ဆီးရီးယားတိုက်ပွဲတစ်ခုအတွင်း မြန်မာနိုင်ငံသား ဆေးမှူးတစ်ဦး သေဆုံး

နိုဝင်ဘာ ၄၊ ၂၀၁၉
M-Media

-ဆီးရီးယားနိုင်ငံအရှေ့မြောက်ပိုင်းမှာ တူရကီကျောထောက်နောက်ခံပြု တိုက်ခိုက်ရေးသမားတွေရဲ့ တိုက်ခိုက်မှုကြောင့် ပရဟိတအဖွဲ့က မြန်မာနိုင်ငံသား ဆေးမှူးတစ်ဦး သေဆုံးသွားတယ်လို့ သိရပါတယ်။

တူရကီဟာ ပြီးခဲ့တဲ့လကစလို့ ဆီးရီးယားနိုင်ငံမြောက်ပိုင်းကို ကျူးကျော်ဝင်ရောက်ကာ ကာ့ဒ်တပ်ဖွဲ့တွေကို တိုက်ခိုက်ခဲ့ပြီး လက်ရှိအချိန်အထိ အပြန်အလှန်တိုက်ခိုက်မှုတွေလည်း ဖြစ်ပွားနေပါတယ်။

Free Burma Rangers ပရဟိတအဖွဲ့ကို တည်ထောင်ထားသူ အမေရိကန်စစ်သားဟောင်း ဒေးဗစ်ယူဘန့်က တူရကီနယ်စပ်အနီး တာလ် တာမာရ်မြို့မြောက်ဖက် ၃ မိုင်အကွာမှာ ဖြစ်ပွားတဲ့ တိုက်ခိုက်မှုအတွင်း သူတို့အဖွဲ့ဝင် မြန်မာနိုင်ငံသား ဆေးမှူး Zau Seng သေဆုံးသွားတယ်လို့ မနေ့က ထုတ်ပြန်တဲ့ ဗီဒီယိုမှာ ပြောကြားခဲ့ပါတယ်။

Zau Seng ရဲ့ ဦးခေါင်းကို တစ်ဖက်ကပစ်လိုက်တဲ့ မော်တာကျည်ထိမှန်ခဲ့တာဖြစ်ပါတယ်။ တိုက်ခိုက်မှုကြောင့် Free Burma Rangers အဖွဲ့ဝင် အီရတ်နိုင်ငံသားတစ်ဦးလည်း ဒဏ်ရာရခဲ့ပါတယ်။

ယူဘန့်က တိုက်ခိုက်မှုအတွက် Free Syrian Army နဲ့ တူရကီတို့ကို ပြစ်တင်ပြောဆိုခဲ့ပါတယ်။

ကာဒ့်တပ်ဖွဲ့ဦးဆောင်တဲ့ SDF အဖွဲ့ကလည်း Free Burma Rangers အဖွဲ့က ဆေးမှူးတစ်ဦး သေဆုံးသွားတာကို အတည်ပြုခဲ့ပါတယ်။

တူရကီတပ်ဖွဲ့တွေဟာ အကူအညီပေးရေးယာဉ်တန်းကို တိုက်ခိုက်တယ်ဆိုတဲ့ သတင်းတွေကို တူရကီကာကွယ်ရေးဝန်ကြီး‌ဌာနက ငြင်းဆိုခဲ့ပါတယ်။

Free Burma Rangers အဖွဲ့ဟာ လူမျိုးပေါင်းစုံပါဝင်တဲ့ အကူအညီပေးရေးအဖွဲ့တစ်ခု ဖြစ်ပြီး မြန်မာ၊ ဆီးရီးယား၊ အီရတ်၊ ကာ့ဒ်ဒေသတွေမှာ အကူအညီပေးရေးလုပ်ငန်းတွေကို လုပ်ဆောင်နေပါတယ်။

Ref: Aljazeera