ဘင်္ဂလားဒေ့ရှ် စစ်တပ်အကြီးအကဲ မြန်မာနိုင်ငံလာမည်

နိုဝင်ဘာ ၂၈၊ ၂၀၁၉
M-Media

-နှစ်နိုင်ငံ စစ်ဖက်ဆိုင်ရာ ပူးပေါင်းဆောင်ရွက်မှု ပိုမိုအားကောင်းစေဖို့အတွက် ဘင်္ဂလားဒေ့ရှ် စစ်တပ်အကြီးအကဲ ဗိုလ်ချုပ် အဇစ် အဟ်မဒ် ဒီဇင်ဘာအစောပိုင်းမှာ မြန်မာနိုင်ငံကို တစ်ပတ်တာ လာရောက်လည်ပတ်ဖို့ ရှိနေပါတယ်။

မြန်မာနိုင်ငံကနေ ဘင်္ဂလားဒေ့ရှ်ဖက်ကို ထွက်ပြေးသွားရတဲ့ ရိုဟင်ဂျာတွေ နေရပ်ပြန်ရေးကိစ္စ နှောင့်နှေး ကြန့်ကြာနေတာကောင့် မြန်မာနဲ့ ဘင်္ဂလားဒေ့ရှ်နိုင်ငံအကြား အပြန်အလှန်ပြစ်တင်ပြောဆိုမှုတွေ ရှိနေတာပါ။

ဘင်္ဂလားဒေ့ရှ်စစ်တပ် ပြည်တွင်းဆက်ဆံရေးဌာန အကြီးအကဲ ဒုတိယဗိုလ်မှူးကြီး အဘ်ဒူလာ ဘင် ဇာဟစ်က စစ်တပ်အကြီးအကဲရဲ့ မြန်မာနိုင်ငံကို လာရောက်လည်ပတ်မှုဟာ ရှိပြီးသား စစ်ဖက်ဆက်ဆံရေး တိုးတက်စေဖို့နဲ့ ပူးပေါင်းဆောင်ရွက်မှုနည်းလမ်းတွေ ရှာဖွေဖို့ဖြစ်ကြောင်း ရိုဟင်ဂျာကိစ္စနဲ့ သက်ဆိုင်ခြင်းမရှိကြောင်း မနေ့မှာ ပြောကြားခဲ့ပါတယ်။

“ရိုဟင်ဂျာကိစ္စက နိုင်ငံခြားရေးဝန်ကြီးဌာန ကိစ္စပါ။ ကျွန်တော်တို့အကြီးအကဲ လည်ပတ်မှာက နှစ်နိုင်ငံ စစ်ဖက်ဆက်ဆံရေး ပိုမိုအားကောင်းစေဖို့ ဖြစ်ပါတယ်”

ဒါပေမယ့် ဝန်ကြီးချုပ် ရှိခ်ဟာဆီနာက သီးသန့်ညွှန်ကြားတဲ့ကိစ္စဆိုရင်တော့ မြန်မာနိုင်ငံခရီးစဉ်မှာ ထည့်သွင်း ဆွေးနွေးသွားဖို့ ရှိတယ်လို့လည်း ‌ဇာဟစ်က ဆိုပါတယ်။

“ကျွန်တော်တို့ဟာ မြန်မာနိုင်ငံနဲ့ ကောင်းမွန်တဲ့ဆက်ဆံရေးရှိတယ်။ အပြန်အလှန် လေ့ကျင့်ပေးရေးအပါအဝင် ဆက်ဆံရေးပိုမိုအားကောင်းစေဖို့ ကျွန်တော်လည်း မြန်မာနိုင်ငံကို သွားရောက်မှာ ဖြစ်ပါတယ်”

ဘင်္ဂလားဒေ့ရှ် စစ်တပ်အကြီးအကဲ မြန်မာနိုင်ငံကိုသွားရောက်မှုဟာ ရိုဟင်ဂျာတွေ နေရပ်ပြန်ရေး ကမ္ဘာရဲ့ တိုက်တွန်းအားပေးမှုကို အားနည်းစေလိမ့်မယ်လို့ ဘင်္ဂလားဒေ့ရှ်အခြေစိုက် နိုင်ငံရေးသုတေသီတစ်ချို့က သုံးသပ်ခဲ့ကြပါတယ်။

Ref: AA.com