ဆော်ဒီက စတိတ်ရှိုးတစ်ခုတွင် လူတစ်ယောက်က ဓားဖြင့်ဝင်ထိုး

နိုဝင်ဘာ ၁၂၊ ၂၀၁၉
M-Media

-ဆော်ဒီအာရေဗျနိုင်ငံ မြို့တော် ရီယာ့ဒ်က စတိတ်ရှိုးမှာ အမျိုးသားတစ်ဦးက စင်ပေါ်တက်ပြီး ဓားနဲ့ထိုးတာကြောင့် သီဆိုဖျော်ဖြေသူ ၃ ဦး ဒဏ်ရာရသွားခဲ့ပါတယ်။

ရှိုးပွဲကို မနေ့က ကင်းအဘ်ဒူလာပန်းခြံမှာ ပြုလုပ်ခဲ့တာဖြစ်ပြီး အသက် ၃၃ နှစ်အရွယ် ယီမင်အမျိုးသားတစ်ဦးက ဓားနဲ့ဝင်ထိုးခဲ့တာပါ။ လူ့အဖွဲ့အစည်းမှာ တင်းကြပ်မှု ဖြေလျော့ပေးရေး၊ ရေနံအပြင် အခြားစီးပွားရေးကဏ္ဍတွေ ဖွံ့ဖြိုးတိုးတက်ရေးအတွက် ဆော်ဒီဟာ ၂ လတာ ဂီတပွဲတော်တွေကို နိုင်ငံတစ်ဝှမ်းမှာ ကျင်းပနေတာ ဖြစ်ပါတယ်။

ရှေးရိုးစွဲယဉ်ကျေးမှုကြီးစိုးတဲ့ ဆော်ဒီမှာ အရင်က ဖျော်ဖြေရေးအခမ်းအနားတွေကို ကျင်းပခွင့်မရပါဘူး။ ဒါပေမယ့် ပြီးခဲ့တဲ့ နှစ်အနည်းကစလို့ မင်းသား မိုဟာမက် ဘင် ဆလ်မန်ဟာ လူမှုရေး ကန့်သတ်ရေးမှုတွေကို ဖြေလျော့တာ၊ ဖျော်ဖြေရေးဏ္ဍ မြှင့်တင်ပေးတာတွေကို လုပ်ဆောင်ပေးခဲ့ပါတယ်။

ဒီလို ပြုပြင်ပြောင်းလဲမှုတွေကို ဆော်ဒီလူငယ်တွေက ထောက်ခံကြပေမယ့် သဘောထားတင်းမာတဲ့ ဘာသာရေးခေါင်းဆောင်တွေနဲ့ ဘာသာရေးရဲတွေက သူတို့ရဲ့‌ဩဇာကျဆင်းမှာကို စိုးရိမ်တာကြောင့် ဆန့်ကျင်မှုတွေ ရှိလာလိမ့်မယ်လို့ သုံးသပ်မှုတွေလည်း ရှိနေပါတယ်။

မနေ့က တိုက်ခိုက်မှုဟာ ပြုပြင်ပြောင်းလဲရေးကို ဆန့်ကျင်မှုကြောင့်လား၊ ယီမင်စစ်ပွဲမှာ ဆော်ဒီက ပါဝင်မှုကို မကျေနပ်လို့ လုပ်ဆောင်တာလားဆိုတာ တိတိကျကျ မသိရပါဘူး။ ဒဏ်ရာရသူတွေက အမျိုးသား ၂ ဦးနဲ့ အမျိုးသမီး ၁ ဦးတို့ဖြစ်ပြီး ဆေးကုသမှု ခံယူပြီးတဲ့နောက် အခြေအနေ တည်ငြိမ်သွားပြီလို့ ဆော်ဒီအာဏာပိုင်တွေက သတင်းထုတ်ပြန်ပါတယ်။

Ref: Aljazeera