ဂါဇာတွင် အစ္စရေး၏ တိုက်ခိုက်မှုကြောင့် ၂ ရက်အတွင်း အရပ်သား ၂၀ ကျော် သေဆုံး

နိုဝင်ဘာ ၁၃၊ ၂၀၁၉
M-Media

-ပါလက်စတိုင်းပိုင် ဂါဇာကမ်းမြှောင်ဒေသမှာ အင်္ဂါနေ့ကနေစတင်ပြီး အစ္စရေးကပြုလုပ်တဲ့ လေကြောင်းတိုက်ခိုက်မှုတွေကြောင့် သေဆုံးသူ ပါလက်စတိုင်းအရပ်သားအရေအတွက်ဟာ ၂၄ ဦးအထိ ရှိလာခဲ့ပါတယ်။

အစ္စရေးဟာ အီရန်ကျောထောက်နာက်ခံပြု ပါလက်စတိုင်းလွတ်မြောက်ရေးအဖွဲ့ Islamic Jihad အဖွဲ့က တပ်မှူး ဘာဟာ အဘူ အလ်-အတ္တာနဲ့ သူ့ရဲ့ဇနီးတို့ကို ဂါဇာမှာ အင်္ဂါနေ့က လေကြောင်းကနေ တိုက်ခိုက်သတ်ဖြတ်ခဲ့ပါတယ်။ အဲဒီနောက် လွတ်မြောက်ရေးအဖွဲ့က ဒုံးကျည်တွေနဲ့ အစ္စရေးဖက်ကို ပြန်လည်ပစ်ခတ်ခဲ့ပြီး အခြေအနေ တင်းမာလာတာပါ။

ဆီးရီးယားနိုင်ငံ ဒမတ်စကတ်မြို့မှာ Islamic Jihad တာဝန်ရှိသူ အက္ကရမ် အလ်-အဂျူရီရဲ့ နေအိမ်ကိုလည်း အစ္စရေးက အင်္ဂါနေ့မှာပဲ ဒုံးကျည်နဲ့ ပစ်ခတ်တိုက်ခိုက်ခဲ့ပြီး အလ်-အဂျူရီရဲ့ သားတစ်ဦးအပါအဝင် လူ ၂ ဦး သေဆုံးခဲ့ပါတယ်။

ဂါဇာတာဝန်ရှိသူတွေက ပြီးခဲ့တဲ့ ၂ ရက်အတွင်း အစ္စရေးဟာ လေကြောင်းတိုက်ခိုက်မှု ၅၀ ကျော်၊ လက်နက်ကြီးနဲ့ ပစ်ခတ်တိုက်ခိုက်မှု ၂၁ ခု ပြုလုပ်ခဲ့ပြီး ပါလက်စတိုင်းတွေရဲ့ နေအိမ်တွေ၊ လယ်ယာတွေ၊ သစ်သီးခြံတွေ၊ Islamic Jihad အဖွဲ့နဲ့ သက်ဆိုင်တဲ့ နေရာတွေကို ပစ်မှတ်ထားခဲ့တယ်လို့ ပြောကြားခဲ့ပါတယ်။

ဗုဒ္ဓဟူးနေ့အထိ အစ္စရေးရဲ့တိုက်ခိုက်မှုတွေကြောင့် သေဆုံးသူအရေအတွက်ဟာ ၂၄ ဦးအထိ ရှိလာခဲ့ပြီး အနည်းဆုံး ၆၉ ဦး ဒဏ်ရာရရှိခဲ့ပါတယ်။

Ref: Aljazeera