ဟောင်ကောင် ခရိုင်ကောင်စီ ရွေးကောက်ပွဲတွင် ဒီမိုကရေစီ လိုလားသူများ အောင်ပွဲခံ

နိုဝင်ဘာ ၂၅၊ ၂၀၁၉
M-Media

-၆ လတာ နိုင်ငံရေးမငြိမ်သက်မှုဖြစ်ပွားပြီးတဲ့နောက် ဟောင်ကောင်မှာပြုလုပ်တဲ့ ခရိုင်ကောင်စီ ရွေးကောက်ပွဲတွေမှာ ဒီမိုကရေစီလိုလားတဲ့ အဖွဲ့တွေက သောင်ပြိုကမ်းပြို အနိုင်ရနေတယ်လို့ သိရပါတယ်။

မနေ့ကပြုလုပ်တဲ့ ရွေးကောက်ပွဲမှာ မဲဆန္ဒရှင် ၇.၄ သန်းလောက် လာရောက်မဲပေးခဲ့ပြီး ဒါဟာ ဟောင်ကောင်သမိုင်းမှာ မဲပေးသူအရေအတွက် အများဆုံးလည်း ဖြစ်ပါတယ်။ ခရိုင်ကောင်စီဝင်နေရာ ၄၅၂ နေရာ ရှိရာမှာ ဒီမိုကရေစီ လိုလားတဲ့သူတွေက ပထမဆုံးအကြိမ် ထက်ဝက်ကျော် အနိုင်ရခဲ့ပါတယ်။

ဟောင်ကောင်က ခရိုင်ကောင်စီတွေဟာ အစိုးရရဲ့ ဘက်ဂျက်အချို့ကို စီမံခန့်ခွဲနိုင်တဲ့ အခွင့်အာဏာ ရှိသလို၊ ပို့ဆာင်ရေးလို့ ဒေသတွင်း အသက်မွေးဝမ်းကြောင်းဆိုင်ရာ ကိစ္စတွေမှာလည်း အဆုံးအဖြတ်ပေးပိုင်ခွင့် ရှိပါတယ်။

အနိုင်ရတဲ့ ကောင်စီဝင်တစ်ချို့က ဒီရလဒ်ဟာ နိုင်ငံရဲ့ ဒီမိုကရေစီစွမ်းအားကို ပြသတာဖြစ်ပြီး တရုတ်ဖက်ယိမ်းတဲ့ ဟောင်ကောင်အုပ်ချုပ်ရေးမှူး ကာရီလမ်အပေါ် ဖိအားဖြစ်လာစေမယ်လို့ ပြောကြားခဲ့ကြပါတယ်။

ဗြိတိသျှဟာ သူတို့အုပ်ချုပ်တဲ့ ဟောင်ကောင်ဒေသကို ၁၉၉၇ ခုနှစ်မှာ တရုတ်နိုင်ငံထံ လွှဲပြောင်းပေးခဲ့တာပါ။ အဲဒီအချိန်ကတည်းက တရုတ်ဟာ ဟောင်ကောင်ကို ဒီမိုကရေစီစနစ်နဲ့ အုပ်ချုပ်ခဲ့တာဖြစ်ပါတယ်။ ဒါပမယ့် ဟောင်ကောင်ပြည်သူတွေကတော့ တရုတ်ဟာ ဟောင်ကောင်အရေးကို ဝင်ရောက်ချယ်လှယ်နေတယ်လို့ ဝေဖန်ခဲ့ကြပါတယ်။

ရာဇဝတ်သားတွေကို တရုတ်ပြည်မကြီးထံ လွှဲပြောင်းပေးနိုင်မယ့် ဥပဒေတစ်ခု ပြဌာန်းဖို့ ဟောင်ကောင်အစိုးရက ကြိုးစားခဲ့တဲ့ လွန်ခဲ့တဲ့ ၆ လခန့်ကစလို့ ဟောင်ကောင်မှာ ဒီမိုကရေစီတောင်းဆိုတဲ့ ဆန္ဒပြမှုတွေ ဆက်တိုက်ဖြစ်ပေါ်ခဲ့ပြီး လုံခြုံရေးတပ်ဖွဲ့တွေနဲ့ ထိပ်တိုက်တွေ့ဆုံမှုတွေ၊ လူသေဆုံးမှုတွေအထိ ဖြစ်ခဲ့ပါတယ်။

Ref: CNA