ဖောင်ဒေးရှင်းငွေ တလွဲသုံးမှုအတွက် အမေရိကန်သမ္မတ ဒေါ်လာ ၂ သန်း ပေးဆောင်ရမည်

နိုဝင်ဘာ ၈၊ ၂၀၁၉
M-Media

-၂၀၁၆ ခုနှစ် ရွေးကောက်ပွဲ မဲဆွယ်ရေးလုပ်ငန်းမှာ ပရဟိတလုပ်ငန်းတစ်ခုက ရန်ပုံငွေတွေ အလွဲသုံးစားပြုမှုအတွက် သမ္မတထရမ့်အနေနဲ့ ကန်ဒေါ်လာ ၂ သန်း ပြန်လည်ပေးဆောင်ဖို့အတွက် နယူးယောက်တရားရုံးက မနေ့မှာ အမိန့်ချမှတ်လိုက်ပါတယ်။

ထရမ့်ဟာ Donald J Trump Foundation အမည်တဲ့ ပရဟိတလုပ်ငန်းတစ်ခုကို တည်ထောင်ထားတာပါ။ ဒါပေမယ့် ဒီအဖွဲ့ဟာ ထရမ့်ရဲ့အကျိုးစီးပွားအတွက် ချက်လက်မှတ်တစ်ခုထက် မပိုဘူးလို့ အစိုးရရှေ့နေတွေက စွပ်စွဲခဲ့ပြီးတဲ့နောက် ၂၀၁၈ ခုနှစ်မှာ ဒီအဖွဲ့ကို ပိတ်သိမ်းခဲ့ပါတယ်။

မနေ့က တရားသူကြီး ဆာလီယန် စကာပူလာရဲ့ ဆုံးဖြတ်ချက်မှာ ထရမ့်နဲ့ သူ့ရဲ့ သားသမီး ၃ ဦး ဦးဆောင်တဲ့ ပရဟိတအဖွဲ့တွေဟာ နိုင်ငံရေးမှာ ပါဝင်ဆောင်ရွက်လို့ မရဘူးလို့ ဖော်ပြထားပါတယ်။

ထရမ့်ဟာ Donald J Trump Foundation က အမေရိကန်စစ်ပြန်တွေအတွက် ကောက်ယူထားတဲ့ ရန်ပုံငွေကို ၂၀၁၆ ခုနှစ် အိုင်အိုဝါ ရွေးကောက်မှာ အသုံးပြုခဲ့ပြီး ဒါဟာ ‘ယုံကြည်မှုကို အလွဲသုံးစားလုပ်တာ’ ဖြစ်တယ်လို့ တရားသူကြီးက ပြောကြားခဲ့ပါတယ်။

ဒီအတွက် ထရမ့်ဟာ ကိုယ်ပိုင်ငွေထဲကနေ ဒဏ်ငွေ ၂ သန်း ပေးဆောင်ရမှာဖြစ်ပြီး အဲဒီငွေတွေကို ပရဟိတအဖွဲ့ ၈ ခုကို ခွဲဝေပေးသွားမှာ ဖြစ်ပါတယ်။

Donald J Trump Foundation အဖွဲ့ရဲ့ ဒါရိုက်တာတွေဖြစ်ကြတဲ့ ထရမ့်ရဲ့သားနဲ့သမီး အဲရစ်ထရမ့်၊ အိုင်ဗန်ကာ ထရမ့်တို့အနေနဲ့ ပရဟိတအဖွဲ့ တာဝန်ရှိသူတွေ ဒါရိုက်တာတွေ လိုက်နာရမယ့် တာဝန်၀တ္တရားဆိုင်ရာ သင်တန်းကို မဖြစ်မနေ တက်ရောက်ဖို့လည်း တရားရုံးက အမိန့်ချခဲ့ပါတယ်။

Ref: BBC