်းဆောင်ရွေးပြီး လူပြန်စုလာနိုင်သလို၊ လစ်စားချေတိုက်ခိုက်မှုတွေလည်း လုပ်ဆောင်လာနိုင်တယ်လို့လည်း ဗိုလ်ချုပ်က သတိပေးခဲ့ပါတယ်။

ဗီဒီယိုထုတ်ပြန်

ဘဂ္ဂဒါဒီ သုတ်သင်မှု စစ်ဆင်ရေးရဲ့ ဗီဒီယိုအစိတ်အပိုင်းတစ်ချို့ကိုလည်း အမေရိကန်ကာကွယ်ရေးဝန်ကြီးဌာနက ထုတ်ပြန်ခဲ့ပါတယ်။

အဲဒီ အဖြူအမဲ ဗီဒီယိုမှာ ဘဂ္ဂဒါဒီ ပုန်းအောင်းရာ အဆောက်အဦးနားကို အမေရိကန်အထူးတပ်ဖွဲ့ဝင်တွေ ချဉ်းကပ်သွားတာ၊ ဘယ်သူဘယ်ဝါမှန်းမသိတဲ့ လက်နက်ကိုင်တွေက ကွန်မန်ဒိုတွေကိုချပေးတဲ့ အမေရိကန် ရဟတ်ယာန်ဉ်ကို လှမ်းပစ်တာ၊ သေနတ်သမားတွေအပေါ် ရဟတ်ယာဉ်ပေါ်ကနေ ဗုံးကြဲချတာ၊ စီးနင်းတိုက်ခိုက်မှုအပြီး အဆောက်အဦး မီးလောင်နေတာ စတဲ့ ပုံရိပ်တွေ ပါဝင်ပါတယ်။

စစ်ဆင်ရေးအပြီးမှာတော့ အမေရိကန်ဟာ ဘဂ္ဂဒါဒီပုံးအောင်းခဲ့ရာနေအိမ်ကို ဗုံးကြဲဖြိုချခဲ့ပြီး ဒီပုံရိပ်တွေကိုလည်း ဗီဒီယိုမှာ တွေ့ရပါတယ်။

Ref: Aljazeera