အီရန်က ယူရေနီယံသန့်စင်မှု ပြန်လုပ်နေဟု IAEA အတည်ပြု

နိုဝင်ဘာ ၁၂၊ ၂၀၁၉
M-Media

-နိုင်ငံတောင်ပိုင်း Fordow မြေအောက် နျူကလီးယားစက်ရုံမှာ အီရန်က ယူရေနီယံ သန့်စင်မှုတွေကို စတင်လုပ်ဆောင်နေပြီး နောက်ထပ်လည်း ထပ်တိုးလုပ်ဆောင်သွားဖို့ရှိတယ်လို့ နိုင်ငံတကာ အနုမြူစွမ်းအင်အေဂျင်စီ IAEA က မနေ့မှာ ပြောကြားခဲ့ပါတယ်။

၂၀၁၅ ခုနှစ် နျူသဘောတူညီချက်ကနေ နှုတ်ထွက်ကြောင်း အမေရိကန်က ၂၀၁၈ ခုနှစ် မေလမှာ ကြေငြာကာ အီရန်အပေါ်ပိတ်ဆို့မှုတွေ ပြန်လည်လုပ်ဆောင်ပြီးတဲ့နောက်ပိုင်း အီရန်ကလည်း သဘောတူညီချက်ပါ သတ်မှတ်ချက်တွေ လိုက်နာမှုကို တစ်ဆင့်ပြီးတစ်ဆင့် လျော့ချလာခဲ့တာ ဖြစ်ပါတယ်။

Fordow နျူစက်ရုံမှာ ယူရေနီယံသန့်စင်မှု ပြန်လည်ပြုလုပ်တာဟာ လိုက်နာမှုလျော့ချမှုမှာ သိသာထင်ရှားတဲ့အဆင့် ဖြစ်ပါတယ်။ လေကြောင်းကနေ ဗုံးကြဲတိုက်ခိုက်မှုကို ရှောင်ရှားနိုင်ဖို့အတွက် အီရန်ဟာ Fordow နျူစက်ရုံကို တောင်တစ်ခုအောက်မှာ ဆောက်လုပ်ထားပြီး ၂၀၀၉ ခုနှစ်မှာ IAEA စုံစမ်းစစ်ဆေးမှူးတွေကို ဝင်ခွင့်ပေးခဲ့ပါတယ်။

၂၀၁၅ ခုနှစ် နျူသဘောတူညီချက်အရ ဒီစက်ရုံမှာ ယူရေနီယံ သန့်စင်မှုလုပ်ငန်းကို ကန့်သတ်ပေမယ့် သုတေနသလုပ်ငန်းအတွက် အချို့ centrifuge တွေကို‌ အသုံးပြုခွင့်ပေးထားပါတယ်။ ‌IAEA က ထုတ်ပြန်တဲ့ ၃ လပတ်အစီရင်ခံစာမှာတော့ အီရန်ဟာ Fordow စက်ရုံမှာ ယူရေနီယံသန့်စင်မှုတွေ ဆက်လက်လုပ်ဆောင်နေတယ်လို့ ဖော်ပြထားပါတယ်။

အမေရိကန်ကတော့ အီရန်ရဲ့ နျူကိစ္စ၊ ဒုံးကျည်ကိစ္စနဲ့ အရှေ့အလယ်ပိုင်းမှာ အီရန်ရဲ့ အခန်းကဏ္ဍတွေအားလုံး လွှမ်းခြုံနိုင်မယ့် သဘောတူညီချက်ရအောင် ဖိအားပေးသွားမယ်လို့ ပြောကြားထားပါတယ်။ ဥရောပသမဂ္ဂအပါအဝင် ၂၀၁၅ သဘောတူညီချက်မှာ လက်မှတ်ထိုးထားတဲ့ အခြားနိုင်ငံတွေကလည်း အီရန်ရဲ့ လုပ်ရပ်တွေအတွက် စိုးရိမ်မိတယ်လို့ ပြောကြားခဲ့ပါတယ်။

Ref: Aljazeera