သီရိလင်္ကာ‌ သမ္မတရွေးကောက်ပွဲတွင် နာမည်ပျက်ရှိသည့် ကာကွယ်ရေးဝန်ကြီးဟောင်း အနိုင်ရ

နိုဝင်ဘာ ၁၈၊ ၂၀၁၉
M-Media

-စနေနေ့က သီရိလင်္ကာနိုင်ငံမှာ ကျင်းပခဲ့တဲ့ သမ္မတရွေးကောက်ပွဲမှာ ကာကွယ်ရေးဝန်ကြီးဟောင်း ဂိုတာဘာယာ ရာဂျာပက်ဆာက အနိုင်ရရှိသွားပါတယ်။

ဂိုတာဘာယာဟာ မဲအရေအတွက် ၅၂.၂၅ ရာခိုင်နှုန်း ရရှိခဲ့ပြီး လက်ရှိ အာဏာရပါတီက သမ္မတလောင်း ဆာဂျစ် ပရီမာဒါဆာကို မဲအနည်းငယ်အသာနဲ့ အနိုင်ရခဲ့တာဖြစ်ပါတယ်။

“ကျွန်တော့်အပေါ် ယုံပုံအပ်ထားတာတွေအားလုံး လုပ်ဆောင်ပေးသွားမယ်လို့ အားလုံးကို ပြောချင်ပါတယ်။ ကျွန်တော် ပြောခဲ့တာတွေအားလုံးကိုလည်း ကျွန်တော့်ရဲ့ သမ္မတ သက်တမ်းမှာ လုပ်ဆောင်ပေးသွားမယ်လို့ ဝမ်းမြောက်ဝမ်းသာစွာ ထပ်လောင်းပြောကြားချင်ပါတယ်” လို့ ရလဒ်ထွက်ပေါ်လာပြီးတဲ့နောက် ဂိုတာဘာယာက ပြောကြားခဲ့ပါတယ်။

ဂိုတာဘယာဟာ ရွေးကောက်ပွဲမဲဆွယ်မှုမှာ နိုင်ငံတော်လုံခြုံရေးနဲ့ စီးပွားရေး ကောင်းမွန်ရေး၊ ခိုင်မာတဲ့ အစိုးရဖြစ်ရေး စတဲ့ ကတိကဝတ်တွေနဲ့ မဲဆွယ်ခဲ့တာဖြစ်ပါတယ်။ သဘောထားတင်းမာတဲ့ ဆင်ဟာလာ ဗုဒ္ဓဘာသာ ဘုန်းကြီးတွေကလည်း ဂိုတာဘယာကို အပြည့်အ၀ ထောက်ခံခဲ့ကြပါတယ်။

ပြိုင်ဘက် ဆာဂျစ်ကလည်း ရွေးကောက်ပွဲရှုံးနိမ့်ကြောင်း ဝန်ခံခဲ့ပြီး ဂိုတာဘာယာကို ဂုဏ်ပြုခဲ့ပါတယ်။ သမ္မတ ကျမ်းကျိန်ပွဲအခမ်းအနားကို မြို့တော်ကိုလံဘိုမြောက်ဖက် ဆင်ဟာလာ ဗုဒ္ဓဘာသာအမွေအနှစ်မြို့ဖြစ်တဲ့ အနုရဌာပူရမှာ ဒီကနေ့ ပြုလုပ်မှာ ဖြစ်ပါတယ်။

နာမည်ပျက်ရှိ

အစ်ကိုဖြစ်သူ မာဟင်ဒါရဲ့ ၁၀ နှစ်တာ သမ္မတသက်တမ်းမှာ ကာကွယ်ရေးဝန်ကြီးအဖြစ် တာဝန်ထမ်းဆောင်ခဲ့တဲ့ ဂိုတာဘယာဟာ လူ့အခွင့်အရေးချိုးဖောက်မှုတွေအတွက် နာမည်ပျက်ရှိခဲ့ပါတယ်။

အထူးသဖြင့် နိုင်ငံမြောက်ပိုင်းမှာ လူပေါင်း ၄ သောင်းကျော် သေဆုံးခဲ့တဲ့ တမီလ်ကျားသူပုန်တွေကို အပြီးသတ်နှိမ်နှင်းရေးမှာ ဂိုတာဘာယာ ကွပ်ကဲတဲ့စစ်တပ်ဟာ တမီလ်အရပ်သားတွေအပေါ် သတ်ဖြတ်မှုတွေ၊ လူ့အခွင့်အရေး ချိုးဖောက်မှုတွေအများအပြား လုပ်ဆောင်ခဲ့တယ်လို့
စွပ်စွဲမှုတွေ ရှိခဲ့ပါတယ်။

ဒါ့အပြင် အတိုက်အခံအုပ်စုတွေကို ပြင်းပြင်းထန်ထန် နှိပ်ကွပ်တာ၊ တရားလက်လွတ်ဖမ်းဆီးတာတွေကိုလည်း မာဟင်ဒါနဲ့ပေါင်းပြီး ဂိုတာဘာယာက လုပ်ဆောင်ခဲ့ပါတယ်။

ဂိုတာဘာယာက ဒီစွပ်စွဲချက်တွေကို ငြင်းဆိုခဲ့ပေမယ့် တမီလ်ကျားသူပုန်တွေကို ချေမှုန်းနိုင်ခဲ့တဲ့လုပ်ရပ်ကို အခုရွေးကောက်ပွဲမဲဆွယ်မှုမှာ အသုံးချခဲ့ပါတယ်။

Ref: Aljazeera