သောကြာဂြိုဟ်ကို အာကာသယာဉ်လွှတ် လေ့လာရန် အိန္ဒိယ စီစဉ်နေ

နိုဝင်ဘာ ၁၀၊ ၂၀၁၉
M-Media

-အာကာသ စူးစမ်းလေ့လာရေးစီမံကိန်း ၃ ခု လုပ်ဆောင်ထားတဲ့ အိန္ဒိယနိုင်ငံဟာ သောကြာဂြိုဟ် (Venus) ကို လေ့လာဖို့အတွက် ပစ်မှတ်ထား ဆောင်ရွက်လာပါတယ်။

အိန္ဒိယ အာကာသ စူးစမ်းလေ့လာရေးအဖွဲ့ ISRO က သိပ္ပံပညာရှင်တွေဟာ ဒီလေ့လာမှုအတွက် အိန္ဒိယအစိုးရထံမှာ ခွင့်ပြုချက်တောင်းဖို့ ပြင်ဆင်နေပြီး လာမယ့် နှစ်အနည်းငယ်အတွင်းမှာ အာကာသယာဉ် လွှတ်တင်သွားဖို့ ရှိနေပါတယ်။

ISRO အဖွဲ့က သိပ္ပံပညာရှင် နီဂါ ရှာဂျီက ဒီခရီးစဉ်ရဲ့ အဓိက ရည်မှန်းချက်ဟာ သောကြာဂြိုဟ်မျက်နှာပြင်နဲ့ ‌မြေဆီလွှာကို လေ့လာဖို့ဖြစ်တယ်လို့ အခုတစ်ပတ် အမေရိကန်ပြည်ထောင်စုမှာ ပြုလုပ်ခဲ့တဲ့ သောကြာဂြိုဟ် ကျွမ်းကျင်သူများ အစည်းအဝေးမှာ ပြောကြားခဲ့ပါတယ်။

အာကာသယာဉ် တည်ဆောက်ဖို့အတွက် သောကြာဂြိုဟ်နဲ့ပတ်သက်တဲ့ အချက်အလက်တွေကို တစ်နှစ်အတွင်း ISRO က စုဆောင်းဖို့ ရှိနေပါတယ်။ ခရီးစဉ်အတွင်း ဂြိုဟ်ရဲ့ လေထု၊ သဘာ၀ပတ်ဝန်းကျင်အခြေအနေ စတာတွေကိုလည်း လေ့လာသွားမယ်လို့ ရှာဂျီက ဆိုပါတယ်။

အစိုးရကသာ ဒီစီမံကိန်းကို ခွင့်ပြုမယ်ဆိုရင် ၂၀၂၃ ခုနှစ်မှာ အာကာသယာဉ် လွှတ်တင်နိုင်ဖို့ ISRO က စီစဉ်ထားပါတယ်။

အိန္ဒိယနိုင်ငံဟာ ၂၀၀၉ ခုနှစ်မှာ လပတ်လမ်းကို စူးစမ်းလေ့လာရေးယာဉ် စေလွှတ်ခဲ့ပြီး၊ ၂၀၁၃ ခုနှစ်မှာတော့ အင်္ဂါဂြိုဟ်ပတ်လမ်းကို စူးစမ်းလေ့လာရေး ယာဉ်တစ်စီး အောင်မြင်စွာ စေလွှတ်နိုင်ခဲ့ပါတယ်။

၂၀၁၉ ခုနှစ် ဇူလိုင်လမှာ ဒုတိယအကြိမ်မြောက် လကမ္ဘာ စူးစမ်းလေ့လာရေး ‌အာကာသယာဉ်တစ်စင်းကို စေလွှတ်ခဲ့ပြီး လပေါ်ကို ဆင်းသက်ဖို့ ရည်ရွယ်ခဲ့ပေမယ့် မအောင်မြင်ခဲ့ပါဘူး။ ISRO အကြီးအကဲ ဒေါက်တာ ကေ စီဗန်က လပေါ်ကို ဆင်းသက်လေ့လာမယ့် နောက်ထပ်အာကာသယာဉ်တစ်စင်းကို မကြာခင် စေလွှတ်သွားမယ်လို့ အခုလအစောပိုင်းမှာ ပြောကြားခဲ့ပါတယ်။

Ref: Space.com