ပြုပြင်ပြောင်းလဲမှုအပြီး ဆော်ဒီခရီးသွားဗီဇာလျှောက်ထားမှု ပိုမိုမြင့်တက်

နိုဝင်ဘာ ၁၊ ၂၀၁၉
M-Media

-ခရီးသွားလုပ်ငန်း ဖွံ့ဖြိုးရေးအတွက် ကန့်သတ်ချက်တစ်ချို့ကို ဖယ်ရှားလိုက်ပြီးတဲ့နောက် ၃၃ ရက်အတွင်း ခရီးသွားဗီဇာ ၇ သောင်းကျော် ထုတ်ပေးခဲ့ရပြီး တရုတ်ခရီးသွားတွေ အများစုဖြစ်တယ်လို့ ဆော်ဒီအာဏာပိုင်တွေက သတင်းထုတ်ပြန်ပါတယ်။

စက်တင်ဘာ ၂၇ ရက်နေ့ကနေ အောက်တိုဘာ ၃၀ ရက်နေ့အထိ ကုန်းလမ်း၊ ရေလမ်း၊ လေကြောင်းတွေကနေ ဆော်ဒီနိုင်ငံထဲ ဝင်ရောက်ခဲ့တဲ့ ကမ္ဘာလှည့်ခရီးသွားအရေအတွက်ဟာ ၂၈၁၉၀ ဦး ရှိခဲ့တာပါ။

ခရီးသွားဗီဇာ ရယူခဲ့တဲ့ နိုင်ငံခြားသားခရီးသွား အရေအတွက်ကတော့ ၇၇၀၆၉ ဦး ရှိပါတယ်။ ဗီဇာလျှောက်ထားသူ အများစုက တရုတ်ခရီးသွားတွေဖြစ်ပြီး ၁၇၉၈၈ ဦး ရှိခဲ့ပါတယ်။ ဗြိတိန်ခရီးသွားတွေက ဗီဇာလျှောက်ထားမှုမှာ ဒုတိယနေရာ လိုက်နေပြီး၊ အမေရိကန်ခရီးသွားတွေက တတိယနေရာမှာ ရှိနေပါတယ်။

ဆော်ဒီနိုင်ငံကူးလက်မှတ် ထုတ်ပေးရေးအဖွဲ့ Jawazat က ကမ္ဘာလှည့်ခရီးသွားတွေအနေနဲ့ ဗီဇာကို အွန်လိုင်း (visa.visitsaudi.com) ကနေဖြစ်စေ၊ စမတ်ဖုန်းအက်ပလီကေးရှင်းကနေဖြစ်စေ ကြိုတင်လျှောက်ထားနိုင်ပြီး၊ လေဆိပ်တွေ၊ နယ်စပ်ဂိတ်တွေမှာလည်း ဆိုက်ရောက်ဗီဇာ လျှောက်ထားနိုင်တယ်လို့ ထုတ်ပြန်ထားပါတယ်။

ဆော်ဒီဗီဇာ လျှောက်ထားဖို့အတွက် နိုင်ငံကူးလက်မှတ်သက်တမ်းဟာ အနည်းဆုံး ၆ လ ရှိရမှာဖြစ်ပြီး ပြက္ခဒိန်တစ်နှစ်အတွင်း ဆော်ဒီနိုင်ငံအတွင်းမှာ အများဆုံး ရက်ပေါင်း ၉၀ အထိ နေထိုင်နိုင်မှာ ဖြစ်ပါတယ်။

Ref : Saudigazeete