မျိုးရိုးဇာတ်မတူဘဲ လက်ထပ်သည့်အတွက် အိန္ဒိယတွင် ဇနီးမောင်နှံ ၂ ဦး ခဲပေါက်သတ်ခံရ

နိုဝင်ဘာ ၈၊ ၂၀၁၉
M-Media

-မျိုးနွယ်ဇာတ် မတူတဲ့သူကို အိမ်ထောင်ပြုခဲ့တဲ့ အမျိုးသမီးနဲ့ ခင်ပွန်းဖြစ်သူကို ဆွေမျိုးအရင်းအချာတွေက ‌ခဲနဲ့ထုသတ်မှုတစ်ခု ဖြစ်ပွားခဲ့တယ်လို့ အိန္ဒိယရဲတပ်ဖွဲ့က မနေ့မှာ ထုတ်ပြန်လိုက်ပါတယ်။

နိုင်ငံတောင်ပိုင်း ကာရ်နာတာကာပြည်နယ်က ရွာတစ်ရွာမှာ ဖြစ်ပွားခဲ့တာပါ။ အသတ်ခံလိုက်ရတဲ့ အမျိုးသမီးဟာ အသက် ၂၉ နှစ်အရွယ်ရှိပြီး လွန်ခဲ့တဲ့ ၃ နှစ်က မိသားစုရဲ့ဆန္ဒနဲ့ဆန့်ကျင်ကာ ဇာတ်မတူတဲ့ မျိုးရိုးက အမျိုးသားတစ်ဦးနဲ့ လက်ထပ်ခဲ့ပြီး အိမ်ကထွက်ပြေးကာ အခြားဒေသတွေမှာ ပြောင်းရွှေ့နေထိုင်ခဲ့ပါတယ်။

ပြီးခဲ့လမှာတော့ အဲဒီအမျိုးသမီးဟာ ခင်ပွန်းဖြစ်သူနဲ့အတူ မိသားစုရှိရာရွာကို ပြန်လာပြီး မိသားစုတွေနဲ့ တွေ့ဆုံခဲ့ပါတယ်။

“ဗုဒ္ဓဟူးနေ့မှာ ရွာသားတွေက သူတို့ကိုတွေ့ပြီး ကောင်မလေးရဲ့အစ်ကိုကို အကြောင်းကြားခဲ့တယ်။ သူက လူစုပြီး ဒီလင်မယားနှစ်ယောက်ကို တိုက်ခိုက်ကာ ခဲတွေနဲ့ ထုသတ်ခဲ့ပါတယ်။ အမျိုးသမီးရဲ့ အစ်ကိုနဲ့ ဦးလေးအပါအဝင် အဓိက သံသယရှိသူ ၃ ဦးကို ဖော်ထုတ်ထားနိုင်ပါတယ်” လို့ ဒေသခံရဲတပ်ဖွဲ့တာဝန်ရှိသူ ဂုရု ရှန့်သ်က AFP သတင်းဌာနကို ပြောကြားခဲ့ပါတယ်။

အိန္ဒိယနိုင်ငံ အထူးသဖြင့် ကျေးလက်ဒေသတွေမှာ မျိုးနွယ်ဇာတ် မတူတဲ့သူကို လက်ထပ်တဲ့ ဇနီးမောင်နှံတွေ မကြာခဏ သတ်ဖြတ်ခံရလေ့ရှိပြီး ဒါကို ‘ဂုဏ်သိက္ခာအတွက်သတ်ဖြတ်မှု’ လို့ ခေါ်ဆိုကြပါတယ်။ ပုံမှန်အားဖြင့် ဆွေမျိုးတွေ၊ ရွာလူကြီးတွေက ပူးပေါင်းဆောင်ရွက်ကြတာဖြစ်ပြီး မိသားစုရဲ့ ဂုဏ်သိက္ခာကို ထိန်းသိမ်းဖို့အတွက်လို့ ဆိုပါတယ်။

ကုလရဲ့ မှတ်တမ်းတွေအရ ကမ္ဘာတစ်ဝှမ်းမှာ နှစ်စဉ် ဒီလိုသတ်ဖြတ်မှုပေါင်း ၅၀၀၀ လောက်ဖြစ်ပွားပြီး အဲဒီအထဲက ၁ ထောင်ဟာ အိန္ဒိယနိုင်ငံမှာ ဖြစ်ပွားတာ ဖြစ်ပါတယ်။

အိန္ဒိယတရားရုံးချုပ်က ဒီသတ်ဖြတ်မှုကို ကျူးလွန်သူတွေအပေါ် အမြင့်ဆုံး သေဒဏ်အထိချမှတ်ဖို့ ၂၀၁၁ ခုနှစ်မှာ ဆုံးဖြတ်ခဲ့ပါတယ်။

Ref: AFP