အမေရိကန်နှင့် မဆွေးနွေးဟု အီရန်အဓိပတိပြော

နိုဝင်ဘာ ၄၊ ၂၀၁၉
M-Media

-အမေရိကန်နဲ့ ဆွေးနွေးညှိနှိုင်းမှုတွေ ဆောင်ရွက်မယ်ဆိုတဲ့ သတင်းတွေကို အီရန် အဓိပတိ အယာတိုလာ အလီခါမေနီက ပယ်ချလိုက်ပါတယ်။

“အမေရိကန်နဲ့ ဆွေးနွေးမှုတွေ ပြုလုပ်တာဟာ ပြဿနာအားလုံးရဲ့ အဖြေပဲလို့ မြင်နေတာတွေဟာ လုံး၀ မှားယွင်းပါတယ်။ အမေရိကန်ဟာ လုံး၀ အလျော့ပေးမှာ မဟုတ်တာကြောင့် သူတို့နဲ့ ဆွေးနွေးရင်လည်း ဘာအဖြေမှ ထွက်မှာ မဟုတ်ပါဘူး” လို့ တီဟီရန်မြို့က အမေရိကန်သံရုံးကို စီးနင်းမှု နှစ် ၄၀ မြောက် နှစ်ပတ်လည်နေ့ မိန့်ခွန်းမှာ ပြောကြားခဲ့ပါတယ်။

အမေရိကန်ကျောထောက်နောက်ခံပြု ရှားဘုရင်ကို ပြုတ်ကျပြီးတဲ့နောက် ၉ လပျော့ပျော့ ၁၉၇၉ ခုနှစ် နိုဝင်ဘာ ၄ ရက်နေ့မှာ ဖြစ်ပွားခဲ့တဲ့ အမေရိကန်သံရုံးကို ကျောင်းသားတွေ စီးနင်းမှုဟာ ရက်ပေါင်း ၄၄၄ ရက် ကြာမြင့်ခဲ့ပါတယ်။

ကျောင်းသားတွေဟာ အမေရိကန်မှာ ဆေးကုနေတဲ့ ရှားဘုရင်ကို အီရန်ထံ လွှဲပြောင်းပေးဖို့ တောင်းဆိုခဲ့ကြတာပါ။ နောက်ဆုံးမှာ စီးနင်းမှုအတွင်း ပိတ်မိနေတဲ့ အမေရိကန်နိုင်ငံသား ၅၂ ဦး လွတ်မြောက်လာခဲ့ပေမယ့် ၁၉၈၀ ခုနှစ်မှာတော့ အမေရိကန်ဟာ အီရန်နဲ့ သံအဆက်အသွယ် ဖြတ်တောက်ခဲ့ပါတယ်။

၂၀၁၅ ခုနှစ်က ရရှိခဲ့တဲ့ နျူသဘောတူညီချက်ကနေ နှုတ်ထွက်ကြောင်း ပြီးခဲ့တဲ့နှစ်မှာ အမေရိကန်က ကြေငြာခဲ့ပြီးတဲ့နောက် အီရန်နဲ့ အမေရိနကန်တို့အကြား တင်းမာမှုတွေ ပိုမိုမြင့်တက်လာခဲ့တာပါ။ အမေရိကန်ဟာ အီရန်အပေါ် ပိတ်ဆို့မှုတွေကိုလည်း တိုးမြှင့်ပြုလုပ်ခဲ့ပါတယ်။

Ref: Aljazeera