ဟိန္ဒူအစွန်းရောက်များ၏ ကန့်ကွက်မှုကြောင့် မွတ်စလင် သက္ကတဘာသာ ပါမောက္ခ တိမ်းရှောင်နေရ

နိုဝင်ဘာ ၂၃၊ ၂၀၁၉
M-Media

-ဟိန္ဒူလက်ယာစွန်းသမားတွေရဲ့ ကန့်ကွက်မှုကြောင့် အိန္ဒိယနိုင်ငံ တက္ကသိုလ်တစ်ခုက မွတ်စလင် သက္ကတာဘာသာ ပါမောက္ခတစ်ခုဟာ ဘေးလွတ်ရာကို တိမ်းရှောင်နေရတယ်လို့ သိရပါတယ်။

နိုင်ငံမြောက်ပိုင်း အူတာပရာဒက်ရှ်ပြည်နယ် ဗာရာဏသီမြို့က Banaras Hindu တက္ကသိုလ် ကော်မတီဟာ သက္ကတဘာသာဌာန လက်ထောက်ပါမောက္ခနေရာတွက် အသက် ၂၉ နှစ်အရွယ် ဖေရွတ်ဇ်ခန်းဆိုတဲ့ မွတ်စလင်တစ်ဦးကို ခန့်အပ်ခဲ့တာပါ။

ဖေရွတ်ဇ်ခန်းဟာ ဖခင်ဖြစ်သူရဲ့ သင်ကြားမှုကြောင့် ငယ်စဉ်ကတည်းက သက္ကတဘာသာစကားကို လေ့လာခဲ့ပြီး တစ်ဖက်ကမ်းခတ် ကျွမ်းကျင်တတ်မြောက်သူလည်းဖြစ်ပါတယ်။

ဒါပေမယ့် ဖေရွတ်ဇ်ကို လက်ထောက်ပါမောက္ခအဖြစ် ခန့်အပ်ပြီး ၂ ရက်အကြာ နိုဝင်ဘာ ၇ ရက်နေ့မှာတော့ ဟိန္ဒူအမျိုးသားရေးဝါဒကို အခြေခံတဲ့ ကျောင်းသားအဖွဲ့အစည်း Akhil Bharatiya Vidyarthi Parishad က ကျောင်းအတွင် းဆန္ဒပြခဲ့ပြီး ဖေရွတ်ဇ်ကို တစ်ခြားဌာ‌န ရွှေ့ပြောင်းဖို့ တောင်းဆိုခဲ့ပါတယ်။

‘ငါတို့ဘာသာတရားကို မွတ်စလင်တစ်ယောက် သင်ခွင့်မရှိ’ ဆိုတဲ့ ဆိုင်းဘုတ်တွေကိုလည်း ကိုင်ဆောင်ခဲ့ပြီး ဖေရွတ်ဇ် ဌာနမပြောင်းမချင်း ဆန္ဒပြသွားမယ်လို့ ကျောင်းသားတွေက ပြောကြားခဲ့ပါတယ်။

ဖေရွတ်ဇ်ကတော့ မလိုလားအပ်တဲ့အန္တရာယ်ဖြစ်လာမှာ စိုးတဲ့အတွက် မိသားစုရှိရာ ရာဂျက်စတန်ပြည်နယ်ကို ခေတ္တတိမ်းရှောင်နေပါတယ်။

“ကလေးဘ၀ကတည်းက ကျောင်းပြီးတဲ့အချိန်အထိ ကျွန်တော့်ဘာသာတရားကြောင့် ခွဲခြားဆက်ဆံခံရမှုမျိုး ဘယ်တုန်းကမှ မကြုံခဲ့ဖူးပါဘူး။ ဒါဟာ သိပ်ကို စိတ်မကောင်းစရာပါ။ ဟိန္ဒူတစ်ယောက်မဟုတ်တဲ့အတွက် ကျောင်းသားတစ်စုက ကျွန်တော် သက္ကတဘာသာစကား သင်ကြားတာကို မလိုချင်ကြဘူး” လို့ ဖေရွတ်ဇ်ခန်းက ပြောကြားခဲ့ပါတယ်။

Banaras Hindu တက္ကသိုလ်က ဖေရွတ်ဇ်ကို သက္ကတဘာသာဌာန လက်ထောက်ပါမောက္ခအဖြစ် ခန့်အပ်မှုကို ပြန်လည်ပယ်ဖျက်မှာမဟုတ်ဘဲ ဘာသာ၊ လူမျိုး၊ ဇာတ် ခွဲခြားမှုမရှိဘဲ တန်းတူညီမျှ အခွင့်အလမ်းပေးအပ်ရေးဆိုတဲ့ မူဝါဒကို ဆက်လက်ဆုပ်ကိုင်ထားမယ်လို့ ထုတ်ပြန်ခဲ့ပါတယ်။ ဒါပေမယ့် ဖေရွတ်ဇ် ခေတ္တတိမ်းရှောင်နေရတယ်ဆိုတာကိုတော့ အတည်ပြုခဲ့ပါတယ်။

တက္ကသိုလ်ရှိရာ ပတ်ဝန်းကျင်က ဟိန္ဒူဘုန်းတော်ကြီးတွေကတော့ ဖေရွတ်ဇ်ကို သက္ကတဘာသာ လက်ထောက်ပါမောက္ခအဖြစ် ခန့်အပ်မှုကို ထောက်ခံတယ်လို့ ပြောကြားခဲ့ပါတယ်။

ဖေရွတ်ဇ်ရဲ့ဖခင်ဖြစ်သူ ရမ်ဇာန်ခန်းဟာ သက္ကတဘာသာစကားကို ကျွမ်းကျင်သူဖြစ်ပြီး ဟိန္ဒူ ဓမ္မတေးတွေကို ပိုင်နိုင်စွာသီဆိုနိုင်မှုကြောင့် ဒေသတွင်းမှာ ကျော်ကြားပါတယ်။ ဒါ့အပြင် နွားစောင့်ရှောက်ရေး ဂေဟာမှာ စေတနာ့ဝန်ထမ်းအဖြစ် ကူညီပေးနေပါတယ်။

နှစ်ပေါင်း ၃၅၀၀ သက်တမ်းရှိပြီဖြစ်တဲ့ သက္ကတဘာသာဟာ ဟိန္ဒူဘာသာမှာ အရေးပါတဲ့ ဘာသာစကားတစ်ခုဖြစ်ပြီး ပညာရေးအသိုင်းအ၀ိုင်းနဲ့ ဟိန္ဒူဘာသာရေးအခမ်းအနားတွေမှာ တွင်တွင်ကျယ်ကျယ် အသုံးပြုနေဆဲ ဖြစ်ပါတယ်။

Ref: The Guardian