အစ္စရေးကို လယ်ယာလုပ်ပိုင်ခွင့်ပေးထားသည့် ဒေသနှစ်ခုကို ဂျော်ဒန်ပြန်သိမ်း

နိုဝင်ဘာ ၁၁၊ ၂၀၁၉
M-Media

-အစ္စရေးကို ဆယ်စုနှစ်ချီ လယ်ယာလုပ်ပိုင်ခွင့်ပေးထားတဲ့ ဒေသနှစ်ခုကို ဂျော်ဒန်က မနေ့မှာ ပြန်လည် သိမ်းယူလိုက်ပါတယ်။

အစ္စရေးနဲ့ကပ်နေတဲ့ al-Baqoura နဲ့ al-Ghumar ဒေသတွေဖြစ်ပြီး ၁၉၉၄ ခုနှစ် အစ္စရေး-ဂျော်ဒန် ငြိမ်းချမ်းရေးသဘောတူညီချက်အရ ဒီဒေသတွေရဲ့ အချုပ်အခြာအာဏာကို ဂျော်ဒန်က ပိုင်ဆိုင်ပေမယ့် အစ္စရေးလယ်သမားတွေကို လုပ်ပိုင်ခွင့်ပေးထားတာ ဖြစ်ပါတယ်။

ဒါပေမယ့် ဒီသဘောတူညီချက်ကို သက်တမ်းမတိုးတော့ဖို့ ဂျော်ဒန်ပြည်သူတွေက ဖိအားပေးလာတာကြောင့် ၂၀၁၈ ခုနှစ်မှာ ဂျော်ဒန်ဘုရင် အဘ်ဒူလာ ၂ က အစ္စရေးကို ၁ နှစ် အချိန်ပေးခဲ့ပါတယ်။

ငြိမ်ချမ်းရေးစာချုပ် ချုပ်ဆိုထားပေမယ့် အစ္စရေးနဲ့ ဂျော်ဒန်တို့အကြား ပြီးခဲ့တဲ့နှစ်တွေမှာ တင်းမာမှုတွေ မြင့်တက်လာခဲ့ပါတယ်။ ဂျော်ဒန်ဟာ ပါလက်စတိုင်းနိုင်ငံ တူထောင်နိုင်ငံရေး အပြည့်အဝေ ထောက်ခံထားပြီး အစ္စရေး-ပါလက်စတိုင်း ငြိမ်းချမ်းရေးလုပ်ငန်းစဉ် တိုးတက်မှုမရှိတဲ့အတွက် စိတ်ပျက်ကြောင်းလည်း ထုတ်ဖော်ပြောဆိုထားပါတယ်။

ပြီးခဲ့တဲ့လမှာ ဂျော်ဒန်ဟာ အစ္စရေးက သူတို့ရဲ့သံမတ်ကို ခေတ္တ ပြန်လည်ခေါ်ယူခဲ့ပြီး ဂျော်ဒန်နိုင်ငံသား ၂ ဦးကို အစ္စရေးက တရားလက်လွတ် ဖမ်းဆီးမှုအတွက် ဖြစ်ပါတယ်။ ၂၀၁၇ ခုနှစ်တုန်းကလည်း ဂျော်ဒန်မြို့တော် အမ်နန်က အစ္စရေးသံရုံးရဲ့ လုံခြုံရေးအစောင့်ဟာ ဂျော်ဒန်နိုင်ငံသား ၂ ဦးကို သတ်ဖြတ်ခဲ့ပါတယ်။

နယ်စပ်ကမြေတွေကို ပြန်သိမ်းခဲ့ပေမယ့် ဂျေရုစလင်က အစ္စလာမ်နဲ့ ခရစ်ယာန်တို့ရဲ့ သာသနိက အဆောက်အအုံတွေကို ထိန်းသိမ်းစောင့်ရှောက်နေရတာကြောင့် ဂျော်ဒန်ဟာ အစ္စရေးနဲ့ ဆက်လက်ပတ်သက်နေရအုံးမှာ ဖြစ်ပါတယ်။

Ref: Aljazeera