၃၇ နှစ်အရင်က လူသတ်မှုအတွက် ဆူရီနမ်သမ္မတ ထောင် နှစ် ၂၀ ချမှတ်ခံရ

ဒီဇင်ဘာ ၁၊ ၂၀၁၉
M-Media

-လွန်ခဲ့တဲ့ ၃၇ နှစ်က နိုင်ငံရေးအတိုက်အခံ ၁၅ ယောက်ကို သတ်ဖြတ်မှုအတွက် တောင်အမေရိက နိုင်ငံငယ် ဆူရီနမ်ရဲ့ လက်ရှိသမ္မတ ဒီဆီ ဘူတာ့စ်ဟာ ထောင်ဒဏ် နှစ် ၂၀ ချမှတ်ခံခဲ့ရပါတယ်။

ဘူတာ့စ်ဟာ ၁၉၈၀ ပြည့်နှစ်တွေ စစ်အစိုးရခေါင်းဆောင်အဖြစ် နိုင်ငံကို စတင်အုပ်ချုပ်ခဲ့ပြီး ၂၀၁၀ မှာ သမ္မတအဖြစ် တာဝန်ယူခဲ့ကာ ၂၀၁၅ ရွေးကောက်ပွဲမှာလည်း ပြန်လည်အနိုင်ရရှိခဲ့ပါတယ်။

တရားသူကြီး ၃ ဦးပါဝင်တဲ့ ခုံအဖွဲ့ဟာ ၁၉၈၂ ပြည့်နှစ်က အတိုက်အခံ ၁၅ ယောက် အသတ်ခံရမှုအတွက် မနေ့မှာ အမိန့်ချမှတ်ခဲ့တာပါ။ ရှေ့နေတွေ၊ ဂျာနယ်လစ်တွေ၊ တက္ကသိုလ်ကျောင်းဆရာတွေ ပါဝင်တဲ့ အတိုက်အခံ စုစုပေါင်း ၁၆ ယောက်ကို ဘူတာ့စ်လက်အောက်မှာရှိနေတဲ့ စစ်သားတွေက ဖမ်းသွားပြီး ၁၅ ဦးကို သတ်ပစ်ခဲ့တာ ဖြစ်ပါတယ်။ ဒီအမှုကို ၂၀၀၇ ခုနှစ်မှာ စတင်စစ်ဆေးခဲ့တာပါတယ်။

အသက် ၇၄ နှစ်အတွင် သမ္မတ ဘူတာ့စ်ဟာ လက်ရှိ တရုတ်နိုင်ငံကို အလည်အပတ်ခရီး ရောက်ရှိနေပြီး အခု အမိန့်ကြောင့် ကျူးဘားသွားမယ့်ခရီးစဉ်ကိုဖျက်ကာ ဆူရီနမ်နိုင်ငံကို ပြန်လာမှာဖြစ်ပါတယ်။ တရားသူကြီးတွေက ဘူတာ့စ်ကို ဖမ်း၀ရမ်း မထုတ်ခဲ့ပါဘူး။

ဆူရီနမ်အစိုးရကတော့ နိုင်ငံအတွင်းကပြည်သူတွေ တည်ငြိမ်ငြိမ်ရှိကြဖို့ တိုက်တွန်းထားပါတယ်။ တရားရုံးက အခုလို အမိန့်ချမှတ်တာကြောင့် ဘူတာ့စ်ဟာ သမ္မတအဖြစ် ဆက်ရှိမနေသင့်တော့ဘူးလို့ အတိုက်အခံခေါင်းဆောင်တွေက ပြောကြားခဲ့ကြပါတယ်။

တရားရုံးဟာ ဘူတာ့စ်အပြင် သတ်ဖြတ်မှုမှာပါဝင်တဲ့ စစ်တပ်အရာရှိဟောင်း ၆ ဦးကိုလည်း ပြစ်ဒဏ်တွေ အသီးသီး ချမှတ်ခဲ့ပါတယ်။

ဘူတာ့စ်ကို မူးယစ်မှောင်ခိုမှုနဲ့ ၁၉၉၉ ခုနှစ်မှာ နယ်သာလန်တရားရုံးက မျက်ကွယ်ပြစ်ဒဏ် ချမှတ်ခဲ့ဖူးပါတယ်။ သူကတော့ စွဲချက်တွေကို ငြင်းဆိုခဲ့ပါတယ်။ မနေ့က တရားရုံးအမိန့်နဲ့ပတ်သက်ပြီး ဘူတာ့စ်က တုန့်ပြန်ပြောဆိုမှု မလုပ်သေးပါဘူး။

Ref: Aljazeera